WAHYU 2 - KITAB SUCI ZABUR INJIL

Tipaq jemaah léq Epesus

¹ “Tipaq malaékat jemaah léq Epesus, tulis maraq niki: Niki manik léman Ie saq negel pituq bintang léq gading-Ne saq kanan, dait bemargi léq antare kepituq naé dilah emas nike.

² Tiang nenaoq selapuq pegawéande, selapuq usahende, dait kesabarande. Tiang nenaoq bahwe side pade ndéq tao sabar tipaq dengan jahat, dait bahwe side pade sampun nguji dengan-dengan saq ngaku diriqne rasul padahal setetune ndéq, dait side pade mauq bukti bahwe ie pade penduste.

³ Side pade sabar dait side pade menderite lantaran aran Tiang, dait side pade ndéq putus ase.

⁴ Laguq niki keberatan Tiang tipaq side pade: Side pade ndéq ngasihin Tiang maraq kasih side pade saq semule.

⁵ Keranaq nike pade inget berembé dalemne side pade sampun geriq! Pade tobat léman dose-dosende, dait laksaneang napi saq semule side pade laksaneang. Lamun ndéq, make Tiang gen dateng tipaq side dait bait naé dilahde nike léman taoqne.

⁶ Laguq araq saq solah léq side: Side pade meriq léq perbuatan pengiring-pengiring Nikolaus, saq Tiang meriq éndah.

⁷ Sai bedowé kentok, harus ie dengahang napi saq temanikang siq Roh Allah tipaq jemaah-jemaah! Sai-sai saq menang, gen Tiang béng kelorang buaq léman lolo kehidupan saq tiwoq léq Taman Pirdaus Allah.”

Tipaq jemaah léq Smirna

⁸ “Tipaq malaékat jemaah léq Smirna tulis maraq niki: Niki manik léman Ie saq penembéq dait saq penutuq -- saq sampun ninggal dait idup malik.

⁹ Tiang nenaoq kesusahan-kesusahan side pade; Tiang nenaoq keadaan side pade saq miskin -- laguq setetune side pade sugih! Tiang nenaoq pitnah-pitnah saq tetujuang tipaq side pade siq dengan-dengan saq ngaku diriqne Yahudi, padahal ndéq; ie pade jemaah Belis!

¹⁰ Ndaq takut léq penderitean saq ndéq pire ngonéq malik side gen alamin. Inget, Belis gen namaqang separo léman side pade ojok dalem bui jari cobe side pade. Side pade gen menderite sepulu jelo ngonéqne. Side pade harus setie léq Tiang jangke ninggal, make Tiang gen ngicanin side mahkote kehidupan.

¹¹ Sai-sai saq iniq dedengah, harus perhatiang napi saq temanikang siq Roh Allah tipaq jemaah-jemaah! Sai-sai saq menang, ndéq gen menderite napi-napi lantaran kematéan saq kedue.”

Tipaq jemaah léq Pergamus

¹² “Tipaq malaékat jemaah léq Pergamus, tulis maraq niki: Niki manik léman Ie saq negel kléwang bemangan due saq merang gati.

¹³ Tiang nenaoq léq mbé side ndot, nike léq taoqne Belis betahte. Side pade setie léq Tiang, malahan sewaktu Antipas, saksi Tiang saq setie nike, tematéq léq julunde léq taoq Belis ndot, side pade ndéq nilas bahwe side percaye léq Tiang.

¹⁴ Laguq timaq maraq nike, araq pire hal saq Tiang ndéq suke léman side pade: Araq separo dengan léq antare side pade saq turut napi saq teajahang siq Bileam, saq ngebéng naséhat tipaq Balak jari nyesatang dengan Israel ojok dalem dose, sehingge ie pade ngelorang keloran saq sampun teaturang tipaq berhale dait gawéq perbuatan saq cabul.

¹⁵ Maraq nike éndah araq léq antare side pade dengan-dengan saq percaye léq pengajahan pare pengiring Nikolaus.

¹⁶ Keranaq nike, side pade harus tobat léman dose-dosende! Lamun ndéq, karing semendaq Tiang gen dateng tipaq side pade dait perang kance dengan-dengan nike kadu kléwang saq araq léq biwih Tiang.

¹⁷ Sai bedowé kentok, harus ie dengahang napi saq temanikang siq Roh Allah tipaq jemaah-jemaah! Sai-sai saq menang, gen Tiang béng kelorang manna saq teseboq, dait Tiang gen béng ie pade batu putéq. Léq batu nike tetulis sopoq aran saq baru, saq ndéq tetaoq siq sai-sai, selain siq dengan saq nerimaq batu putéq nike.”

Tipaq jemaah léq Tiatira

¹⁸ “Tipaq malaékat jemaah léq Tiatira, tulis maraq niki: Niki manik léman Bije saq asalne léman Allah, saq penyermin-Ne nyale maraq api, dait cokor-Ne maraq rue tembage tetunuq.

¹⁹ Tiang nenaoq selapuq saq side pade laksaneang, kasihde, imande, pengabdiande, dait kesabarande. Tiang nenaoq bahwe mangkin side pade begawéan luwéqan léman saq laéq.

²⁰ Laguq Tiang wade side, lantaran side pade ngalurang Izebel, dengan nine saq ngaku diriqne utusan Allah nike. Sampun luwéq hambe-hambe Tiang saq tesesatang siq ie adéq gawéq perbuatan saq cabul dait ngelorang keloran saq sampun teaturang tipaq berhale.

²¹ Sampun Tiang béng ie kesempatan adéq tobat léman dose-dosene, laguq ie ndéq mélé engkah gawéq perbuatan-perbuatan saq cabul nike.

²² Pade inget! Tiang gen nimpak ie jangke sakit léq petindoqanne. Léq derike ie dait dengan-dengan saq bezinah kance ie gen menderite gati. Selapuqne nike mangkin gen Tiang laksaneang -- kecuali lamun ie pade engkah gawéq hal-hal saq jahat bareng-bareng kance ie.

²³ Pare pengiringne gen Tiang matéq éndah adéq selapuq jemaah sadar bahwe Tiang saq nguji pikiran dait até manusie. Tiang gen bales side pade menurut perbuatande sopoq-sopoq.

²⁴ Laguq side pade saq lainne léq Tiatira ndéq turut pengajahan saq jahat nike, dait ndéq berajah ilmu-ilmu Belis. Tiang bemanik bahwe Tiang ndéq gen ngeromboqang bandean saq lain léq side pade.

²⁵ Laguq jangke waktu Tiang dateng éraq, side pade harus tetep tegel napi saq sampun side pade épéang.

^26-27 Ie pade saq menang, dait saq jangke penutuq tetep ngelaksaneang napi saq Tiang méléang, gen Tiang béng kuase saq pade maraq saq Tiang terimaq léman Bapa Tiang. Ie pade gen nerimaq kuase léman Tiang jari mréntah bangse-bangse siq tunjang besi, dait jari ngancurang bangse-bangse nike maraq dengan ngancurang keméq tanaq.

²⁸ Ie pade gen nerimaq bintang timuq léman Tiang.

²⁹ Sai bedowé kentok, harus ie dengahang napi saq temanikang siq Roh Allah tipaq jemaah-jemaah!”