WAHYU 19 - KITAB SUCI ZABUR INJIL

¹ Sesampun nike tiang dengah suare saq nyaring maraq suare dengan luwéq bekuih-kuih léman sorge, “Pade mulieang Allah! Allahte nike Allah saq nyelametang; Ie Allah saq agung dait bekuase!

² Penghakimanne adil dait bijaksane! Ie sampun mutusang hukuman tipaq pelacur saq beléq nike, saq nyédaq dunie siq perbuatanne saq cabul. Allah sampun hukum pelacur nike, séngaq ie nyematéq hambe-hambe Allah.”

³ Terus dengan luwéq nike bekuih malik, “Pade mulieang Allah! Pendet léman api nike nyempuq selaéq-laéqne!”

⁴ Make keempat likur pemimpin dait keempat mahluk saq léq sekelining tahte nike nyungkur dait nyembah Allah saq melinggih léq atas tahte. Ie pade matur, “Amin! Pade mulieang Allah!”

Gawé ngawinang Anak Dombe

⁵ Terus kedengahan suare léman tahte nike, “Pade mulieang Allah, hai selapuq hambe Allah, dait selapuq dengan -- beléq dait kodéq -- saq takut léq Allah!”

⁶ Sesampun nike tiang dengah maraq suare sekumpulan dengan saq luwéq gati; suarene maraq umbak saq beléq dait maraq guntur. Tiang dengah suare ie pade, “Pade mulieang Allah! Séngaq Tuhante, Allah Saq Mahekuase nike, mangkin sampun mréntah jari raje!

⁷ Silaq ite besukecite dait gembire; silaq ite puji keagungan-Ne! Séngaq sampun dateng jelo pernikahan Anak Dombe nike, dait pengantén-Ne sampun siep.

⁸ Ie sampun teicanin kelambi lénen saq putéq ngempor jari tekadu.” (Kelambi lénen nike perbuatan-perbuatan saq kenaq saq telaksaneang siq dengan-dengan saq tehususang bagi Allah.)

⁹ Terus malaékat nike bebase léq tiang, “Tulis niki: ‘Bahagie dengan saq tepesilaq ojok gawé ngawinang Anak Dombe nike.’ ” Beterus malaékat nike bebase malik léq tiang, “Niki manik saq kenaq léman Allah.”

¹⁰ Tiang nyungkur léq julun malaékat nike gen nyembah ie, laguq ie bebase léq tiang, “Ndaq! Ndaq nyembah tiang, pade sembah Allah! Séngaq tiang éndah hambe pade maraq side dait maraq selapuq semetonde saq setie léq kesaksian Deside Isa!” Séngaq kesaksian Deside Isa nike roh nubuat.

Penunggang jaran putéq

¹¹ Beterus tiang serioq sorge kebukaq, terus penggitan sopoq jaran putéq. Aran penunggang-Ne Saq Setie dait Saq Kenaq. Ie adil dalem mutusang hukuman dait dalem peperangan saq Ie laksaneang.

¹² Penyermin-Ne maraq nyale api dait léq sirah-Ne Ie ngengadu luwéq mahkote. Léq Ie tetulis sopoq aran; dait cume Ie mésaq saq wikan aran nike.

¹³ Jubah saq Ie kadu sampun tecelep léq dalem daraq. Dait Ie tesebut “Manik Allah”.

¹⁴ Dait selapuq pasukan saq léq sorge ngiring Ie; ie pade nunggang jaran-jaran putéq, dait bekelambi lénen saq putéq bersi.

¹⁵ Léman cangkem-Ne sugul sopoq kléwang saq merang dait siq kléwang nike Ie gen ngalahang bangse-bangse, dait Ie gen mréntah ie pade siq tunjang besi. Ie gen meres anggur léq dalem alat pemeres anggur murke Allah Saq Mahekuase.

¹⁶ Léq jubah-Ne dait léq impung-Ne tetulis aran niki, “Raje selapuq raje, dait Tuan selapuq tuan.”

¹⁷ Terus tiang serioq sopoq malaékat nganjeng léq atas jelo. Siq suare saq beléq ie bekuih tipaq selapuq kedit saq kesur léq langit, “Silaq bekumpul ojok gawé beléq saq terayeang siq Allah!

¹⁸ Silaq kelorang daging raje-raje, daging panglime-panglime, dait daging pahlawan-pahlawan; silaq kelorang daging pare penunggang jaran dait daging jaran-jaranne, dait daging selapuq umat manusie, beléq dait kodéq, hambe dait dengan merdéke!”

¹⁹ Beterus tiang serioq binatang nike, dait raje-raje gumi kance pasukan perang ie pade, bekumpul jari betempur ngelawan Ie saq nunggang jaran putéq nike dait pasukan perang-Ne.

²⁰ Make binatang nike tebau bareng-bareng kance nabi palsu saq sampun miaq keajaipan-keajaipan léq julun binatang nike. (Siq keajaipan-keajaipan nike binatang nike nipu dengan-dengan saq bedowé tande binatang nike dait dengan-dengan saq nyembah tetato binatang nike.) Terus binatang nike dait nabi palsu nike tetetéh idup-idup ojok dalem segare api saq nyale siq urirang.

²¹ Dait selapuq pasukan perang ie pade tematéq siq kléwang saq sugul léman cangkem penunggang jaran putéq nike; dait kedit-kedit éndah dateng ngaken daging ie pade jangke besuh.