WAHYU 14 - KITAB SUCI ZABUR INJIL

Anak Dombe dait pengiring-Ne saq Ie tebus

¹ Beterus tiang serioq Anak Dombe nike penggitan nganjeng léq atas Bukit Sion. Bareng kance Ie araq satus petang dase empat iyu dengan saq léq telakar ie pade tetulis peséngan-Ne dait peséngan Bapa-Ne.

² Terus tiang dengah suare léman langit maraq suare belabur saq beléq dait maraq suare guntur saq beléq. Suare nike kedengahan maraq suare pemaén-pemaén kecapi saq kenyeke puniq kecapine.

³ Léq arepan tahte dait keempat mahluk dait pare pemimpin léq sekelining tahte nike, satus petang dase empat iyu dengan nike nyanyiang sopoq nyanyian saq baru. Nyanyian nike ndéq bau teperajahin siq sai-sai kecuali satus petang dase empat iyu dengan saq sampun tetebus léman gumi.

⁴ Ie pade dengan-dengan saq tetep murni maraq dedare genten, séngaq ndéq uwah berubungan kance dengan nine. Ie pade iring Anak Dombe nike ojok mbé Ie lumbar. Léman antare selapuq manusie, ie pade saq sampun tetebus jari persembahan saq penembéq tipaq Allah dait tipaq Anak Dombe nike.

⁵ Ie pade ndéq uwah beduste; dait ndéq araq cacat cele sekediq juaq léq ie pade.

Telu malaékat

⁶ Terus tiang serioq sopoq malaékat lain saq kesur atas gati léq langit. Malaékat nike jauq Kabar Solah saq kekel jari tesampéang tipaq manusie léq gumi, nike tipaq selapuq bangse, suku, base, dait kaum.

⁷ Malaékat nike bekuih siq suare saq beléq, “Pade takut tipaq Allah, dait pade puji keagungan-Ne! Séngaq sampun waktune Allah hakimin manusie. Pade sembah Ie, saq cipteang langit, gumi, segare, dait selapuq pengembulan aiq!”

⁸ Malaékat kedue nerutuk malaékat saq penembéq sambil bekuih, “Sampun runtuh! Kote Babel saq beléq sampun runtuh! Ie sampun miaq selapuq bangse jari bowos siq aiq anggur -- nike anggur léman napsu perbuatanne saq cabul!”

⁹ Sopoq malaékat ketelu nerutuk due malaékat nike, sambil bekuih siq suare saq beléq, “Dengan saq nyembah binatang nike dait tetatone, dait bedowé tande binatang nike léq telakar atao léq imene,

¹⁰ dengan nike gen nginem anggur Allah, nike anggur murke-Ne saq sampun Ie isiq ojok cawan murke-Ne, dait ndéq tekurangin! Selapuq dengan nike gen tesiksaq léq dalem api dait urirang léq arepan malaékat-malaékat suci dait léq arepan Anak Dombe nike.

¹¹ Pendet léman api saq nyiksaq dengan-dengan nike gen nyempuq terus selaéq-laéqne. Ie pade tesiksaq peteng menah ndéq araq engkah-engkahne. Ie pade saq nyembah binatang nike dait tetatone, selapuq dengan saq bedowé tande aran binatang nike.”

¹² Dalem hal niki dengan-dengan saq tehususang bagi Allah saq taat léq préntah-préntah Allah dait saq beriman léq Deside Isa, perlu jari tabah.

¹³ Terus tiang dengah suare léman sorge, “Tulis niki: Mulai mangkin, bahagie dengan-dengan ninggal saq ninggal léq dalem Tuhan!” “Kenaq!” Jawab Roh Allah. “Ie pade gen mentelah begawéan berat, lantaran selapuq hasil pegawéan ie pade tetep gen bareng kance ie pade.”

Gumi tepataq

¹⁴ Beterus tiang serioq, make penggitan sopoq awan saq putéq. Léq atas awan nike melinggih sopoq dengan saq ruene maraq Bije Manusie. Léq sirah-Ne araq sopoq mahkote emas, dait léq gading-Ne araq sopoq awis saq merang.

¹⁵ Beterus sopoq malaékat saq lain sugul léman Gedéng Suci Allah, siq suare saq beléq, ie matur tipaq Ie saq melinggih léq atas awan nike, “Ompéhang awis Deside nike dait pataq mangkin, séngaq sampun waktune mataq; gumi sampun masak bau tepataq!”

¹⁶ Terus Ie saq melinggih léq atas awan nike ngompéhang awis-Ne ojok gumi, make gumi tepataq.

¹⁷ Beterus tiang serioq sopoq malaékat saq lain malik sugul léman Gedéng Suci Allah saq léq sorge. Ie éndah negel sopoq awis saq merang.

¹⁸ Sesampun nike, sopoq malaékat lain, saq nguasein api, dateng léman méje taoq kurban. Siq suare saq beléq ie matur tipaq malaékat saq negel awis saq merang nike, “Ompéhang awisde nike dait keret buaq-buaq lolo anggur léq gumi, séngaq buaq-buaqne sampun masak!”

¹⁹ Make malaékat nike ompéh awisne ojok gumi dait awisne buaq-buaq anggur léman lolone, terus timpohne ojok dalem alat saq tekadu meres anggur, nike murke Allah.

²⁰ Buaq-buaq anggur nike teperes léq luah kote, dait léman alat pemeres anggur nike ngélék daraq maraq kokoq, jaoqne telu ratus kilométer, dait dalemne jangke gen due méter.