WAHYU 12 - KITAB SUCI ZABUR INJIL

Dengan nine dait nage

¹ Terus penggitan léq langit sopoq tande saq beléq. Sopoq dengan nine saq bekelumbung siq jelo, kenyeke nganjeng léq atas bulan. Léq ulune araq sopoq mahkote saq berisi due olas bintang.

² Dengan nine nike kenyeke betian, dait lantaran sampun dateng waktune nganak, make ie nyurak kesakitan.

³ Terus penggitan éndah léq langit sopoq tande saq lain. Araq sopoq nage béaq toaq saq beléq gati saq bedowé pituq otak dait sepulu tanggéq. Sebilang otakne ngengadu sopoq mahkote.

⁴ Siq élongne ie ngoros sepertelu bintang-bintang léq langit dait timpohne ojok gumi. Nage nike nganjeng léq julun dengan nine saq mélé nganak nike siq maksut gen belet anakne, sesampun ie teanakang.

⁵ Terus dengan nine nike anakang sopoq kanak mame saq gen mréntah selapuq bangse siq tunjang besi. Laguq kanak nike terampas léman dengan nine nike, terus tejauq tipaq Allah dait ojok arepan tahte-Ne.

⁶ Make dengan nine nike pelai ojok padang gurun, ojok taoq saq sampun tesedieang siq Allah umaq ie. Léq taoq nike ie gen tepeliharaq siyu satak enem dase jelo ngonéqne.

⁷ Terus léq sorge araq perang. Mikael bareng kance malaékat-malaékatne betempur ngelawan nage nike. Dait nage nike tetulung éndah siq malaékat-malaékatne, ngelawan Mikael.

⁸ Laguq nage nike tekalahang. Ie dait malaékat-malaékatne ndéq bau malik ndot léq sorge.

⁹ Nage saq beléq nike tetetéh ojok luah, nike ulah toaq saq tesebut Belis atao Sétan, saq nyesatang seantéro dunie. Ie tetetéh ojok gumi kance selapuq malaékatne.

¹⁰ Terus tiang dengah suare saq beléq léq sorge bebase, “Mangkin sampun rauh keselametan, kuase, dait Kerajaan Tuhante serte kekuasean Almasih saq tejanjiqang nike. Séngaq saq nuduh semeton-semetonte léq arepan Allah kenjelo kekelem sampun tesugulang léman sorge.

¹¹ Semeton-semetonte sampun ngalahang ie siq daraq Anak Dombe nike, dait siq kesaksian ie pade. Ie pade réde ngurbanang nyawe ie pade jangke ninggal.

¹² Keranaq nike, sorge dait selapuq saq araq léq dalemne harus besukecite! Laguq celake gumi dait segare, séngaq Belis sampun turun tipaq side siq murke saq beléq gati, séngaq ie nenaoq bahwe waktune karing seberaq.”

¹³ Léq waktu nage nike sadar bahwe ie sampun tetetéh ojok gumi, ie mulai paléq dengan nine saq sampun nganakang kanak mame nike.

¹⁴ Laguq dengan nine nike teican due keléték kedit rajewali saq beléq, adéqne kesur ojok taoqne léq padang gurun, nike taoqne tepeliharaq telu setenge taun ngonéqne, jaoq léman serangan nage.

¹⁵ Make nage nike nyugulang luwéq gati aiq léman biwihne maraq aiq kokoq tipaq dengan nine nike adéqne teéléhang siq kokoq nike.

¹⁶ Laguq dengan nine nike tetulung siq gumi; gumi pengangaq biwihne dait belet aiq saq sugul léman biwih nage nike.

¹⁷ Nage nike jari gedek gati léq dengan nine nike, terus ie lalo nyerbu keturunan saq lain léman dengan nine nike, nike selapuq dengan saq taat léq hukum-hukum Allah, dait saq ngebéng kesaksian mengenai Deside Isa dait kuase-Ne.

¹⁸ Terus nage nike nganjeng léq pesisi.