MATIUS 7 - KITAB SUCI ZABUR INJIL

Mengenai hakimin dengan lain

¹ “Ndaq side pade hakimin dengan lain, adéq side pade ndéq tehakimin siq Allah.

² Séngaq berembé entande hakimin dengan lain, maraq nike éndah Allah gen hakimin side pade. Ukuran saq side pade kadu léq dengan lain, nike éndah gen tekadu siq Allah léq side pade.

³ Kembéq side pade pedasang bubuk kayuq léq dalem penenteng semetonde, padahal balok léq dalem penentengde, ndéq side pade perhatiang?

⁴ Berembé side pade bau bebase léq semetonde, ‘Alurang tiang sugulang bubuk kayuq saq araq léq penentengde,’ padahal léq dalem penentengde mésaq araq balok?

⁵ Hai dengan munapik! Sugulang juluq balok léman penentengde mésaq, baruq side bau pedas serioq dait bau nyugulang bubuk kayuq léman penenteng semetonde.

⁶ Ndaq ngebéng barang saq suci tipaq acong, dait ndaq side saut mutiarende tipaq bawi, adéq ndaq ie icaq-icaq kadu naéne terus ie bebalik garang side.”

Mengenai do'e saq tekabulang

⁷ “Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang.

⁸ Séngaq dengan saq nunas gen nerimaq; dengan saq boyaq gen mauq; dait dengan saq ngetok lawang, gen tebukaqang lawang.

⁹ Léq antare side pade napi araq bapaq saq ngebéng batu léq bijene, lamun ie ngéndéng ruti?

¹⁰ Atao ngebéng ulah lamun ie ngéndéng empaq?

¹¹ Jari, lamun side pade saq jahat, tao ngebéng saq bagus léq bije-bijende. Lebih-lebih Bapa side pade léq sorge! Ie lebihan malik gen ngicanin saq bagus tipaq sebilang dengan saq nunas léq Ie.

¹² Perlakuang dengan lain maraq side pade mélé teperlakuang siq ie pade. Nike intine selapuq Hukum Taurat dait kitab nabi-nabi.”

Lawang saq supit

¹³ “Silaq tame léman lawang saq supit, séngaq lawang dait langan saq nuju ojok nerake nike beléq dait gamber, dait luwéq dengan saq tame liwat derike.

¹⁴ Laguq mule supit dait sengke lawang dait langan saq jauq dengan tipaq idup nike. Dait cume sekediq dengan saq ndait lawang dait langan nike.”

Lolo dait buaqne

¹⁵ “Onyaq-onyaq tipaq nabi-nabi palsu. Ie pade dateng tipaq side pade nyamar maraq dombe, laguq ie pade setetune maraq serigale saq buas.

¹⁶ Side pade gen kenal ie pade léman hasil perbuatanne. Bebenes bedui ndéq nyugulang buaq anggur, dait pupaq bedui ndéq ngasilang buaq are.

¹⁷ Léman lolo saq solah tehasilang buaq saq solah. Dait léman lolo saq ndéq solah tehasilang buaq saq ndéq solah.

¹⁸ Lolo saq solah ndéq bau ngasilang buaq saq lengé, dait lolo saq ndéq solah ndéq bau ngasilang buaq saq solah.

¹⁹ Sebilang lolo saq ndéq ngasilang buaq saq solah, terebaq dait tesedut.

²⁰ Maraq nike éndah halne nabi-nabi palsu. Side pade gen kenal ie pade léman hasil perbuatanne.”

Perbuatan pentingan léman ucapan

²¹ “Ndéqne sebilang dengan saq ngempoh Tiang, ‘Junjungan Saq Mulie, Junjungan Saq Mulie,’ saq gen tame ojok dalem Kerajaan Sorge, laguq cume dengan-dengan saq ngelaksaneang pekayunan Bapa Tiang léq sorge.

²² Léq jelo kiamat, luwéq dengan gen bebase léq Tiang, ‘Junjungan Saq Mulie, Junjungan Saq Mulie, tekan siq peséngan Pelungguh tiang pade sampun benubuat, siq peséngan Pelungguh tiang pade sampun sediq roh-roh jahat dait siq peséngan Pelungguh éndah tiang pade ngaraqang luwéq muqjizat?’

²³ Laguq Tiang gen jawab ie pade, ‘Tiang ndéq uwah kenal kance side pade. Nyedi léman taoq niki! Side pade saq gawéq jahat!’ ”

Due macem dasar

²⁴ “Dengan saq dengah manik Tiang niki dait ngelaksaneang hal nike, dengan nike pade maraq dengan bijaksane saq penganjeng baléne léq atas batu.

²⁵ Léq waktu turun ujan, dait aiq belabur dateng terus angin beléq timpe balé nike, balé nike ndéq ruk séngaq tepenganjeng léq atas batu.

²⁶ Dait dengan saq dengah manik Tiang niki laguq ie ndéq ngelaksaneang hal nike, dengan nike pade maraq dengan saq bodo, saq penganjeng baléne léq atas gerés.

²⁷ Léq waktu turun ujan, dait aiq belabur dateng terus angin beléq timpe balé nike, balé nike gen ruk dait luwéq gati sédene!”

Kuase Deside Isa

²⁸ Ahirne Deside Isa selesé ngajahang, dait dengan-dengan saq araq léq derike takjub gati dengah pengajahan-Ne,

²⁹ séngaq Ie ngajah ie pade siq wibawe, ndéq maraq ahli-ahli Taurat ie pade.