MATIUS 4 - KITAB SUCI ZABUR INJIL

Deside Isa tecobe siq Belis

¹ Sesampun nike Deside Isa tebimbing siq Roh Allah ojok padang gurun jari tecobe siq Belis.

² Petang dase jelo petang dase kelem Deside Isa puase beterus Ie beridap seduk.

³ Beterus Belis dateng dait matur, “Lamun Pelungguh Bije saq asalne léman Allah, cobaq préntahang batu-batu niki jari ruti.”

⁴ Jawab Deside Isa, “Araq tetulis léq dalem Kitab Suci bahwe: Manusie ndéqne idup léman ruti doang, laguq éndah léman sebilang manik saq temanikang siq Allah.”

⁵ Sesampun nike, Deside Isa tebimbing siq Belis ojok kote suci Yerusalem, terus toloqne Deside Isa léq atas buwung Gedéng Allah.

⁶ Beterus Belis matur léq Deside Isa, “Lamun Pelungguh Bije saq asalne léman Allah, cobaq Pelungguh nimproh ojok bawaq. Séngaq araq tetulis léq dalem Kitab Suci bahwe, ‘Allah gen mréntahang malaékat-malaékat-Ne ngelindungin Pelungguh, ie pade gen sangklap Pelungguh siq imene, adéq cokor Pelungguh nénten kedantuk léq batu.’ ”

⁷ Jawab Deside Isa, “Laguq léq dalem Kitab Suci tetulis éndah, ‘Ndaq side cobe Allah, Tuhan side!’ ”

⁸ Beterus jauqne malik Deside Isa ojok atas sopoq gunung saq atas gati, dait petitoqangne tipaq Deside Isa selapuq kerajaan léq dunie dait selapuq kesugihanne.

⁹ Belis nike matur léq Deside Isa, “Selapuqne niki gen tiang serahang tipaq Pelungguh lamun Pelungguh sujut nyembah tiang.”

¹⁰ Jawab Deside Isa, “Nyedi hai Belis! Léq Kitab Suci araq tetulis: Pade sembah Allah, Tuhan side dait tipaq Ie doang side beribadah!”

¹¹ Ahirne Belis nike bilin Deside Isa, beterus malaékat-malaékat rauh ngelayanin Ie.

Deside Isa mulai karye-Ne léq Galilea

¹² Sewaktu Deside Isa mirengang kabar bahwe Yahya tetamaq ojok bui, Ie nyingkir ojok Galilea.

¹³ Deside Isa lumbar léman Nazaret beterus meneng léq Kapernaum, léq sedin Danao Galilea léq daérah Zebulon dait Naptali.

¹⁴ Séngaq Deside Isa ngelaksaneang hal nike, make telaksane napi saq tesampéang siq Nabi Yesaya:

¹⁵ “Tanaq Zebulon dait tanaq Naptali, langan ojok segare, daérah itoqan Kokoq Yordan, Galilea, wilayahne bangse-bangse lain!

¹⁶ Bangse saq endot léq dalem peteng, sampun serioq Terang saq menah tandur! Tipaq saq endot léq negeri saq tekudung siq peteng maut sampun tiwoq Terang!”

¹⁷ Mulai léman waktu nike Deside Isa behotbah, “Pade tobat léman dose-dosende, séngaq Kerajaan Sorge sampun rapet!”

Deside Isa ngemanikang empat nelayan

¹⁸ Sewaktu Deside Isa bemargi léq sedin Danao Galilea, Ie cingakin due dengan besemetonan, Simon (saq tesebut éndah Petrus) dait adiqne aranne Andreas. Ie pade kenyeke bau empaq kadu jaring léq danao nike.

¹⁹ Deside Isa bemanik léq ie pade, “Silaq turut Tiang, Tiang gen jariang side pade penjaring manusie.”

²⁰ Langsung ie pade bilin jaringne terus ngiring Deside Isa.

²¹ Deside Isa terus bemargi, dait cingakin éndah due dengan besemetonan saq lain, aranne Yakub dait Yahya bije Zebedeus. Ie pade kenyeke ngeremaq jaringne kance amaqne léq dalem perau. Ie pade temanikang éndah siq Deside Isa,

²² langsung ie pade bilin perau dait amaqne terus ngiring Deside Isa.

Deside Isa ngajahang, hotbah dait nyelahang dengan sakit

²³ Léq Galilea Deside Isa bemargi ojok selapuq wilayah negeri; Ie ngajahang léq balé-balé ibadah dait nyampéang Kabar Solah mengenai Kerajaan Allah. Deside Isa nyelahang dengan-dengan saq ngidap segale macem penyakit dait saq awakne cacat.

²⁴ Kabar mengenai Deside Isa nike nyebar léq selapuq daérah Siria, sehingge luwéq dengan dateng ojok Ie jauq dengan-dengan saq ngidap segale macem penyakit dait saq susah. Dengan-dengan saq tekuasein siq roh jahat, saq sakit mopok, dait saq képaq, selapuqne teselahang siq Deside Isa.

²⁵ Luwéq gati dengan saq ngiring Deside Isa léq waktu nike. Araq saq dateng léman Galilea dait léman Dekapolis, léman Yerusalem, léman Yudea, dait léman itoqan Kokoq Yordan.