MATIUS 23 - KITAB SUCI ZABUR INJIL

Peringetan adéq onyaq-onyaq léq ahli-ahli Taurat dait dengan-dengan Parisi

¹ Beterus Deside Isa bemanik léq dengan luwéq dait tipaq selapuq pengiring-Ne,

² “Ahli-ahli Taurat dait dengan-dengan Parisi teican kuase jari napsirang Hukum Taurat.

³ Keranaq nike side pade harus taat dait ngelaksaneang selapuq hal saq ie pade ajahang léq side. Laguq ndaq side pade turut napi saq ie pade laksaneang, séngaq ie pade ngajahang laguq ie pade ndéq ngelaksaneang.

⁴ Ie pade tuntut hal-hal saq sengke dait miaq aturan saq berat, laguq ndéq araq gati usahene tulung dengan ngelaksaneang selapuq hal nike.

⁵ Selapuq saq ie pade laksaneang tujuanne cume adéqne teserioq siq dengan. Ie pade sediah ngengadu tali sembahyang saq gamber-gamber dait pebélo ombér-ombér jubahne!

⁶ Ie pade seneng melinggih léq taoq saq paling tehormat léq taoq dengan-dengan begawé, dait melinggih léq kursi saq paling julu léq balé-balé ibadah.

⁷ Ie pade demen tehormatin siq dengan léq peken-peken dait teempoh ‘Guru’.

⁸ Laguq side pade, ndaq gati mélé tesebut ‘Guru’, séngaq side cume bedowé sopoq Guru dait side pade selapuq besemetonan.

⁹ Dait ndaq side sebut sai juaq léq dunie niki siq sebutan, ‘Bapa’, séngaq Bapa side cume sopoq, Bapa saq léq sorge.

¹⁰ Ndaq éndah side pade mélé tesebut ‘Pemimpin’, séngaq cume araq sopoq Pemimpinde, nike Almasih.

¹¹ Dengan saq paling beléq léq antare side pade, ie harus jari pelayande.

¹² Dait dengan saq nyombongang diriqne gen terendahang, dait dengan saq ngerendahang diriqne gen tetinggiang.”

Sipat saq munapik tecele siq Deside Isa

¹³ “Celake side pade ahli-ahli Taurat dait dengan-dengan Parisi! Side pade dengan-dengan munapik séngaq halangin dengan tame ojok Kerajaan Sorge. Side mésaq ndéq mélé tame Kerajaan Sorge, laguq dengan lain saq mélé side pade halangin. [

¹⁴ Celake side ahli-ahli Taurat dait dengan-dengan Parisi: Side pade dengan-dengan munapik. Side pade tipu bebalu-bebalu dait ngerampas baléne dait jari seboq kejahatande nike side pade bedo'e bélo-bélo. Keranaq nike side pade pasti gen nerimaq hukuman saq beratan!]

¹⁵ Celake side ahli-ahli Taurat dait dengan-dengan Parisi! Side pade dengan-dengan munapik! Side pade lumbar jaoq-jaoq mbelat segare, dait jelajah daratan cume jari miaq sopoq dengan turut agamende. Dait sesampun dengan nike tame agamende, side pade jariang ie calon isi nerake, saq due kali jahatan léman side mésaq!

¹⁶ Celake side pade pemimpin-pemimpin saq bute! Side pade ngajahang hal niki, ‘Lamun dengan besumpah demi Gedéng Allah, sumpah dengan nike ndéq sah; laguq lamun dengan besumpah demi emas léq dalem Gedéng Allah, dengan nike ndéq gen lepas léman sumpahne.’

¹⁷ Side pade dengan-dengan bodo dait bute! Mbé saq pentingan; emas atao Gedéng Allah saq jariang emas nike suci?

¹⁸ Side pade éndah ngajahang maraq niki, ‘Lamun dengan besumpah demi méje taoq kurban, dengan nike ndéq tetuntut siq sumpahne; laguq lamun dengan besumpah demi persembahan léq atas méje taoq kurban nike, make ie gen tetuntut siq sumpahne nike.’

¹⁹ Hai side pade dengan-dengan bute! Mbé saq pentingan? Persembahanne atao méje taoq kurban saq miaq persembahan nike jari suci?

²⁰ Keranaq nike, lamun dengan besumpah demi méje taoq kurban, nike artine ie besumpah demi méje taoq kurban, dait demi selapuq persembahan saq araq léq atasne.

²¹ Dait lamun dengan besumpah demi Gedéng Allah, nike artine ie besumpah demi Gedéng Allah nike, dait demi Allah saq meneng léq derike.

²² Dait lamun dengan besumpah demi sorge, nike artine ie besumpah demi tahte Allah dait demi Allah saq betahte léq derike.

²³ Celake side pade ahli-ahli Taurat dait dengan-dengan Parisi! Side pade dengan-dengan munapik. Reragian misalne selasih, adas manis dait jinten éndah side aturang sepersepulune. Padahal hal-hal saq paling penting léq dalem Hukum Taurat, misalne: Keadilan, belas kasihan, dait kesetiean, nike ndéq side pade perhatiang. Padahal hal-hal nike saq harus side pade laksaneang, dait ndaq lupaqang hal saq lain-lain éndah.

²⁴ Side pade pemimpin-pemimpin saq bute! Kelikit léq dalem aiq inemde side pade saring, padahal onte side pade belet!

²⁵ Celake side pade ahli-ahli Taurat dait dengan-dengan Parisi! Side pade dengan-dengan munapik! Jembung-jembung dait piring-piringde side pade roas bersi-bersi léq bagian luahne, padahal bagian dalemne kotor gati siq hal-hal saq side pade mauq secare pakse dait serakah.

²⁶ Hai dengan Parisi saq bute! Bisoq juluq bersi-bersi bagian dalem jembung piringde, adéq bagian luahne éndah jari bersi!

²⁷ Celake side pade ahli-ahli Taurat dait dengan-dengan Parisi! Side pade dengan-dengan munapik! Side pade maraq kuburan saq tecét putéq; léq luahne penggitan solah, laguq léq dalemne penoq siq tolang dait selapuq saq berek.

²⁸ Maraq nike éndah halne side pade. Side pade solah léq julun dengan; laguq léq dalemne, penoq siq hal-hal saq munapik dait jahat.”

Deside Isa benubuat mengenai hukuman tipaq ahli-ahli Taurat dait dengan-dengan Parisi

²⁹ “Celake side pade ahli-ahli Taurat dait dengan-dengan Parisi! Side pade dengan-dengan munapik! Side pade piaqang nabi-nabi makam saq solah, dait side pade payas tugu dengan-dengan soléh.

³⁰ Dait side pade bebase, ‘Lamun tiang pade araq léq jaman leluhur tiang pade laéq, tiang pade ndéq gen milu kance ie pade nyematéq nabi-nabi.’

³¹ Jari, side pade ngaku mésaq bahwe side pade keturunan dengan-dengan saq nyematéq nabi-nabi!

³² Lamun maraq nike, terusang dait seleséang dose-dose saq sampun temulai siq leluhurde nike!

³³ Side pade jahat! Dait keturunan dengan jahat! Segerah side pade bau nyelametang diriq léman hukuman api nerake?

³⁴ Pade dengahang pacu-pacu: Tiang gen ngutus nabi-nabi tipaq side pade, dengan-dengan bijaksane dait guru-guru; terus separo léman dengan-dengan nike gen side pade matéq, dait separo saq lain gen side pade pakuq léq kayuq salib. Araq éndah saq gen side pade siksaq léq dalem balé-balé ibadah, dait gen side pade aniaye léman sopoq kote ojok kote saq lain.

³⁵ Keranaq nike side pade gen tehukum lantaran side pade nyematéq dengan-dengan saq ndéq salaq – temulai léman Habil saq ndéq salaq, jangke ninggalne Zakaria bije Berekia, saq side pade matéq léq antare Gedéng Allah dait méje taoq kurban.

³⁶ Tiang badaq side: Selapuqne nike gen tetanggung siq dengan-dengan jaman niki!”

Deside Isa periak léq Yerusalem

³⁷ “Yerusalem, Yerusalem! Side matéq nabi-nabi. Utusan-utusan Allah side peléwas siq batu jangke ninggal. Sampun pire kali Tiang mélé ngumpulang selapuq pendudukde, maraq inen manuk saq kekep anak-anakne léq bawaq kelétékne, laguq side ndéq mélé!

³⁸ Pade serioq balénde gen tebilin dait jari sepi.

³⁹ Tiang badaq side: Mulai mangkin side ndéq gen serioq Tiang malik, jangke side bebase, ‘Teberkahin Ie saq rauh dalem peséngan Tuhan.’ ”