MATIUS 2 - KITAB SUCI ZABUR INJIL

Temué-temué léman negeri Timuq

¹ Sesampun Deside Isa tebijeang léq kote Betlehem léq negeri Yudea, léq jaman Raje Herodes, dateng dengan-dengan ahli ilmu bintang léman Timuq ojok Yerusalem.

² Ie pade beketuan léq embé-embé, “Léq mbé Ie, Almasih, raje dengan Yahudi saq baruq tebijeang nike? Tiang pade serioq bintang-Ne tiwoq léq sedi timuq, dait tiang pade dateng jari nyembah Ie.”

³ Sewaktu Raje Herodes pirengang berite nike, ie tinjot gati, maraq nike éndah selapuq dengan léq Yerusalem.

⁴ Make kumpulangne selapuq imam kepale dait ahli-ahli Taurat bangse Yahudi. Terus Raje Herodes beketuan léq ie pade, “Léq mbé Almasih gen tebijeang?”

⁵ Jawab ie pade, “Léq kote Betlehem, léq negeri Yudea. Séngaq maraq niki araq tetulis siq sopoq nabi,

⁶ ‘Hai Betlehem, léq negeri Yehuda, side ndéq saq paling kodéq léq antare ie pade saq mréntah Yehuda. Séngaq léman side gen dateng sopoq pemimpin saq gen mimpin umat Tiang Israel.’ ”

⁷ Sesampun nerimaq penjelasan nike, Herodes secare tedoq-tedoq ngempoh ahli-ahli bintang léman Timuq nike, dait secare teliti gati Herodes beketuan léq ie pade, piran bintang nike mulai penggitan.

⁸ Sesampun nike ie pade tepréntah siq Herodes ojok Betlehem, siq pesen niki, “Lumbar dait selidik pacu-pacu hal-hal mengenai Kanak nike. Lamun side pade sampun bedait kance Ie, sampéang hal nike tipaq tiang, adéq tiang éndah dateng nyembah Ie.”

^9-10 Beterus ie pade lumbar. Ie pade serioq malik bintang saq sampun ie pade serioq sendéqmanne léq sedi timuq. Ie pade cemoh gati serioq bintang nike! Bintang nike terus lampaq senjuluq ie pade, terus ndot tepat léq atas taoq Kanak nike.

¹¹ Ie pade tame ojok dalem balé nike dait serioqne Kanak nike kance Mariam, mamiq bini-Ne. Ie pade sujut nyembah Kanak nike, dait bukaq tangkaq dowéne, terus ngaturang léq Ie, emas, menyan dait mur.

¹² Allah peringet ie pade langan ngimpi adéq ie pade ndéq tulak ojok Herodes. Jari ie pade uléq ojok negerine liwat langan saq lain.

Ngalih ojok Mesir

¹³ Sesampun ahli-ahli bintang nike lumbar, malaékat Tuhan rauh ojok Yusup léq dalem impi. Malaékat nike bemanik, “Herodes beniat boyaq Kanak nike jari nyematéq Ie, keranaq nike becat ures, jauq Kanak nike dait mamiq bini-Ne beterus pelai ojok Mesir. Ndot léq taoq nike jangke Tiang dateng badaq side malik.”

¹⁴ Yusup ures, dait kelem nike juaq ie jauq Kanak nike dait mamiq bini-Ne ngalih ojok Mesir.

¹⁵ Ie pade ndot léq derike jangke Herodes ninggal. Siq care nike telaksane selapuq saq temanikang siq Tuhan langan nabi-Ne, “Tiang ngemanikang Bije Tiang léman Mesir.”

Kanak-kanak kodéq tematéq

¹⁶ Sewaktu Herodes wikan bahwe ie sampun teakalang siq ahli-ahli bintang léman negeri timuq nike, Herodes jari menggah gati. Beterus préntahangne nyematéq selapuq kanak-kanak mame saq beumur léq bawaq due taun saq araq léq Betlehem dait sekiterne. Hal nike sesuai keterangan saq ie terimaq léman ahli-ahli bintang, mengenai piran waktune bintang nike penggitan.

¹⁷ Siq care nike telaksane napi saq sampun tesampéang siq Nabi Yeremia,

¹⁸ “Léq Rama kedengahan suare tangisan, dait suare dengan ngerung éroq aséq. Rahel tangis bije-bijene; ie ndéq mélé tehibur séngaq bije-bijene sampun ndéq araq.”

Tulak léman Mesir

¹⁹ Sesampun Herodes ninggal, sewaktu Yusup masih araq léq Mesir, sopoq malaékat Tuhan rauh malik ojok Yusup léq dalem impi.

²⁰ Malaékat nike bemanik, “Dengan-dengan saq beniat nyematéq Kanak nike sampun ninggal. Keranaq nike ures, jauq Kanak nike dait mamiq bini-Ne tulak ojok Israel.”

²¹ Beterus Yusup ures, dait jauqne Kanak nike kance mamiq bini-Ne tulak ojok wilayah Israel.

²² Laguq sesampun tedengah siq Yusup bahwe Arkelaus, bije Herodes sampun jari raje léq negeri Yudea gentiq bapaqne, Yusup ndéq bani lumbar ojok derike. Sesampun teican petunjuk langan impi, ie lumbar ojok daérah Galilea.

²³ Léq derike ie ndot léq sopoq kote aranne Nazaret. Siq care nike telaksane napi saq tesampéang siq nabi-nabi mengenai Kanak nike: “Ie gen tesebut Dengan Nazaret.”