MATIUS 14 - KITAB SUCI ZABUR INJIL

Yahya Pembaptis tematéq

¹ Léq waktu nike, Herodes saq jari raje wilayah negeri Galilea pireng kabar mengenai Deside Isa.

² Beterus Herodes bebase léq pejabat-pejabatne, “Pasti niki Yahya Pembaptis saq sampun idup malik! Keranaq nike Ie bedowé kuase miaq keajaipan.”

³ Séngaq sendéqman nike Herodes ngutus dengan jari bau Yahya dait sékoq ie terus tetamaqang ojok dalem bui. Hal nike telaksaneang siq Herodes lantaran Herodias sebiniqne Pilipus, sanakne mésaq.

⁴ Séngaq Yahya sampun bebase maraq niki léq Herodes, “Nénten kanggo pelungguh merariq kance Herodias!”

⁵ Setetune Herodes beniat nyematéq Yahya, laguq ie takut léq dengan-dengan, séngaq ie pade anggep Yahya nike nabi.

⁶ Sewaktu Herodes ngerayeang gawé ulang taunne, bije Herodias saq nine ngigel léq julun temué-temué. Igelan kanak nike tetu-tetu nyenengang angen Herodes,

⁷ sehingge Herodes bejanji kadu sumpah léq dedare nike, bahwe napi juaq saq ie tunas, gen teican tipaq ie.

⁸ Lantaran tehasut siq inaqne, dedare nike bebase, “Tiang tunas ulune Yahya Pembaptis adéqne tejauq ojok tiang mangkin niki éndah kadu naré!”

⁹ Sesampun tepirengang siq Herodes napi saq tetunas siq dedare nike, Herodes jari sedih gati. Laguq lantaran ie sampun besumpah léq julun selapuq temuéne, ie préntahang adéq petunasan dedare nike tekabulang.

¹⁰ Herodes suruq dengan lumbar ojok bui jari penggal ulu Yahya.

¹¹ Beterus ulu Yahya nike tejauq tame tangkaq naré, dait serahangne léq dedare nike. Terus jauqne siq dedare nike ojok inaqne.

¹² Sesampun nike, pengiring-pengiring Yahya dateng bait jenazah Yahya dait nguburang ie. Beterus ie pade lumbar dait nyampéang léq Deside Isa mengenai hal nike.

Deside Isa ngicanin bekelor lime iyu dengan

¹³ Sesampun Deside Isa pireng berite nike, Ie taék perau mésaq-mésaq dait bilin taoq nike, terus margi boyaq taoq saq sepi. Laguq sewaktu dengan-dengan dengah mengenai hal nike, ie pade bilin kote-kote ie pade dait nerutuk Deside Isa langan darat.

¹⁴ Sewaktu Deside Isa turun léman perau dait cingakin dengan luwéq nike, Ie periak léq ie pade. Beterus Ie nyelahang dengan-dengan saq sakit léq antare ie pade.

¹⁵ Léq waktu serep jelo, pengiring-pengiring Deside Isa parek dait matur, “Sampun serep jelo, dait taoq niki kesempil. Solahan Pelungguh manikang dengan-dengan nike lumbar, adéqne mauq beli keloran léq dése-dése.”

¹⁶ Laguq manik Deside Isa léq ie pade, “Ndéq perlu dengan luwéq niki lumbar, side pade saq harus ngebéng ie pade bekelor.”

¹⁷ “Tiang pade cume bedowé lime ruti dait due empaq!” basen pengiring-pengiring Deside Isa nike.

¹⁸ “Jauq ojok deriki,” manik Deside Isa.

¹⁹ Beterus manikang-Ne dengan luwéq nike tokol léq atas pupaq. Deside Isa bait lime ruti dait due empaq nike, beterus nengadah andang langit dait ngucap syukur tipaq Allah. Sesampun nike peleng-peleng-Ne ruti nike siq gading-Ne terus icanin-Ne léq pengiring-pengiring-Ne jari tebagi-bagiang léq dengan luwéq nike.

²⁰ Selapuqne bekelor jangke besuh, sesampun nike pengiring-pengiring Deside Isa ngumpulang salone, araq due olas bakaq penoq luwéqne.

²¹ Saq ngelor léq waktu nike araq kire-kire lime iyu dengan mame, ndéqman terékéng dengan nine dait kanak-kanak.

Deside Isa bemargi léq atas aiq

²² Sesampun nike, Deside Isa manikang pengiring-pengiring-Ne taék ojok perau dait juluan mbelat danao, léq waktu nike éndah Ie manikang dengan luwéq nike uléq.

²³ Sesampun dengan luwéq nike lumbar, Deside Isa taék nyendiri bedo'e ojok atas sopoq bukit. Waktu nike sampun peteng, Deside Isa tetep masih araq léq derike mésaq-mésaq.

²⁴ Léq waktu nike, perau saq taoqne taék pengiring-pengiring Deside Isa sampun jaoq léq tengaq-tengaq danao. Perau nike teampes-ampes siq umbak séngaq angin belawan andang kance perau nike.

²⁵ Kire-kire jam telu parek menah, Deside Isa rauh tipaq ie pade, bemargi léq atas aiq.

²⁶ Sewaktu pengiring-pengiring-Ne serioq Ie bemargi léq atas aiq, ie pade tinjot gati dait ie pade bekuih, “Nike hantu!” Séngaq ie pade takut gati.

²⁷ Laguq Deside Isa bemanik léq ie pade, “Tenang! Tiang niki Isa, ndaq takut!”

²⁸ Terus Petrus matur, “Junjungan Saq Mulie, lamun tetu nike Pelungguh, manikang tiang parek lampaq léq atas aiq.”

²⁹ “Silaq dateng,” jawab Deside Isa. Beterus Petrus turun léman perau, lampaq léq atas aiq dait parek ojok Deside Isa.

³⁰ Laguq sewaktu Petrus serioq berembé beléqne angin léq danao nike, ie takut terus mulai ketelep, dait ie bekuih, “Junjungan Saq Mulie, tulung tiang!”

³¹ Deside Isa ngulurang gading-Ne dait negel ie terus bemanik, “Hai, side dengan saq kurang percaye, kembéq side bimbang?”

³² Beterus deduaqne taék ojok perau nike, dait langsung angin nike jari tenang.

³³ Make selapuq pengiring-pengiring saq araq léq perau nike sujut nyembah Deside Isa. Ie pade matur, “Setetune Pelungguh Bije saq asalne léman Allah!”

Deside Isa nyelahang dengan-dengan sakit léq Genesaret

³⁴ Sewaktu ie pade rauh léq itoqan danao, ie pade mendarat léq Genesaret.

³⁵ Dait sewaktu dengan-dengan léq derike serioq bahwe saq rauh nike Deside Isa, ie pade nyiarang kabar nike tipaq selapuq daérah sekiter kote nike. Beterus selapuq dengan sakit tejauq ojok arepan Deside Isa.

³⁶ Dait ie pade tunas léq Deside Isa adéq teijinang kintur jubah-Ne, timaq cume potone. Beterus selapuq saq kintur jubah Deside Isa nike jari selah.