MATIUS 12 - KITAB SUCI ZABUR INJIL

Pengiring-pengiring Deside Isa bau gandum léq jelo Sabat

¹ Léq sopoq jelo, waktu nike jelo Sabat, Deside Isa kance pengiring-pengiring-Ne bemargi léq lendang gandum. Sambil bemargi pengiring-pengiring-Ne pade bau gandum, terus kelorne séngaq ie pade lapah.

² Sewaktu dengan-dengan Parisi serioq hal nike, ie pade matur léq Deside Isa, “Cobaq serioq, pengiring-pengiring Pelungguh ngelanggar Hukum Taurat ite, ie pade ngelaksaneang hal saq ndéq kanggo telaksaneang léq jelo Sabat.”

³ Jawab Deside Isa léq ie pade, “Napi side pade ndéq uwah bace mengenai napi saq telaksaneang siq Daud sewaktu ie dait dengan-dengan saq bareng kance ie lapah?

⁴ Daud tame ojok dalem Gedéng Allah dait kelorang ruti saq sampun teaturang tipaq Allah. Padahal Daud atao dengan-dengan saq ngiring ie ndéq kanggo kelorang ruti nike, kecuali imam-imam.

⁵ Atao napi ndéq uwah side pade bace léq dalem Kitab Suci Taurat bahwe sebilang jelo Sabat, imam-imam saq betugas léq Gedéng Allah ndéq tesalaqang timaq ie ngelanggar aturan jelo Sabat?

⁶ Tiang badaq side: Setetune léq deriki araq saq beléqan léman Gedéng Allah.

⁷ Léq dalem Kitab Suci araq tetulis: Tiang mélé belas kasihan, ndéqne kurban binatang. Lamun side tetu-tetu ngerti maksut Tiang niki, side pade pasti ndéq gen nyalahang dengan-dengan saq ndéq salaq.

⁸ Séngaq, Bije Manusie nike Penguase jelo Sabat.”

Dengan saq imene maté setowéq

⁹ Beterus Deside Isa bilin taoq nike, dait lumbar ojok balé ibadah.

¹⁰ Léq derike araq dengan saq imene maté setowéq. Araq dengan-dengan léq derike saq mélé boyaq-boyaq kesalaqan adéqne bau nyalahang Deside Isa. Ie pade metakén léq Deside Isa, “Kanggo napi nénten nyelahang dengan léq jelo Sabat?”

¹¹ Jawab Deside Isa, “Lamun araq léq antare side pade saq bedowé dombe, dait léq jelo Sabat dombe nike geriq ojok longkak saq dalem; napi épén dombe nike ndéq gen berusahe nyugulang dombe nike léman longkak nike?

¹² Nah, manusie beléqan ajine ketimbang dombe! Jari lamun maraq nike kanggo gawéq hal saq solah léq jelo Sabat!”

¹³ Beterus Deside Isa bemanik léq dengan saq maté setowéq imene nike, “Ulurang imende.” Dengan nike ngulurang imene, beterus imene selah maraq saq setowéq.

¹⁴ Laguq dengan-dengan Parisi bilin balé ibadah, terus ie pade mupakat gen nyematéq Deside Isa.

Deside Isa Almasih utusan Allah

¹⁵ Deside Isa wikan bahwe dengan-dengan Parisi nike bedowé niat jahat léq Ie. Jari Ie lumbar léman taoq nike, dait luwéq dengan ngiring Ie. Beterus Deside Isa nyelahang selapuq dengan saq sakit.

¹⁶ Laguq Deside Isa balaq ie pade betutur mengenai Ie tipaq dengan lain.

¹⁷ Siq care nike telaksane napi saq sampun temanikang siq Allah langan Nabi Yesaya,

¹⁸ “Niki utusan Tiang saq Tiang piléq, Dengan saq Tiang kasihin dait saq nyenengang angen Tiang. Roh Tiang gen Tiang toloq léq Ie, keadilan Tiang gen Ie beriteang tipaq bangse-bangse.

¹⁹ Ie ndéq gen betungkasan atao nyurak, atao pidato léq rurung-rurung beléq.

²⁰ Teréng buloq saq empak ndéq gen Ie polakang, dilah saq gen pedaq ndéq gen Ie pedaqang. Ie gen terus bejuang jangke keadilan telaksaneang;

²¹ selapuq bangse gen beharep léq Ie.”

Deside Isa dait Beelzebul

²² Beterus araq dengan-dengan parek tipaq Deside Isa jauq dengan bute dait pakoq lantaran tekuasein siq sétan. Deside Isa nyelahang dengan nike sehingge ie tao nyerioq dait ngeraos malik.

²³ Selapuq dengan saq nyaksiang peristiwe nike jari bengaq, dait bebase, “Sang Ie niki keturunan Daud?”

²⁴ Sewaktu dengan-dengan Parisi pireng hal nike, terus ie pade nimbal, “Dengan niki cume tao sediq sétan lantaran Beelzebul, datune sétan saq sampun ngebéng Ie kuase nike.”

²⁵ Deside Isa wikan pikiran dengan-dengan Parisi nike, jari manik Deside Isa léq ie pade, “Lamun sopoq negare léq dalemne araq golongan-golongan saq saling bemusuhan, pasti negare nike ndéq bau tahen ngonéq. Dait sebilang kote atao keluarge saq saling bemusuhan sopoq kance saq lain, pasti ndéq gen tahen ngonéq.

²⁶ Maraq nike éndah léq dalem kerajaan Belis; lamun sopoq kelompoq sediq kelompoq saq lain, make kerajaan Belis nike sampun saling bemusuhan dait ndéq gen tahen ngonéq.

²⁷ Side pade bebase bahwe Tiang sediq sétan siq kuase Beelzebul. Lamun maraq nike siq kuase sai pengiring-pengiringde sediq roh jahat? Pengiring-pengiringde mésaq saq buktiang bahwe side pade salaq!

²⁸ Laguq setetune Tiang sediq sétan kadu kuase Roh Allah. Nike artine bahwe Kerajaan Allah sampun rauh léq side.

²⁹ Berembé dengan bau tame ojok dalem balé sopoq dengan saq kuat, jari ngerampas dowéne lamun ie ndéq juluan sékoq dengan saq kuat nike? Sesampun sékoqne, baruq ie bau ngerampas dowé dengan nike.

³⁰ Dengan saq ndéq bepihak léq Tiang, setetune ie ngelawan Tiang. Dait dengan saq ndéq nulung Tiang setetune ie sédaq karye Tiang!

³¹ Keranaq nike Tiang badaq side pade: Lamun dengan gawéq dose atao menghine dengan lain, ie masih bau teampunin! Laguq lamun ie menghine Roh Allah, ie ndéq gen teampunin!

³² Lamun dengan ngucapang sopoq hal ngelawan Bije Manusie, ie bau teampunin, laguq lamun ie menghine Roh Suci, ie ndéq gen teampunin, timaq mangkin atao éraq léq jaman saq mudian!”

Lolo dait buaqne

³³ “Adéq temauq buaq saq solah, lolone harus solah. Lamun lolone ndéq solah buaqne éndah ndéq gen solah. Jari, solah atao ndéq lolone nike bau tetaoq léman buaqne.

³⁴ Side dengan jahat, berembé side bau ngucapang hal-hal saq solah lamun side jahat? Séngaq napi saq teucapang léq biwih tetentuang siq isi aténe!

³⁵ Hal-hal saq solah sugul léman dengan saq solah séngaq ie penoq siq hal-hal saq solah. Laguq hal-hal saq jahat sugul léman dengan saq jahat séngaq ie penoq siq hal-hal saq jahat.

³⁶ Laguq Tiang badaq side: Léq jelo Penghakiman éraq, sebilang dengan harus betanggung jawab léq ucapan-ucapanne saq ndéq araq manpaatne.

³⁷ Séngaq setetune, napi-napi saq sampun teucapang gen tekadu jari nentuang side salaq atao ndéq.”

Tande Nabi Yunus

³⁸ Beterus ahli-ahli Taurat dait dengan-dengan Parisi matur léq Deside Isa, “Paq Guru, tiang pade melét serioq sopoq tande léman Pelungguh.”

³⁹ Laguq jawab Deside Isa, “Jahat gati dait durhake dengan-dengan léq jaman niki! Side pade mélé serioq Tiang miaq tande? Tipaq side pade ndéq gen teicanin sopoq juaq tande kecuali tande Nabi Yunus.

⁴⁰ Séngaq pade maraq Nabi Yunus ndot léq dalem tian empaq saq beléq telu jelo telu kelem ngonéqne. Maraq nike éndah Bije Manusie gen ndot léq dalem tian gumi telu jelo telu kelem.

⁴¹ Léq jelo Penghakiman, penduduk kote Niniwe gen teidupang bareng kance dengan-dengan jaman niki, dait nuduh ie pade. Séngaq dengan-dengan Niniwe nike betobat léman dose-dosene sesampun ie pade dengah hotbah Nabi Yunus. Laguq mangkin léq deriki setetune araq saq beléqan léman Nabi Yunus!

⁴² Léq jelo Penghakiman, ratu léman negeri Lauq gen teidupang bareng kance dengan-dengan jaman niki, dait nuduh ie pade. Séngaq jari dengahang pengajahan Nabi Sulaiman saq bijaksane, ratu nike dateng léman poton gumi. Laguq mangkin léq deriki setetune araq saq beléqan léman Nabi Sulaiman!”

Tulakne roh jahat

⁴³ “Lamun roh jahat sampun sugul léman manusie, roh nike begelining ojok taoq-taoq saq gero jari boyaq taoq mentelah, laguq ie ndéq mauq.

⁴⁴ Keranaq nike ie gen muni, ‘Tiang gen tulak ojok balé saq sampun tiang bilin.’ Waktu ie dateng léq derike, daitne balé nike sampun kosong, bersi dait teratur.

⁴⁵ Beterus ie lalo dait jauq pituq roh lain saq jahatan léman ie. Terus ie pade tame ojok dalem dengan nike dait ndot léq derike. Dait ahirne keadaan dengan nike jari lengéan léman saq mule. Hal saq maraq nike éndah gen telaksane tipaq dengan-dengan jahat jaman niki.”

Mamiq bini dait sanak-sanak Deside Isa

⁴⁶ Léq waktu Deside Isa masih bebaos kance dengan luwéq nike, sanak-sanak kance mamiq bini Deside Isa dateng. Ie pade nganjeng léq luah sambil berusahe adéqne bau bebaos kance Deside Isa.

⁴⁷ Sopoq léq antare dengan luwéq nike matur léq Deside Isa, “Silaq cingakin mamiq bini dait sanak-sanak Pelungguh araq léq luah, ie pade gen bebaos kance Pelungguh.”

⁴⁸ Laguq jawab Deside Isa, “Sai mamiq bini Tiang? Sai sanak-sanak Tiang?”

⁴⁹ Beterus Deside Isa nijoqang pengiring-pengiring-Ne dait bemanik, “Niki inaq dait semeton Tiang.

⁵⁰ Dengan-dengan saq ngelaksaneang pekayunan Bapa Tiang saq léq sorge ie saq jari semeton mame dait semeton nine serte inaq Tiang.”