MATIUS 11 - KITAB SUCI ZABUR INJIL

Utusan Yahya Pembaptis

¹ Sesampun Deside Isa ngican petunjuk-petunjuk tipaq kedue olas pengiring-Ne, Ie bilin taoq nike. Ie lumbar ngajahang dait nyampéang Kabar Solah léq kote-kote saq rapet léman derike.

² Yahya Pembaptis saq waktu nike kenyeke araq léq bui pireng kabar mengenai karye Almasih. Beterus utusne pengiring-pengiringne lumbar metakén tipaq Deside Isa,

³ “Napi Pelungguh dengan saq gen rauh menurut janji Allah, atao tiang pade harus ngantih dengan saq lainan?”

⁴ Jawab Deside Isa, “Tulak tipaq Yahya dait badaq napi saq sampun side pade dengah dait serioq:

⁵ Dengan bute tao nyerioq, dengan képaq tao lampaq, dengan kuste teselahang, dengan kedok tao dengah, dengan ninggal teidupang malik dait Kabar Solah léman Allah tesampéang ojok dengan-dengan miskin.

⁶ Bahagie dengan saq ndéq ragu-ragu léq Tiang!”

⁷ Sesampun utusan-utusan Yahya nike lumbar, Deside Isa mulai bebaos léq dengan luwéq mengenai Yahya, manik-Ne, “Side pade lumbar ojok padang gurun jari serioq napi? Teréng buloq saq tetiup siq angin?

⁸ Atao side pade lumbar jari serioq napi? Dengan saq bekelambi solah? Dengan-dengan saq bekelambi solah ndot léq istane!

⁹ Jari, kembéq side pade lumbar? Jari serioq nabi? Tetu, malahan ie lebih léman nabi.

¹⁰ Séngaq Yahya nike saq temaksut léq dalem ayat Kitab Suci niki: ‘Serioq, Tiang suruq utusan Tiang, juluan léman Deside, ie gen nyiepang Deside langan.’

¹¹ Tiang badaq side: Setetune léq antare ie pade saq tebijeang siq dengan nine ndéq uwah araq sopoq dengan saq beléqan léman Yahya Pembaptis, laguq saq paling kodéq léq dalem Kerajaan Sorge beléqan léman Yahya.

¹² Mulai léman Yahya dateng jangke mangkin niki, Kerajaan Sorge tetentang siq dengan-dengan saq berusahe nguasein siq care kekerasan.

¹³ Jangke waktune Yahya nike dateng, selapuq Hukum Taurat dait kitab nabi-nabi benubuat mengenai hal-hal saq harus telaksane.

¹⁴ Dait lamun side pade mélé percaye, Yahya nike Elia saq sampun tenubuatang kedatenganne.

¹⁵ Sai bedowé kentok, harus ie dengahang!

¹⁶ Siq napi harus Tiang bandingang dengan-dengan léq jaman niki? Ie pade maraq kanak-kanak saq tokol-tokol léq peken. Sopoq kelompoq bekuih tipaq kelompoq saq lain,

¹⁷ ‘Tiang pade nyanyiang side pade lagu gembire, laguq side pade ndéq mélé ngigel! Tiang pade nyanyiang lagu sedih, dait side pade ndéq mélé nangis!’

¹⁸ Lantaran Yahya dateng – ie puase dait ndéq nginem anggur; dait dengan-dengan bebase, ‘ie tekuasein siq sétan.’

¹⁹ Mangkin Bije Manusie, rauh – Ie medaran dait nginem; beterus dengan-dengan bebase, ‘Serioq dengan nike! Melak, tukang bowos, batur penagih pajek dait batur dengan-dengan bedose.’ Laguq kebijaksanean Allah terbukti kenaq langan perbuatan-perbuatanne.”

Kote-kote saq ndéq percaye

²⁰ Beterus Deside Isa mulai ngewade kote-kote, timaq léq derike Ie paling luwéq miaq muqjizat. Séngaq dengan-dengan léq kote-kote nike ndéq mélé betobat léman dose-dose ie pade.

²¹ “Celake side kote Korazim! Dait celake éndah side kote Betsaida! Seandéne muqjizat-muqjizat saq tepiaq léq taoqde nike sampun tepiaq léq Tirus dait Sidon, pasti dengan-dengan léq derike sampun ngonéq betobat léman dose-dosene dait ngengadu kelambi dukecite dait toloq awu-awu léq atas ulune.

²² Tiang badaq side, léq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade!

²³ Dait side, Kapernaum! Napi side gen teatasang jangke ojok langit? Ndéq! Malahan side gen tetetéh ojok dunie dengan maté! Séngaq seandéne muqjizat-muqjizat saq tepiaq léq tengaq-tengaq side sampun telaksane léq Sodom, Sodom nike masih araq jangke mangkin!

²⁴ Keranaq nike Tiang badaq side, léq jelo Penghakiman, dengan Sodom gen molahan teampunin siq Allah ketimbang side pade!”

Dateng ojok Tiang

²⁵ Léq waktu nike Deside Isa bedo'e, “Bapa, Tuhan saq nguasein langit dait gumi! Tiang besyukur tipaq Deside séngaq selapuqne nike Deside rahasieang léman dengan-dengan saq bijaksane dait bedowé ilmu. Laguq Deside nyatayang tipaq dengan-dengan saq biase-biase.

²⁶ Hal nike saq nyenengang Deside.”

²⁷ Beterus Deside Isa bemanik, “Selapuqne sampun teserahang léq Tiang siq Bapa. Ndéq araq sopoq dengan juaq saq kenal Bije, selain Bapa. Ndéq araq éndah saq kenal Bapa selain Bije, dait dengan-dengan tipaq sai Bije nike ngenalang Bapa.

²⁸ Silaq dateng ojok Tiang selapuqde saq lelah dait saq bedowé bandean berat; Tiang gen béng kelepasan tipaq side.

²⁹ Pade turut selapuq préntah Tiang, dait berajah léman Tiang. Séngaq Tiang niki lemah lembut dait rendah até, make jiwende gen mauq ketenangan.

³⁰ Séngaq préntah-préntah Tiang nike miaq seneng dait bandean Tiang nike éndah déang.”