MATIUS 10 - KITAB SUCI ZABUR INJIL

Deside Isa piléq due olas rasul

¹ Léq sopoq jelo, Deside Isa ngemanikang kedue olas pengiring-Ne bekumpul. Beterus Deside Isa ngicanin kuase tipaq ie pade jari sediq roh-roh jahat dait nyelahang segale macem penyakit dait segale macem awak saq cacat.

² Aran kedue olas rasul nike: Penembéq Simon (saq tesebut Petrus) dait Andreas semetonne, terus Yakub dait Yahya semetonne, ie pade bije-bije Zebedeus.

³ Beterus Pilipus dait Bartolomeus, Tomas dait Matius penagih pajek nike, Yakub bije Alpeus, dait Tadeus;

⁴ dait saq penutuq Simon dengan Zelot dait Yudas Iskariot saq behianat léq Deside Isa.

Deside Isa ngutus due olas pengiring-Ne

⁵ Kedue olas rasul nike teutus siq Deside Isa, dait ie pade tepesen: “Ndaq lumbar ojok daérah dengan bangse-bangse lain atao ojok kote-kote dengan Samaria.

⁶ Laguq lumbar ojok dengan-dengan Israel, terutame tipaq dengan-dengan saq sesat.

⁷ Sampéang léq ie pade bahwe Kerajaan Sorge sampun rapet.

⁸ Selahang dengan-dengan saq sakit; idupang dengan-dengan saq ninggal; selahang dengan-dengan saq sakit kuste, sediq sétan-sétan. Side pade sampun nerimaq selapuqne nike secare cume-cume. Jari, béng éndah secare cume-cume.

⁹ Ndaq jauq képéng emas, képéng perak atao képéng tembage.

¹⁰ Ndaq éndah jauq takaq sangu atao due lembar kelambi léq kelampande, atao sepatu atao jauq tunjang. Séngaq dengan saq begawéan berhak nerimaq upaqne.

¹¹ Lamun side pade tame ojok kote atao kampung, boyaq dengan saq mélé nerimaq side. Ndot kance ie jangke side pade berangkat malik.

¹² Sewaktu side pade tame ojok sopoq balé, ucapang salam tipaq ie pade.

¹³ Lamun dengan-dengan léq balé nike nerimaq side pade, alurang salam side nike tetep léq ie pade. Laguq lamun ie pade ndéq mélé nerimaq side pade, bait malik salamde nike.

¹⁴ Lamun araq balé atao kote saq ndéq mélé nerimaq side pade atao ndéq mélé dengah side pade, bilin taoq nike, dait kerapang kerepuk léman naénde.

¹⁵ Tiang badaq side: Léq jelo Penghakiman dengan-dengan kote Sodom dait Gomora gen molahan teampunin siq Allah ketimbang dengan-dengan léq kote nike!”

Gen araq penganiayean

¹⁶ “Perhatiang niki: Tiang ngutus side pade maraq dombe ojok tengaq-tengaq serigale, keranaq nike side pade harus ceket maraq ulah dait tulus maraq kedit dare.

¹⁷ Laguq tetep waspade léq selapuq dengan, séngaq araq saq gen nyerahang side pade ojok mahkamah agame, dait side pade gen tepecut léq balé-balé ibadah.

¹⁸ Side pade gen tejauq ojok arepan penguase-penguase dait raje-raje séngaq side pade jari pengiring Tiang. Nike jari kesempatan side pade ngebéng kesaksian mengenai Tiang léq ie pade dait dengan-dengan saq ndéq kenal Allah.

¹⁹ Laguq lamun side pade tejauq jari teadilin, ndaq kuatir mengenai napi saq harus side pade sampéang, atao berembé entane side pade harus ngeraos. Séngaq léq waktu nike éndah side pade gen tebadaq napi saq harus side pade sampeang.

²⁰ Séngaq saq bebaos léq waktu nike ndéqne side pade laguq Roh Bapa side saq araq léq dalem diriqde.

²¹ Gen araq dengan saq nyerahang semetonne mésaq jari tematéq. Dait hal nike gen telaksane éndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematéq.

²² Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang.

²³ Lamun side pade teaniaye léq sopoq kote, pelai ojok kote saq lain. Tiang badaq side pade: Sendéqman side pade tutuq datengin selapuq kote-kote Israel, Bije Manusie sampun rauh.

²⁴ Sopoq murit ndéqne beléqan léman gurune, atao sopoq hambe ndéqne beléqan léman majikanne.

²⁵ Lamun murit sampun jari maraq gurune, nike sampun cukup, dait sopoq hambe sampun pade maraq majikanne. Lamun kepale keluarge sampun tesebut Beelzebul, lebihan malik selapuq dengan saq araq léq baléne. Ie pade gen tesebut saq lengéan malik!”

Takut tipaq Allah

²⁶ “Ndaq takut léq manusie. Ndéq araq saq teseboq, saq ndéq gen penggitan, dait ndéq araq saq terahasieang saq ndéq gen tebungkar.

²⁷ Napi saq Tiang sampéang tipaq side léq taoq saq peteng, harus side pade sampéang malik léq taoq saq menah. Dait napi saq tepéséqang léq kentokde, umumang hal nike beléq-beléq!

²⁸ Ndaq takut léq ie pade saq bau nyematéq awak, laguq ndéq bekuase nyematéq jiwe. Takut tipaq Allah saq bekuase binaseang awak dait jiwe léq dalem api nerake.

²⁹ Due kedit perit tejual ajine siq sopoq képéng saq paling kodéq. Timaqne maraq nike ndéq araq sopoq juaq saq geriq ojok tanaq lamun ndéq tekayunang siq Bapa léq sorge.

³⁰ Luwéqne bulu léq ulunde éndah sampun terékéng selapuqne siq Allah.

³¹ Keranaq nike, ndaq takut! Side pade jaoq beléqan ajine tebanding kedit-kedit perit nike!”

Ngaku jari pengiring Deside Isa léq julun dengan luwéq

³² “Sai-sai saq ngakuq léq julun dengan luwéq bahwe ie pengiring Tiang, Tiang éndah gen ngakuq ie léq arepan Bapa Tiang léq sorge.

³³ Laguq sai-sai saq nilas léq julun dengan luwéq bahwe ie pengiring Tiang, Tiang éndah gen tilas ie léq arepan Bapa Tiang léq sorge.”

Ndéqne perdaméan, laguq perlawanan

³⁴ “Ndaq paran bahwe Tiang jauq perdaméan ojok dunie niki. Tiang ndéq jauq perdaméan laguq perlawanan.

³⁵ Tiang dateng jari penyebap kanak mame ngelawan bapaqne, kanak nine ngelawan inaqne, dait menantu saq nine ngelawan mentoaqne saq nine.

³⁶ Anggote keluarge mésaq gen jari musuhne.

³⁷ Dengan saq beléqan kasihne tipaq amaqne atao inaqne ketimbang tipaq Tiang, ndéqne patut jari pengiring Tiang. Maraq nike éndah dengan saq ngasihin bijene saq nine atao bijene saq mame lebihan léman Tiang.

³⁸ Dengan saq ndéq mélé ngelémbah salibne dait ngiring Tiang ndéq patut jari pengiring Tiang.

³⁹ Dengan saq pertahenang nyawene, ie gen kélangan nyawene, laguq dengan saq kélangan nyawene lantaran setie léq Tiang, gen mauq idupne.”

Upaq perbuatan saq solah

⁴⁰ “Dengan saq nerimaq side pade, nerimaq Tiang éndah. Dait dengan saq nerimaq Tiang, nerimaq Ie saq ngutus Tiang.

⁴¹ Dengan saq nerimaq nabi lantaran ie nabi, gen nerimaq upaq nabi. Dait sai saq nerimaq sopoq dengan saq solah lantaran ie solah gen nerimaq upaq saq solah.

⁴² Sai-sai saq ngebéng nginem, timaq cume aiq nyet doang tipaq salaq sopoq léman dengan-dengan hine niki, lantaran ie pengiring Tiang, percaye bahwe ie pasti gen nerimaq upaqne!”