LUKAS 5 - KITAB SUCI ZABUR INJIL

Deside Isa piléq pengiring-pengiring-Ne saq penembéq

¹ Léq sopoq waktu, Deside Isa nganjeng léq sedin Danao Genesaret. Luwéq dengan bedesek-desekan jari dengahang Manik Allah.

² Deside Isa cingakin due perau léq sedin danao nike; nelayan-nelayanne sampun turun léman perau-perau nike dait ie pade kenyeke bisoq jaringne.

³ Deside Isa taék ojok salaq sopoq perau, perau nike peraune Simon, beterus Ie manikang Simon dorong peraune nike jaoqan sekediq léman sedin danao. Deside Isa melinggih léq dalem perau nike dait mulai ngajahang dengan luwéq.

⁴ Sesampun tutuq ngajahang, Deside Isa bemanik léq Simon, “Silaq dayung peraunde ojok taoq saq dalem, terus pencar jaringde jari bau empaq.”

⁵ Simon matur, “Guru, sekeleman tiang pade lelah begawéan, laguq ndéq mauq napi-napi! Laguq lantaran Pelungguh saq manikang, tiang gen pencar jaring tiang malik.”

⁶ Sesampun ie pade laksaneang hal nike, ie pade luwéq gati mauq empaq jangke jaring ie pade mulai roék.

⁷ Keranaq nike ie pade ngéndéng tulung léq batur-batur ie pade saq araq léq perau saq lain. Batur-baturne nike pade dateng beterus ie pade bareng-bareng ngisiq kedue perau nike penoq siq empaq, jangke perau-perau nike jaqne ketelep.

⁸ Waktu Simon serioq hal nike, ie sujut léq arepan Deside Isa terus matur, “Silaq bilin tiang, Junjungan Saq Mulie! Séngaq tiang dengan bedose!”

⁹ Simon dait selapuq dengan saq bareng kance ie bengaq lantaran luwéq gati ie pade mauq empaq.

¹⁰ Maraq nike éndah batur-baturne Simon, Yakub dait Yahya, bije-bije Zebedeus. Deside Isa bemanik léq Simon, “Ndaq takut! Mulai mangkin side gen jaring manusie.”

¹¹ Simon dait batur-baturne kedeng perau-perau nike ojok sedin danao, beterus bilin selapuqne, terus ngiring Deside Isa.

Deside Isa nyelahang dengan saq sakit kuste

¹² Léq sopoq jelo, Deside Isa araq léq sopoq kote. Léq derike araq sopoq dengan mame saq awakne penoq siq penyakit kuste. Sewaktu ie serioq Deside Isa, ie sujut léq arepan-Ne sambil tunas, “Paq, lamun Pelungguh kayun, Pelungguh bau nyelahang tiang!”

¹³ Deside Isa jamah dengan nike dait bemanik, “Tiang mélé, mangkin side selah!” Waktu nike éndah penyakitne telang.

¹⁴ Beterus Deside Isa balaq dengan nike tuturang léq sai-sai, dait bemanik-Ne, “Silaq lumbar ojok imam, dait tunas ie pastiang bahwe side sampun selah. Beterus lumbar ngaturang kurban maraq saq tepréntahang Musa, jari bukti tipaq dengan-dengan bahwe side tetu-tetu sampun selah.”

¹⁵ Laguq kabar mengenai Deside Isa sayan nyebar ojok mbé-mbé, dait luwéq dengan dateng jari dengahang Ie dait tunas adéq teselahang penyakit-penyakitne.

¹⁶ Laguq Deside Isa lumbar jari bedo'e ojok taoq saq sepi.

Deside Isa nyelahang sopoq dengan képaq

¹⁷ Léq sopoq jelo sewaktu Deside Isa kenyeke ngajahang, araq dengan-dengan Parisi dait ahli-ahli Taurat melinggih léq derike. Ie pade dateng léman Yerusalem, dait léman kote-kote léq Galilea dait Yudea. Kuase Tuhan araq léq Deside Isa sehingge Ie tao nyelahang dengan-dengan sakit.

¹⁸ Léq waktu nike araq pire dengan dateng jauq sopoq dengan képaq saq tetindoqang léq atas tipah. Ie pade berusahe jauq dengan nike ojok dalem balé adéqne bau toloq ie léq arepan Deside Isa.

¹⁹ Laguq lantaran luwéq gati dengan léq derike, ie pade ndéq bau jauq ie tame. Keranaq nike ie pade taékang dengan képaq nike ojok atas atep balé. Beterus ie pade bungkar atep, dait nurunang ie bareng-bareng kance tipahne léq arepan Deside Isa léq tengaq-tengaq dengan luwéq nike.

²⁰ Waktu Deside Isa cingakin beléq gati iman ie pade, Deside Isa bemanik léq dengan nike, “Semeton, dosende sampun teampunin.”

²¹ Ahli-ahli Taurat dait dengan-dengan Parisi mulai beketuan léq dalem angenne, “Sai dengan niki? Ie menghine Allah? Sai saq bau ngampunin dose selain Allah?”

²² Deside Isa wikan saq ie pade ketuanang. Jari Deside Isa bemanik, “Kembéq side pade beketuan-tuan maraq nike léq dalem angende?

²³ Mbé saq molahan, ngucapang, ‘Dosende sampun teampunin’, atao ngucapang, ‘Ures dait lampaq?’

²⁴ Laguq adéq side pade nenaoq bahwe léq dunie niki Bije Manusie bekuase ngampunin dose.” Beterus Deside Isa bemanik léq dengan saq képaq nike, “Ures, angkat tipahde, dait uléq!”

²⁵ Dengan nike langsung ures léq julu ie pade selapuq, terus ngangkat tipahne dait uléq sambil mulieang Allah.

²⁶ Ie pade selapuq takjub gati terus mulieang Allah. Dait siq perasaan takut, ie pade bebase, “Ajaip gati peristiwe saq ite saksiang jelo niki!”

Deside Isa ngemanikang Lewi

²⁷ Sesampun nike Deside Isa sugul dait cingakin sopoq dengan penagih pajek, aranne Lewi, kenyeke tokol léq taoqne begawéan. Deside Isa bemanik léq ie, “Silaq turut Tiang.”

²⁸ Beterus Lewi nganjeng dait bilin selapuqne, terus ngiring Deside Isa.

²⁹ Sesampun nike Lewi ngaraqang gawé léq gedéngne umaq Deside Isa. Luwéq penagih pajek dait dengan-dengan lain milu medaran bareng-bareng kance ie pade.

³⁰ Dengan-dengan Parisi dait ahli-ahli Taurat ndéq seneng, terus bebase léq pengiring-pengiring Deside Isa, “Kembéq side selapuq medaran dait nginem kance penagih pajek dait dengan-dengan bedose?”

³¹ Jawab Deside Isa tipaq ie pade, “Dengan saq séhat ndéq merluang tabib; cume dengan saq sakit doang.

³² Tiang dateng ndéqne jari ngempoh dengan-dengan saq nganggep diriqne sampun kenaq, laguq dengan-dengan saq bedose adéq ie pade betobat léman dose-dose ie pade.”

Hal puase

³³ Dengan-dengan Parisi nike matur éndah léq Deside Isa, “Pengiring Yahya dait pengiring dengan Parisi rimpes puase dait bedo'e. Laguq pengiring-pengiring Pelungguh bekelor dait nginem.”

³⁴ Jawab Deside Isa léq ie pade, “Segerah side pade suruq temué-temué pade puase léq gawé ngawinang lamun pengantén mame masih araq bareng-bareng kance ie pade? Pasti ndéq!

³⁵ Laguq gen dateng waktune pengantén mame nike tebait léman ie pade. Léq waktu nike baruq ie pade gen puase.”

³⁶ Beterus Deside Isa nyeriteang tipaq ie pade perumpamean niki, “Ndéq araq dengan saq nampel kelambi lotoh kadu bakal saq tebait léman kelambi saq masih baru. Séngaq lamun maraq nike entane, kelambi saq masih baru nike gen roék. Dait bakal saq tekadu nampel nike éndah ndéqne cocok kance kelambi saq lotoh.

³⁷ Maraq nike éndah ndéq araq dengan saq ngisiq aiq anggur saq baru léq dalem kantong léndong saq lebung, séngaq aiq anggur baru nike gen miaq kantong nike bedah. Make anggurne tumpah dait kantongne séde.

³⁸ Anggur saq baru harus teisiq léq dalem kantong saq baru éndah.

³⁹ Maraq nike éndah ndéq araq sopoq dengan juaq saq mélé nginem anggur baru sesampun nginem anggur saq let, séngaq basen ie pade, ‘Anggur saq let nike maiqan.’ ”