LUKAS 21 - KITAB SUCI ZABUR INJIL

Persembahan sopoq bebalu miskin

¹ Léq Gedéng Allah, Deside Isa cingakin dengan-dengan sugih tamaq képéng ojok dalem kotaq persembahan.

² Ie cingakin éndah sopoq bebalu saq miskin gati, tamaq due képéng tembage.

³ Beterus Deside Isa bemanik, “Tiang badaq side: Setetune bebalu niki namaqang luwéqan tebanding selapuq dengan saq lain.

⁴ Séngaq ie pade selapuq ngebéng léman kelebihan dowéne. Laguq bebalu niki, timaq miskin gati, ie ngebéng selapuq saq araq léq ie, malahan saq ie perluang jari biaye idup.”

Deside Isa bebaos mengenai Gedéng Allah gen terobohang

⁵ Araq dengan-dengan saq ngeraos mengenai berembé solahne Gedéng Allah tepayas siq batu saq solah-solah dait siq barang-barang saq teaturang tipaq Allah. Beterus Deside Isa bemanik léq ie pade,

⁶ “Laun araq waktune, selapuq saq side pade serioq niki gen terobohang; ndéq araq sopoq juaq batu léman bangunan-bangunan nike saq masih beronjoq maraq béngan!”

Kesusahan dait penganiayean

⁷ Pengiring-pengiring Deside Isa metakén léq Deside Isa, “Bapaq Guru, piran selapuqne nike gen telaksane? Dait napi saq jari tandene bahwe sampun dateng wayene hal nike gen telaksane?”

⁸ Deside Isa bemanik, “Pade waspade, ndaq jangke side pade tetipu. Luwéq dengan gen dateng kadu aran Tiang, dait bebase, ‘Tiang niki Ie!’ dait ‘Sampun wayene.’ Laguq ndaq side pade turut ie pade.

⁹ Ndaq éndah takut lamun side pade dengah berite mengenai perang dait pemberontakan. Selapuqne nike harus telaksane juluq. Laguq nike ndéq berarti bahwe sampun wayene kiamat.”

¹⁰ Beterus Deside Isa bebaos malik, “Bangse saq sopoq gen perang ngelawan bangse saq lain dait negare saq sopoq gen nyerbu negare saq lain.

¹¹ Léq mbé-mbé gen araq lindur saq beléq, kelapahan dait wabah penyakit. Gen araq hal-hal saq nakutang dait luar biase léq langit.

¹² Laguq sendéqman selapuqne telaksane, side pade gen tebau dait teaniaye. Side pade gen teadilin léq balé-balé ibadah dait tetamaq ojok dalem bui. Dait side pade gen teoros ojok arepan raje-raje dait penguase-penguase lantaran side pade pengiring Tiang.

¹³ Nike kesempatande ngebéng kesaksian.

¹⁴ Keranaq nike teguqang angende bahwe side pade ndéq gen kuatir mengenai napi saq harus side pade sampéang jari béle diriq.

¹⁵ Tiang mésaq gen ngebéng side kemampuan ngeraos secare bijaksane, sehingge ndéq araq sopoq dengan juaq léman musuh-musuhde bau ngelawan atao nilas raosde.

¹⁶ Side pade gen tehianat siq inaq amaqde, siq semeton-semetonde, siq kadang jarinde dait siq batur-baturde. Separo léman side pade gen tematéq siq ie pade.

¹⁷ Side pade gen temeriq siq selapuq dengan lantaran side pade jari pengiring Tiang.

¹⁸ Laguq timaq seuwat bulu saq araq léq ulunde ndéq gen telang.

¹⁹ Lamun side pade tetep tahen dait sabar, side pade gen selamet.”

Deside Isa bebaos mengenai keancuran Yerusalem

²⁰ “Lamun side pade serioq Yerusalem tekepung siq tentere, side pade gen nenaoq bahwe kote nike ndéq ngonéq malik gen temusnahang.

²¹ Léq waktu nike dengan saq araq léq Yudea harus pelai ojok pegunungan. Ie pade saq araq léq dalem kote harus bilin kote, dait ie pade saq léq luah kote, ndaq tame ojok dalem kote.

²² Séngaq jelo-jelo nike ‘Jelo-jelo Pembalesan’, adéq siq care nike telaksane napi saq sampun tetulis dalem Kitab Suci.

²³ Celake inaq-inaq saq kenyeke betian atao saq masih penyusuq bebéaqne léq waktu nike! Negeri niki gen ngalamin kesusahan saq beléq, dait murke tipaq bangse niki.

²⁴ Araq saq gen tematéq kadu kléwang, araq éndah saq gen tejauq jari tawanan ojok negeri-negeri dengan; dait bangse-bangse saq ndéq kenal kance Allah gen ngicaq-icaq Yerusalem jangke tutuq waktu saq sampun tetentuang Tuhan tipaq ie pade.”

Kerauhan Bije Manusie

²⁵ “Laun gen penggitan tande-tande léq jelo, bulan, dait bintang-bintang. Léq gumi bangse-bangse gen takut dait bingung hadepin suare angin dait suare umbak saq beléq.

²⁶ Manusie gen takut gati hadepin napi saq gen telaksane léq seantéro dunie niki, séngaq selapuq kuase saq araq léq langit jari biur lantur.

²⁷ Léq waktu nike Bije Manusie gen rauh léq dalem awan siq kuase dait kemuliean saq beléq.

²⁸ Lamun hal-hal nike mulai telaksane, pade ures dait petitoqang muende, séngaq ndéq ngonéq malik side pade gen teselametang.”

Perajahan léman lolo are

²⁹ Beterus Deside Isa nyeriteang tipaq ie pade perumpamean niki, manik-Ne, “Pade perhatiang lolo are dait selapuq lolo saq lain.

³⁰ Lamun pusuk-pusukne mulai penggitan, side pade nenaoq bahwe sampun rapet musim panas.

³¹ Maraq nike éndah lamun side pade serioq hal-hal nike telaksane, side pade gen nenaoq bahwe Kerajaan Allah sampun rapet.

³² Tiang badaq side: Setetune hal-hal nike gen telaksane sendéqman dengan-dengan saq idup mangkin niki ninggal selapuqne.

³³ Langit dait gumi gen musnah, laguq manik Tiang gen kekel selaéq-laéqne.”

Perlu bejage-jage

³⁴ “Pade jagaq diriqde, ndaq jangke side pade répot gati siq beseneng-seneng jangke liwat bates dait nginem ineman keras, atao mikirang gati soal-soal idupde, sehingge side pade ndéq siep sewaktu jelo Tuhan nike selung-selung dateng.

³⁵ Séngaq Jelo nike gen dateng maraq perangkep tipaq selapuq dengan léq gumi niki.

³⁶ Pade bejage-jage dait tetep bedo'e adéq side pade luput léman selapuq hal saq gen telaksane dait side pade bau ngadep Bije Manusie.”

³⁷ Deside Isa ngajahang léq Gedéng Allah waktu kenjelo, dait kelemne Ie lumbar ojok Bukit Zaitun dait mererepan léq derike.

³⁸ Sebilang kelémaq selapuq dengan dateng ojok Gedéng Allah jari dengahang pengajahan Deside Isa.