LUKAS 19 - KITAB SUCI ZABUR INJIL

Zakeus

¹ Sewaktu Deside Isa tame kote Yeriko, Ie bemargi liwatin kote nike.

² Léq kote nike araq sopoq kepale penagih pajek saq sugih. Aranne Zakeus.

³ Zakeus melét serioq sai Deside Isa nike, laguq lantaran luwéq gati dengan dait awakne céndéq, make ie ndéq mauq serioq Deside Isa.

⁴ Jari, Zakeus pelai senjuluq dengan-dengan, terus ie taék léq sopoq lolo kayuq, adéqne mauq serioq Deside Isa saq karing semendaq gen liwat léq derike.

⁵ Waktu Deside Isa rauh léq bawaq lolo kayuq nike, Deside Isa cingakin andang atas dait bemanik, “Zakeus, becat turun! Séngaq jelo niki Tiang harus madéq léq balénde.”

⁶ Zakeus becat-becat turun dait sambut Deside Isa siq cemohne.

⁷ Selapuq dengan saq serioq hal nike mulai ngerumun, ie pade bebase, “Ie madéq léq balén dengan bedose!”

⁸ Sesampun léq baléne, Zakeus nganjeng dait matur léq Deside Isa, “Junjungan Saq Mulie, separo léman dowén tiang gen tiang béng ojok dengan miskin; dait napi-napi saq sampun tiang bait léman dengan secare ndéq jujur, gen tiang tulakang malik léq ie empat kali lipet!”

⁹ Deside Isa bemanik léq Zakeus, “Léq jelo niki keselametan sampun rauh léq keluarge niki, séngaq ie éndah keturunan Ibrahim.

¹⁰ Bije Manusie rauh jari boyaq dait nyelametang dengan saq sesat.”

Perumpamean képéng emas

¹¹ Léq waktu dengan-dengan masih dengahang Deside Isa bebaos, Deside Isa nyeriteang sopoq perumpamean. Séngaq, léq waktu nike Deside Isa kenyeke araq léq dékét Yerusalem, dait ie pade paran bahwe Kerajaan Allah gen becat penggitan.

¹² Deside Isa bemanik, “Araq sopoq dengan ménak lumbar ojok negeri saq jaoq gen telantik jari raje, beterus tulak.

¹³ Sendéqman lumbar, ie ngempoh sepulu pelayanne, dait sebilang dengan béngne sopoq képéng emas terus bebase léq ie pade, ‘Kadu képéng niki bedagang jangke tiang tulak malik.’

¹⁴ Laguq rakyat léq negerine nike meriq léq ie. Jari, sesampun ie lumbar, ie pade ngirim utusan jari nyampéang, ‘Tiang pade ndéq mélé dengan niki jari raje tiang pade.’

¹⁵ Laguq ménak nike telantik jari raje, beterus tulak ojok negerine. Langsung ie ngempoh pelayan-pelayan saq sampun ie béng képéng nike jari nenaoq pire bati saq sampun ie pade mauq.

¹⁶ Pelayan saq penembéq dateng dait matur, ‘Paq, sopoq képéng emas saq pelungguh icanin nike, sampun tiang jariang sepulu.’

¹⁷ ‘Bagus,’ basen raje nike. ‘Side pelayan saq bagus! Séngaq léq hal-hal saq kodéq side bau tesaduq, tiang gen jariang side penguase léq sepulu kote.’

¹⁸ Pelayan saq kedue dateng dait matur, ‘Paq, sopoq képéng emas saq pelungguh icanin nike, sampun tiang jariang lime.’

¹⁹ Raje nike bebase léq pelayan nike, ‘Side gen tiang jariang penguase léq lime kote.’

²⁰ Pelayan saq lain dateng dait matur, ‘Paq, niki képéng pelungguh; tiang simpen léq dalem saputangan.

²¹ Tiang takut léq pelungguh, séngaq pelungguh dengan saq keras. Pelungguh bait napi saq nénten jari dowén pelungguh, dait pelungguh bait hasil léq taoq saq nénten pelungguh talet mésaq.’

²² Raje nike bebase léq ie, ‘Side pelayan saq jahat! Sesuai ucapan-ucapande mésaq tiang gen hukum side. Side nenaoq tiang dengan saq keras: Tiang bait napi saq ndéq jari dowén tiang dait bait hasil léq taoq saq ndéq tiang talet mésaq.

²³ Lamun maraq nike kembéq side ndéq serahang képéng tiang nike ojok dengan saq ngelampaqang képéng adéq léq waktu tiang tulak bau tiang terimaq képéng nike bareng réntenne?’

²⁴ Beterus raje nike bebase léq dengan-dengan saq nganjeng léq derike, ‘Bait képéng nike léman ie dait béng ojok pelayan saq bedowé sepulu képéng emas nike.’

²⁵ Laguq dengan-dengan nike bejawab, ‘Paq, ie sampun bedowé sepulu.’

²⁶ Jawab raje nike, ‘Tiang badaq side: sebilang dengan saq sampun bedowé, gen teican luwéqan malik. Laguq dengan saq ndéq bedowé napi-napi, napi saq araq léq ie gen tebait éndah léman ie.

²⁷ Laguq mangkin side jauq ojok deriki musuh-musuh tiang nike saq ndéq setuju tiang jari rajene. Matéq ie pade selapuq léq julun tiang!’ ”

Deside Isa temulieang léq Yerusalem

²⁸ Sesampun Deside Isa manikang selapuqne nike Ie bemargi léq julun ie pade jari nerusang ojok Yerusalem.

²⁹ Sewaktu sampun rapet Betpage dait Betania léq Bukit Zaitun, Deside Isa ngemanikang due pengiring-Ne lampaq bejulu dait bepesen,

³⁰ “Silaq lumbar ojok kampung saq araq léq julunde nike: Lamun side pade tame léq derike, side pade gen serioq sopoq bagal saq masih odaq tegeteng. Bagal nike ndéq uwah tetunggang siq dengan. Lekaq getenganne terus jauq ojok deriki.

³¹ Lamun araq dengan saq beketuan léq side, ‘Kembéq side pade lekaq getengan bagal nike?’ Badaqang bahwe, ‘Junjungan Saq Mulie merluang bagal nike.’ ”

³² Kedue pengiring Deside Isa nike lumbar, terus daitne selapuqne tepat maraq saq temanikang siq Deside Isa.

³³ Sewaktu ie pade lekaq getengan bagal nike, épéne beketuan léq ie pade, “Kembéq side pade lekaq getengan bagal nike?”

³⁴ Jawab ie pade, “Junjungan Saq Mulie merluang bagal niki.”

³⁵ Beterus ie pade jauq bagal nike ojok Deside Isa. Bongkor bagal nike ie pade lamak siq jubah ie pade, dait tulungne Deside Isa taék léq atas bagal nike.

³⁶ Sewaktu Deside Isa liwat nunggang bagal nike, dengan-dengan kelat jubahne léq rurung.

³⁷ Sewaktu Deside Isa sampun rapet Yerusalem, léq langan saq nurunang léq Bukit Zaitun, selapuq pengiring-pengiring-Ne saq luwéq nike mulai memuji Allah dait ngucapang syukur tipaq Allah lantaran ie pade sampun nyaksiang muqjizat-muqjizat.

³⁸ Ie pade bekuih, “Teberkahin Raje saq rauh dalem peséngan Tuhan! Damé sejahtere léq sorge dait kemuliean léq taoq saq maheagung!”

³⁹ Dengan-dengan Parisi saq araq léq antare dengan luwéq nike matur léq Deside Isa, “Paq Guru, manikang pengiring-pengiring Pelungguh adéqne tedoq.”

⁴⁰ Jawab Deside Isa, “Tiang badaq side! Lamun ie pade tedoq, batu-batu nike gen nyurak.”

Deside Isa besermin cingakin kote Yerusalem

⁴¹ Sewaktu Deside Isa sayan rapet kote Yerusalem dait cingakin kote nike, Ie besermin.

⁴² Deside Isa bemanik, “Periak, bagus gati lamun jelo niki side nenaoq napi saq bau datengang perdaméan; laguq mangkin side ndéq bau serioq ie.

⁴³ Side gen ngalamin sopoq mase, bahwe musuh-musuhde gen piaq halangan-halangan léq sekeliningde, ie pade gen ngepung side dait desek side léman selapuq andang.

⁴⁴ Ie pade gen ngancurang side bareng selapuq pendudukde; dait ndéq gen araq sopoq batu saq masih beronjoq maraq béngan, séngaq side ndéq nenaoq waktu Allah rauh tipaq side!”

Deside Isa tame ojok Gedéng Allah

⁴⁵ Deside Isa tame ojok Gedéng Allah dait mulai sediq selapuq pedagang léq derike.

⁴⁶ Manik Deside Isa léq ie pade, “Léq dalem Kitab Suci tetulis Manik Allah maraq niki: ‘Gedéng Tiang gen jari gedéng taoq bedo'e.’ Laguq side pade jariang ie taoqne bekumpul dengan-dengan jahat!”

⁴⁷ Sebilang jelo Deside Isa ngajahang léq dalem Gedéng Allah. Imam-imam kepale dait ahli-ahli Taurat serte pemimpin-pemimpin Yahudi beniat nyematéq Deside Isa,

⁴⁸ laguq ie pade ndéq taoq, berembé harus ngelaksaneang hal nike, séngaq selapuq dengan terus doang dengahang Deside Isa dait seneng léq pengajahan-Ne.