LUKAS 17 - KITAB SUCI ZABUR INJIL

Hal-hal saq jari penyebap dengan gawéq dose

¹ Deside Isa bemanik léq pengiring-pengiring-Ne, “Hal-hal saq jari penyebap dengan gawéq dose pasti gen araq. Laguq celake gati dengan saq jari penyebapne!

² Solahan lamun batu penggilingan tetaliq léq belongne terus ie tesaut ojok dalem segare ketimbang lantaran ie salaq sopoq léman dengan saq kodéq niki gawéq dose.

³ Keranaq nike pade waspade! Lamun semetonde bedose, peringet ie. Lamun ie nyesel, ampunin ie.

⁴ Lamun ie bedose léq side pituq kali sejelo, dait sebilang ie dateng ojok side dait bebase, ‘Tiang nyesel,’ ampunin ie.”

Mengenai iman

⁵ Rasul-rasul matur léq Junjungan Saq Mulie Deside Isa, “Teguqang iman tiang pade.”

⁶ Jawab Junjungan Saq Mulie, “Lamun side bedowé iman timaqne maraq beléq tolang sawi, side pade bau muni léq lolo are niki, ‘Kerembotan terus nancep léq segare,’ pasti lolo nike gen turut préntahde.”

Kewajiban jari pelayan

⁷ “Lamun léq antare side pade araq saq bedowé sopoq pelayan saq pegawéanne nenggale léq bangket atao ngarat dombe, lamun ie tulak, napi side gen bebase léq ie, ‘Silaq becat bekelor’?

⁸ Pasti ndéq maraq nike! Malahan side gen bebase léq pelayan nike, ‘Sadangang keloran tiang. Kadu kelambi saq bersi dait antih tiang jangke tiang engkah bekelor dait nginem; sesampun nike side kanggo bekelor.’

⁹ Napi side gen ngucapang tampi asih léq ie séngaq ie sampun ngelaksaneang préntahde?

¹⁰ Maraq nike éndah halne side pade, lamun side pade sampun ngelaksaneang napi saq tetugasang léq side pade, side pade harus bebase, ‘Tiang niki pelayan-pelayan saq ndéq araq manpaatne; tiang pade cume ngelaksaneang napi saq jari kewajiban tiang pade.’ ”

Deside Isa nyelahang sepulu dengan kuste

¹¹ Dalem pemargian-Ne ojok Yerusalem, Deside Isa liwatin daérah perbatesan Samaria dait Galilea.

¹² Waktu Ie tame léq sopoq kampung, Ie tedatengin siq sepulu dengan kuste. Dengan-dengan nike nganjeng léman jaoq

¹³ sambil bekuih, “Deside Isa, Guru, periakang tiang pade!”

¹⁴ Sewaktu Deside Isa cingakin dengan-dengan nike, Ie bemanik, “Silaq side lumbar, petitoqang diriqde léq imam-imam.” Sewaktu ie pade kenyeke lampaq, penyakitne telang.

¹⁵ Waktu salaq sopoq léq antare dengan-dengan nike sadar bahwe ie sampun selah, ie tulak sambil mulieang Allah siq suare saq beléq.

¹⁶ Terus léq arepan Deside Isa, ie sujut dait matur tampi asih. Dengan nike léman Samaria.

¹⁷ Deside Isa bemanik, “Tekan araq sepulu dengan teselahang? Mbé saq siwaq dengan malik?

¹⁸ Kembéq cume dengan pendateng niki saq tulak jari mulieang Allah?”

¹⁹ Beterus Deside Isa bemanik léq dengan nike, “Silaq ures, terus side lumbar, lantaran side percaye make side jari selah.”

Kerauhan Kerajaan Allah

²⁰ Dengan-dengan Parisi metakén léq Deside Isa, piran Kerajaan Allah gen rauh. Jawab Deside Isa, “Kerajaan Allah nike nénten temulai siq tande-tande saq bau teserioq siq manusie,

²¹ sehingge dengan bau bebase, ‘Silaq serioq, niki ie!’ atao ‘Léq derike taoqne!’ Séngaq setetune Kerajaan Allah sampun araq léq antare side pade.”

²² Sesampun nike Deside Isa bemanik léq pengiring-pengiring-Ne, “Gen dateng waktune side pade melét serioq sopoq léman jelo-jelo Bije Manusie nike, laguq side pade ndéq mauq serioq ie.

²³ Dait dengan gen bebase léq side, ‘Serioq, Ie léq derike!’ atao ‘Serioq Ie léq deriki!’ Laguq ndaq side sugul turut dengan nike.

²⁴ Séngaq pade maraq kisap saq ngempor léman poton langit saq sopoq ojok poton langit saq lain, maraq nike éndah éraq jelo kerauhan Bije Manusie.

²⁵ Laguq Ie harus luwéq menderite dait tetolaq siq dengan léq jaman niki.

²⁶ Pade maraq saq telaksane léq jaman Nuh, maraq nike éndah halne éraq waktu Bije Manusie rauh.

²⁷ Dengan-dengan pade bekelor dait nginem serte merariq; maraq nike seterusne jangke dateng waktune Nuh tame ojok dalem kapal terus dateng belabur nimpe ie pade jangke selapuq dengan binase.

²⁸ Maraq léq jaman Lot éndah, dengan-dengan pade bekelor dait nginem, bedagang dait belanje, betaletan dait miaq balé.

²⁹ Laguq sewaktu Lot sugul léman Sodom, léq jelo nike api dait urirang turun léman langit binaseang selapuqne.

³⁰ Maraq nike keadaanne éraq léq waktu Bije Manusie nyatayang diriq-Ne.

³¹ Léq jelo nike, dengan saq kenyeke araq léq atas atep baléne ndaq turun malik bait barang-barang léq dalem baléne. Maraq nike éndah dengan saq kenyeke araq léq lendangne, ndaq tulak ojok baléne.

³² Ingetang, napi saq tealamin siq seninen Lot!

³³ Dengan saq berusahe nyelametang nyawene gen kélangan nyawene. Dait dengan saq kélangan nyawene lantaran Tiang, dengan nike gen nyelametang nyawene mésaq.

³⁴ Tiang badaq side: Léq kelem nike, due dengan saq kenyeke tindoq léq sopoq lasah, sopoq gen tejauq, terus saq sopoq malik gen teadéqang.

³⁵ Due dengan nine saq kenyeke giling gandum, sopoq gen tejauq dait sopoqne malik gen teadéqang. [

³⁶ Due dengan kenyeke begawéan léq lendang, saq sopoq gen tejauq, dait sopoq malik teadéqang.]”

³⁷ Pengiring-pengiring Deside Isa metakén, “Junjungan Saq Mulie, léq mbé hal nike gen telaksane?” Jawab Deside Isa, “Léq mbé araq bangké, léq derike bekeriwung kedit saq girang ngaken bangké.”