LUKAS 13 - KITAB SUCI ZABUR INJIL

Dose dait penderitean

¹ Léq waktu nike éndah araq dengan saq nyampéang tipaq Deside Isa mengenai dengan-dengan Galilea saq tematéq siq Pilatus, sewaktu ie pade kenyeke ngaturang kurban tipaq Allah.

² Deside Isa jawab ie pade, “Napi lantaran maraq nike entan dengan-dengan Galilea nike tematéq maraq nike, side pade paran nike buktine ie pade beléqan dosene tebanding selapuq dengan Galilea saq lain?

³ Tiang badaq side: Pasti Ndéq! Laguq lamun side ndéq betobat léman dose-dosende, side pade selapuq gen binase éndah, maraq ie pade.

⁴ Berembé dengan saq baluq olas saq ninggal éndah sewaktu ie pade tetimpe siq menare léq Siloam? Side pade paran nike buktine ie pade beléqan dosene tebanding selapuq dengan-dengan lain saq ndot léq Yerusalem?

⁵ Tiang badaq side: Pasti ndéq! Laguq lamun side pade ndéq betobat léman dose-dosende, side pade selapuq gen binase éndah maraq ie pade.”

Perumpamean lolo are saq ndéq bebuaq

⁶ Sesampun nike Deside Isa nyeriteang perumpamean niki, “Araq dengan nalet sopoq lolo are léq kebon anggurne. Léq sopoq jelo, ie lumbar boyaq buaq lolo are nike, laguq sopoq-sopoq ndéq araq buaqne.

⁷ Jari, ie bebase léq penyakapne, ‘Sampun telu taun tiang dateng boyaq buaq lolo are niki, laguq sopoq-sopoq ndéq araq buaqne. Silaq pade rebaq lolo nike! Ie cume nyembih sari kakenan léman tanaq!’

⁸ Laguq jawab penyakap nike, ‘Paq, alurang baé ie karing setaun. Tiang gen romboq tanaq léq sekiterne dait toloqang raboq.

⁹ Sang iniq bebuaq taun mudi. Laguq lamun ndéq bebuaq, silaq pelungguh rebaq ie.’ ”

Deside Isa nyelahang sopoq dengan nine bongkok léq jelo Sabat

¹⁰ Léq sopoq jelo, waktu nike jelo Sabat, Deside Isa ngajahang léq salaq sopoq balé ibadah.

¹¹ Léq derike araq sopoq dengan nine saq sampun baluq olas taun ngonéqne sakit, séngaq araq roh jahat léq dalem diriqne. Dengan nine nike bongkok dait tetu-tetu ndéq tao panjeng.

¹² Sewaktu Deside Isa cingakin dengan nine nike, Deside Isa bemanik léq ie, “Inaq, penyakitde sampun selah!”

¹³ Beterus Deside Isa noloq gading-Ne léq atas dengan nine nike, dait waktu nike éndah ie panjeng, terus mulieang Allah.

¹⁴ Kepale balé ibadah nike sili, séngaq Deside Isa nyelahang dengan léq jelo Sabat, keranaq nike ie bebase léq dengan-dengan, “Araq enem jelo jari begawéan, pade dateng léq jelo-jelo nike jari teselahang, ndaq léq jelo Sabat!”

¹⁵ Junjungan Saq Mulie bemanik, “Side pade munapik! Léq jelo Sabat selapuq dengan ngelepas sampi atao bagalne léman barene, dait jauqne sugul terus tebéng nginem.

¹⁶ Nah, léq deriki mangkin araq sopoq dengan nine keturunan Ibrahim, saq sampun baluq olas taun tekuasein siq Belis. Napi ndéq kanggo tebébasang léman kuase nike léq jelo Sabat?”

¹⁷ Jawaban Deside Isa nike piaq musuh-musuh-Ne jari ilaq gati; laguq selapuq dengan-dengan saq lain seneng serioq selapuq muqjizat saq tepiaq siq Deside Isa.

Perumpamean tolang sawi

¹⁸ Deside Isa beketuan, “Mengenai Kerajaan Allah berembé keadaanne? Napi siq Tiang kadu bandingang ie?

¹⁹ Keadaanne maraq perumpamean niki. Sopoq tolang sawi tebait siq dengan terus tesawur léq kebonne. Tolang sawi nike tiwoq terus jari lolo, dait kedit-kedit piaq kesebu léq pémpangne.”

Perumpamean ragi ruti

²⁰ Deside Isa bemanik malik, “Kadu napi malik gen Tiang umpameang hal Kerajaan Allah?

²¹ Keadaanne pade maraq ragi ruti saq tebait siq sopoq dengan nine terus teadon kance petang dase liter tepung terigu, jangke mbal selapuqne.”

Lawang saq supit

²² Dalem pemargian-Ne ojok Yerusalem, Deside Isa liwat langan kote-kote dait kampung sambil ngajahang.

²³ Beterus araq dengan metakén léq Deside Isa, “Paq, napi cume sekediq doang dengan saq gen teselametang?” Jawab Deside Isa,

²⁴ “Pade berusahe tame langan lawang saq supit. Tiang badaq side, luwéq dengan berusahe tame laguq ndéq bau.

²⁵ Sewaktu épén balé ures dait ngimpet lawangne, side pade nganjeng léq luah dait mulai ketok-ketok lawang sambil bebase, ‘Paq, bukaqang tiang lawang!’ Épén balé nike gen bejawab, ‘Tiang ndéq nenaoq side léman mbé!’

²⁶ Side pade gen bejawab, ‘Tiang pade sampun bekelor dait nginem kance Pelungguh, dait Pelungguh éndah sampun ngajahang léq rurung-rurung saq araq léq kote tiang pade!’

²⁷ Laguq épén balé nike gen bejawab malik, ‘Tiang ndéq nenaoq side pade léman mbé! Pade nyedi léman taoq niki, side pade saq gawéq jahat!’

²⁸ Sewaktu side pade serioq Ibrahim, Ishak dait Yakub serte selapuq nabi besukecite léq dalem Kerajaan Allah, side pade gen nangis dait menderite, séngaq side pade tetundung ojok luah!

²⁹ Dengan-dengan gen dateng léman Timuq, Bat, léman Lauq dait Daye, dait gen besukecite léq dalem Kerajaan Allah.

³⁰ Setetune, araq dengan saq penutuq gen jari dengan penembéq, dait dengan saq penembéq gen jari saq penutuq.”

Deside Isa periak léq Yerusalem

³¹ Léq waktu nike éndah araq dengan-dengan Parisi parek ojok Deside Isa dait matur, “Sampunang Pelungguh meneng léq deriki, silaq Pelungguh lumbar ojok taoq saq lain, séngaq Herodes beniat nyematéq Pelungguh.”

³² Jawab Deside Isa, “Silaq lumbar dait sampéang ojok dengan saq ndéq araq manpaatne nike, ‘Jelo niki dait jemaq Tiang gen sediq roh jahat dait nyelahang dengan sakit, laguq léq jelo ketelu, Tiang gen nutuqang karye Tiang.’

³³ Timaqne maraq nike Tiang harus nerusang éndah kelampan Tiang, jelo niki, jemaq dait suléqne, séngaq sopoq nabi ndéq kanggo tematéq léq luah Yerusalem.

³⁴ Yerusalem, Yerusalem! Side matéq nabi-nabi! Utusan-utusan Allah side peléwas siq batu jangke ninggal! Sampun pire kali Tiang mélé ngumpulang selapuq pendudukde maraq inen manuk saq kekep anak-anakne léq bawaq kelétékne, laguq side ndéq mélé!

³⁵ Setetune balénde gen tebilin dait jari sepi. Laguq Tiang badaq side: Mulai mangkin side ndéq gen serioq Tiang malik, jangke side bebase, ‘Teberkahin Ie saq rauh dalem peséngan Tuhan.’ ”