KOLOSE 4 - KITAB SUCI ZABUR INJIL

¹ Semeton senamian saq jari majikan! Side pade harus perlakuang hambe-hambende secare kenaq dait adil. Pade inget bahwe side pade éndah bedowé sopoq majikan léq sorge.

Petunjuk-petunjuk

² Side pade harus tekun bedo'e dait tetep waspade dait besyukur léq Allah.

³ Do'eang éndah tiang pade adéq Allah ngicanin tiang pade kesempatan saq bagus jari nyampéang berite mengenai rahasie Almasih. Lantaran hal nike make mangkin niki tiang araq léq dalem bui.

⁴ Bedo'e adéq tiang bau jelasang rahasie nike sejelas-jelasne maraq berembé seharusne.

⁵ Léq dalem hubungan side pade kance dengan-dengan saq ndéq percaye, side pade harus idup bijaksane dait solah-solah kadu sebilang kesempatan.

⁶ Adéq hal-hal saq side pade ucapang miaq dengan jari seneng. Side pade harus nenaoq berembé seharusne side pade bejawab napi saq teketuanang siq dengan.

Penutup surat dait salam

⁷ Tikikus, semetonte saq ite kasihin, gen badaq side pade selapuqne mengenai tiang. Ie setie begawéan bagi Tuhan bareng kance tiang pade.

⁸ Tiang ngutus ie tipaq side siq maksut adéq side pade nenaoq keadaan tiang pade dait side pade tehibur.

⁹ Tikikus gen lumbar bareng kance Onesimus; ie éndah salaq sopoq dengan léman kalangande. Ie dengan saq setie, dait tiang pade ngasihin ie. Ie pade gen bebadaq tipaq side selapuqne saq telaksane léq taoq tiang niki.

¹⁰ Aristarkus, saq bareng tebui kance tiang, ngirim salam tipaq side pade. Maraq nike éndah Markus, pisaqne Barnabas. (Side pade sampun tekirimang berite jari nyambut ie lamun ie dateng ojok side.)

¹¹ Salam éndah léman Isa saq tesebut Yustus. Cume ketelu dengan niki léman ie pade saq besunat saq jari batur tiang saq bareng-bareng begawéan umaq Kerajaan Allah; ie pade saq sampun miaq angen tiang jari tehibur.

¹² Salam léman Epapras. Ie éndah salaq sopoq dengan léman kalangande. Ie hambe Deside Isa Almasih, saq tetep tekun do'eang side pade. Sanget siqne tunas léq Allah adéq keyakinan side jari kuat dait side pade tetu-tetu déwase, adéq side pade jari sempurne dait taat léq pekayunan Allah.

¹³ Tiang saksiang mésaq bahwe ie sampun lelah begawéan jari side pade dait jari dengan-dengan saq léq Laodikia dait léq Hierapolis.

¹⁴ Tabib Lukas, saq ite kasihin, dait Demas ngirim salam tipaq side.

¹⁵ Sampéang salam tiang pade tipaq semeton-semeton seiman léq Laodikia; dait éndah tipaq Nimpa dait tipaq jemaah saq beribadah léq baléne.

¹⁶ Sesampun side tebaceang surat niki, usaheang éndah tebaceang léq jemaah Laodikia. Maraq nike éndah side mésaq harus bace surat saq gen tekirim léman Laodikia tipaq side.

¹⁷ Dait badaq Arkipus, “Inget solah-solah bahwe side harus nutuqang tugas saq sampun side terimaq léman Tuhan.”

¹⁸ Salam léman tiang, Paulus. Salam niki tiang tulis kadu ime tiang mésaq. Inget bahwe tiang masih léq dalem bui! Rahmat Allah araq bareng kance side pade.