KOLOSE 3 - KITAB SUCI ZABUR INJIL

¹ Side pade sampun teidupang malik bareng kance Almasih. Keranaq nike side pade harus berusahe jari mauq hal-hal saq léq sorge, léq taoq Almasih mréntah ngiring Allah.

² Pikirang hal-hal saq araq léq derike, ndaq tipaq hal-hal saq léq dunie.

³ Séngaq side pade sampun ninggal, dait idupde teilipang bareng kance Almasih léq dalem Allah.

⁴ Nah, sumber idupde saq sejati nike Almasih, dait lamun Ie penggitan éraq side pade gen araq éndah bareng kance Ie léq dalem kemuliean-Ne!

Idup saq laéq dait idup saq baru

⁵ Keranaq nike, matéq keméléq-keméléq dunie saq ngerongrong diriqde, misalne: bezinah, hal-hal saq ndéq pantes, hawe napsu, keméléq saq jahat, dait serakah (séngaq serakah nike pade maraq nyembah berhale).

⁶ Hal-hal maraq nike saq datengang murke Allah tipaq dengan-dengan saq durhake.

⁷ Laéq side mésaq turut keméléq-keméléq nike, sewaktu side pade masih tekuasein siq keméléq-keméléq nike.

⁸ Laguq mangkin side pade harus tetéh hal-hal saq jahat nike léman diriqde: ndaq malik sili, atao ngamuk atao bedowé perasaan saq lengé tipaq dengan lain. Ndaq gati sugul léman biwihde ucapan-ucapan saq lengé atao ucapan saq kotor.

⁹ Ndaq berugung sopoq kance saq lainne, séngaq idup saq laéq dait selapuq tabiatne sampun side pade tetéh.

¹⁰ Mangkin side pade sampun teicanin idup saq baru. Side pade jari manusie baru, saq kenyeke tejariang baru terus-menerus siq penciptene, nike Allah, menurut gambar Allah. Maksutne adéq side pade kenal kance Allah secare sempurne.

¹¹ Dalem hal niki, ndéq araq malik bédene antare dengan Yunani dait dengan Yahudi, dengan besunat dait ndéq besunat, dengan Barbar dait dengan Skit, hambe dait dengan merdéke. Laguq sebalikne, Almasih nike selapuq-lapuqne dait léq dalem selapuq-lapuqne.

¹² Side pade jari dengan-dengan saq tehususang bagi Allah. Allah ngasihin side pade dait tepiléq jari dowé-Ne saq husus. Keranaq nike side pade harus nyatayang belas kasihan, side pade harus murah até, rendah até, lemah lembut dait sabar.

¹³ Side pade harus sabar sopoq kance saq lainne, dait saling ngampunin lamun araq saq dendem tipaq saq lain. Pade maraq Tuhan sampun ngampunin side pade, jari side pade éndah harus mélé saling ngampunin sopoq kance saq lain.

¹⁴ Dait léq atas selapuqne nike: Side pade harus kadu kasih, jari pengiket saq pesopoq dait nyempurneang.

¹⁵ Damé sejahtere Almasih harus mréntah léq dalem aténde, séngaq jari hal nike side pade sampun temanikang jari sopoq awak. Dait pade besyukur.

¹⁶ Manik Almasih harus araq secare belimpah-limpah léq antare side, sehingge side siq selapuq hikmat ngajah dait ngebéng peringetan tipaq sopoq dengan dait saq lain sambil nyanyiang zabur, dait puji-pujian serte nyanyian rohani, side ngucap syukur tipaq Allah léq dalem aténde.

¹⁷ Napi juaq saq side pade laksaneang atao ucapang, hal nike harus telaksaneang dait teucapang siq peséngan Junjungan Saq Mulie Deside Isa Almasih, sambil ngucap syukur tipaq Allah Bapa léq napi saq telaksaneang siq Deside Isa umaq side.

Hubungan-hubungan pribadi dalem idup saq baru

¹⁸ Semeton senamian saq jari senine! Pade tunduk léq semamende, séngaq maraq nike seharusne kelakuande sebagé dengan saq idup léq dalem Tuhan.

¹⁹ Semeton senamian saq jari semame! Pade kasihin seninende. Ndaq sakitin angen seninende.

²⁰ Kanak-kanak! Pade taat léq dengan toaqde dalem selapuq hal, séngaq perbuatan saq maraq nike saq nyenengang Allah.

²¹ Semeton senamian saq jari bapaq! Ndaq sakitin angen bije-bijende adéq ie pade ndéq jari putus ase.

²² Semeton senamian saq jari hambe! Pade taat léq majikande saq araq léq dunie niki dalem selapuq hal. Ketaatande nike ndaq cume léq waktu ie araq léq julunde adéq side teajum, laguq adéqde taat léq ie siq angen saq ihlas, séngaq side pade hormatin Tuhan.

²³ Napi juaq saq side piaq, piaq nike siq segenep aténde maraq tipaq Tuhan, dait ndéqne tipaq manusie.

²⁴ Pade inget bahwe side pade gen nerimaq upaq léman Tuhan. Napi saq tesedieang siq Tuhan umaq umat-Ne, nike saq gen teicanin tipaq side. Séngaq majikan saq setetune side pade kenyeke layanin nike, Almasih mésaq.

²⁵ Dait sai juaq saq piaq kesalaqan, gen tanggung kesalaqan-kesalaqan nike; séngaq Tuhan nénten béde-bédeang dengan.