IBRANI 3 - KITAB SUCI ZABUR INJIL

Deside Isa atasan léman Musa

¹ Keranaq nike, semeton-semeton saq suci, saq nerimaq bagian léman Allah saq sampun ngemanikang léman sorge, side pade harus merhatiang Rasul dait Imam Agung saq sampun ite percaye, nike Deside Isa.

² Ie setie léq Allah saq sampun miléq Ie léq karye nike, pade maraq Musa laéq setie ngelaksaneang tugasne léq Gedéng Allah.

³ Laguq Deside Isa patut nerimaq penghormatan saq beléqan léman Musa. Séngaq dengan saq piaq balé harus lebih tehormatin tebanding balé nike mésaq.

⁴ Mule sebilang balé araq saq miaq, laguq saq miaq selapuq-lapuqne nike Allah mésaq.

⁵ Musa setie jari pelayan léq dalem gedéng Allah jari ngebéng kesaksian mengenai napi saq gen teberiteang léq jaman saq gen dateng.

⁶ Laguq Almasih setie sebagé Bije saq asalne léman Allah saq betanggung jawab léq gedéng Allah. Dait ite niki gedéng Allah, lamun ite tetep besemanget dait tetep yakin jari mauq napi saq ite harepang.

Binase lantaran murtat

⁷ Keranaq nike, maraq manik Roh Allah, “Lamun léq jelo niki side dengahang Manik Allah,

⁸ ndaq side pagah maraq leluhurde, sewaktu ie pade ngelawan Allah, dait nguji Allah léq padang gurun.

⁹ ‘Léq derike leluhurde cobe Tiang dait nguji Tiang,’ Manik Allah, ‘Padahal ie pade sampun serioq karye Tiang petang dase taun ngonéqne.’

¹⁰ Keranaq nike Tiang menggah léq ie pade dait Tiang bemanik, ‘Até ie pade tetep sesat, ie pade ndéq mélé taat léq préntah-préntah Tiang.’

¹¹ Tiang menggah dait besumpah, ‘Ie pade ndéq gen tame ojok negeri nike jari mauq mentelah bareng kance Tiang.’ ”

¹² Semeton senamian, onyaq-onyaq ndaq jangke araq sopoq dengan juaq léq antare side bedowé angen saq jahat dait ndéq percaye, sehingge ie murtat léman Allah saq idup!

¹³ Jari, adéq ndéq araq sopoq dengan juaq léq antare side saq pagah lantaran tipu muslihat dose sehingge nentang Allah, side pade harus saling naséhatin sebilang jelo sengonéq masih tesebut “Jelo Niki”.

¹⁴ Ite selapuq sampun mauq bagian léq dalem Almasih lamun ite tetep percaye léq pengharepante saq penembéq jangke penutuqne.

¹⁵ Araq tetulis, “Lamun léq jelo niki side dengahang Manik Allah, ndaq side pagah maraq sewaktu ngelawan Allah.”

¹⁶ Sai dengan-dengan saq dengah Manik Allah terus ngelawan Ie? Tekan ie pade saq tepimpin siq Musa sugul léman Mesir?

¹⁷ Dait tipaq sai Allah murke petang dase taun ngonéqne? Tekan tipaq ie pade saq bedose, dait saq ninggal léq padang gurun?

¹⁸ Tipaq sai Allah sampun besumpah bahwe ie pade ndéq gen tame ojok taoq-Ne mentelah, selain tipaq ie pade saq ndéq taat nike?

¹⁹ Jari, sampun jelas léq ite, bahwe ie pade ndéq bau tame séngaq ie pade ndéq percaye.