IBRANI 2 - KITAB SUCI ZABUR INJIL

Keselametan saq beléq

¹ Keranaq nike ite harus sayan pacu-pacu merhatiang pengajahan-pengajahan saq sampun ite dengah, adéq ite ndaq jangke bilin pengajahan-pengajahan nike.

² Manik Allah saq tesampéang langan pare malaékat tipaq leluhurte ternyate kenaq, dait dengan saq ndéq turut atao ndéq taat nerimaq hukuman saq setimpal.

³ Berembé ite gen lepasang diriq, lamun ite ndéq merhatiang keselametan saq beléq nike? Penembéqne, keselametan nike teberiteang siq Tuhan, terus teteguqang umaq ite siq ie pade saq sampun dengah léman Ie.

⁴ Allah sampun neguqang kesaksian dengan-dengan nike siq ngaraqang macem-macem tande dait muqjizat serte paice léman Roh Allah saq tebagi-bagiang menurut pekayunan-Ne mésaq.

Deside Isa léq waktu saq singket bawaqan léman malaékat-malaékat

⁵ Séngaq ndéqne tipaq malaékat-malaékat Allah naklukang dunie saq gen dateng, saq kenyekente raosang niki.

⁶ Sebalikne, araq sopoq kesaksian saq tetulis maraq niki, “Napi manusie nike, Ya Allah, sehingge Deside ilingang ie? Atao bije manusie sehingge Deside merhatiang ie?

⁷ Léq waktu saq singket Deside jariang ie bawaqan sekediq léman malaékat. Deside ngicanin ie mahkote kemuliean dait hormat.

⁸ Selapuq-lapuqne sampun Deside taklukang léq ie.” Séngaq siq naklukang selapuq hal tipaq Ie, nénten araq sopoq hal saq Ie kecualiang, saq nénten takluk léq Ie. Laguq mangkin niki ndéqman ite serioq, bahwe selapuq hal sampun tetaklukang léq Ie.

⁹ Laguq ite serioq bahwe Ie, Deside Isa, dalem waktu saq singket sampun tepiaq bawaqan léman malaékat, dait Ie sampun teicanin mahkote kemuliean dait hormat séngaq sengsare ninggal-Ne nike, adéq siq rahmat Allah Ie ngalamin maut demi selapuq manusie.

¹⁰ Mule sampun sepatutne Allah -- lantaran Ie dait siq Ie selapuq-lapuqne sampun tecipteang -- nike Allah saq gadingang luwéq dengan tipaq kemuliean, nyempurneang éndah Deside Isa, saq mimpin ie pade tipaq keselametan, siq penderitean.

¹¹ Séngaq Ie saq nyuciang manusie dait ie pade saq tesuciang, ie pade selapuq asalne léman saq Sopoq; keranaq nike Ie nénten ilaq akuq ie pade jari sanak-sanak-Ne.

¹² Manik-Ne, “Tiang gen beriteang léq sanak-sanak Tiang mengenai Deside. Tiang gen memuji Deside léq tengaq-tengaq jemaah.”

¹³ Deside Isa bemanik éndah, “Tiang gen beharep léq Allah.” Dait Ie bemanik éndah, “Niki Tiang, bareng kance bije-bije saq sampun teicanin siq Allah tipaq Tiang.”

¹⁴ Séngaq dengan-dengan saq Ie sebut bije, nike mahluk manusie saq bau ninggal, make Deside Isa mésaq jari pade kance ie pade dait idup dalem keadaan manusie. Hal nike Ie piaq, adéq siq ninggal-Ne Ie bau binaseang Belis saq nguasein kematéan.

¹⁵ Siq care nike Ie bébasang dengan-dengan saq seumur idup tejariang panjak lantaran takut léq kematéan.

¹⁶ Sampun nyate bahwe ndéqne malaékat saq Ie tulung, laguq keturunan Ibrahim.

¹⁷ Nike artine bahwe Ie harus jari pade kance sanak-sanak-Ne léq dalem selapuq-lapuqne. Dait siq care nike Ie bau jari Imam Agung saq bedowé belas kasihan dait setie tipaq Allah. Siq pelayanan-Ne nike dose manusie bau teampunin.

¹⁸ Dait lantaran Ie mésaq sampun menderite dait tecobe, Ie bau nulung dengan-dengan saq mauq cobe, séngaq Ie mésaq sampun tecobe dait menderite.