IBRANI 1 - KITAB SUCI ZABUR INJIL

Allah bemanik langan perantarean Bije-Ne

¹ Léq jaman laéq, Allah kereng bemanik léq leluhurte langan nabi-nabi kadu macem-macem care.

² Laguq léq jaman ahir niki, Allah bemanik léq ite langan perantarean Bije-Ne, saq sampun tetentuang jari ahli waris selapuq saq araq. Langan Ie Allah sampun cipteang alam semeste.

³ Ie saq nyugulang cahaye kemuliean Allah saq menah tandur; Ie wujut nyate Allah. Ie éndah saq meliharaq keselametan alam semeste niki siq manik-Ne saq bekuase. Sesampun Ie ngapus dose, Ie melinggih léq sedi kanan Saq Maheagung léq taoq saq paling atas.

Bije saq asalne léman Allah atasan léman malaékat-malaékat

⁴ Bije saq asalne léman Allah nike mauq kedudukan jaoq atasan léman malaékat, dait peséngan saq teicanin siq Allah léq Ie éndah jaoq muliean léman peséngan saq teicanin tipaq malaékat.

⁵ Allah nénten uwah bemanik maraq niki léq sopoq malaékat, “Deside Bije saq asalne léman Tiang, léq jelo niki Tiang sampun jariang Deside Bije Tiang.” Dait, “Tiang gen jari Bapa-Ne, dait Ie gen jari Bije Tiang.”

⁶ Laguq sewaktu Allah ngutus Bije-Ne saq sengake ojok dunie niki, Allah bemanik maraq niki, “Selapuq malaékat Allah wajib nyembah Ie.”

⁷ Mengenai malaékat-malaékat, Allah bemanik maraq niki, “Allah miaq malaékat-malaékat-Ne jari angin, dait pelayan-pelayan-Ne jari nyale api.”

⁸ Laguq mengenai Bije-Ne, Allah bemanik, “Tahte Deside, ya Allah, gen kekel selaéq-laéqne! Pemréntahan Deside nike pemréntahan saq adil.

⁹ Deside suke léq keadilan, dait meriq léq hal saq jahat, keranaq nike Allah, Allah Deside, miléq Deside dait ngicanin Deside kehormatan saq datengang sukecite, lebihan léman batur-batur Deside.”

¹⁰ Allah bemanik éndah, “Deside, Tuhan, léq penembéqne cipteang gumi, dait Deside mésaq cipteang langit.

¹¹ Selapuqne nike gen musnah, dait jari lotoh maraq kelambi; laguq Deside gen tetep araq.

¹² Gumi langit niki gen Deside lepit maraq kelambi, dait gen Deside gentiq siq saq lain. Laguq Deside nénten gen berobah, dait idup Deside nénten gen tutuq.”

¹³ Ndéqne araq sopoq juaq malaékat saq sampun nerimaq Manik Allah saq maraq niki, “Melinggih léq sedi kanan Tiang, jangke Tiang miaq musuh-musuh Deside takluk léq Deside.”

¹⁴ Malaékat-malaékat nike cume roh-roh saq ngelayanin Allah, dait saq tepréntah siq Allah jari ngelayanin dengan-dengan saq gen nerimaq keselametan.