2 YAHYA 1 - KITAB SUCI ZABUR INJIL

¹ Tipaq Inaq saq tepiléq siq Allah, dait tipaq bije-bijene saq tetu-tetu tiang kasihin. Léman tiang, pemimpin jemaah dait selapuq dengan saq nenaoq kebenaran.

² Séngaq Allah araq léq dalem aténte, dait gen tetep araq bareng kance ite selaéq-laéqne.

³ Paice, rahmat dait damé sejahtere léman Allah Bapa, dait léman Deside Isa Almasih, Bije saq asalne léman Bapa nike, gen araq bareng kance ite léq dalem kebenaran dait dalem kasih.

Kebenaran dait kasih

⁴ Tiang gembire gati nenaoq bahwe araq separo bije-bijende idup menurut kebenaran, maraq saq sampun tepréntahang siq Allah Bapa tipaq ite.

⁵ Keranaq nike, Inaq, sanget siq tiang tunas adéq ite selapuq saling kasihin. Napi saq tiang nyatayang niki ndéqne sopoq préntah saq baru umaq side, laguq menurut préntah saq sampun araq léq ite léman penembéq ite percaye.

⁶ Kasih nike artine ite idup menurut préntah-préntah-Ne. Dait préntah saq sampun side pade dengah léman penembéqne nike, bahwe side pade harus idup siq care saling kasihin sopoq kance saq lain.

⁷ Luwéq penyesat sampun nyebar ojok seantéro dunie. Ie pade dengan-dengan saq ndéq ngakuq bahwe Deside Isa Almasih sampun rauh ojok dunie jari sopoq manusie. Nike penyesat dait penentang Almasih.

⁸ Keranaq nike jagaq ndaq jangke side pade kélangan napi saq sampun tiang pade usaheang umaq side pade. Pade berusahe adéq side pade nerimaq selapuq upaqde léman Allah.

⁹ Dengan saq ndéq percaye léq pengajahan Almasih, laguq nyimpang léman napi saq teajahang siq Ie, dengan nike ndéq bedowé Allah. Dengan saq tetep léq dalem pengajahan Almasih, artine ie bedowé Allah Bapa dait Bije saq asalne léman Allah.

¹⁰ Keranaq nike, lamun araq dengan dateng dait nyampéang léq side pengajahan saq ndéq teajahang siq Almasih, ndaq nerimaq dengan nike léq dalem balénde atao ngebéng salam tipaq ie.

¹¹ Séngaq dengan saq ngebéng salam tipaq dengan saq maraq nike milu éndah kance dengan nike gawéq perbuatan saq jahat.

Penutup

¹² Luwéq gati saq perlu tiang badaq tipaq side, laguq bagusan ndéq langan surat. Tiang beharep gen bau dateng dait ngeraos langsung kance side pade, adéq sukecitente jari sempurne.

¹³ Bije-bije semetonde saq nine, saq tepiléq éndah siq Allah ngirim salam tipaq side.