1 YAHYA 4 - KITAB SUCI ZABUR INJIL

Roh saq kenaq dait saq sesat

¹ Semeton-semeton saq tiang kasihin! Ndaq percaye léq sebilang roh, laguq uji juluq roh-roh nike, napi roh nike asalne léman Allah atao ndéq. Séngaq luwéq nabi palsu sampun begerame ojok mbé-mbé.

² Maraq niki entane adéq side pade nenaoq napi nike Roh Allah atao ndéq: Sebilang roh saq ngaku bahwe Deside Isa rauh ojok dunie jari manusie, roh nike dateng léman Allah.

³ Laguq roh saq ndéq ngakuq Deside Isa, roh nike ndéqne dateng léman Allah. Roh nike roh penentang Almasih. Side pade sampun dengah bahwe roh nike gen dateng, dait mangkin ie sampun araq léq dalem dunie niki.

⁴ Laguq bije-bije tiang, side pade asalne léman Allah. Side pade sampun ngalahang nabi-nabi palsu, séngaq Roh saq araq léq side beléqan kuasene kance roh saq araq léq dalem dunie.

⁵ Nabi-nabi palsu nike bebaos mengenai hal-hal dunie, dait dunie dengah napi saq ie pade sampéang, séngaq ie pade asalne léman dunie.

⁶ Laguq ite niki asalne léman Allah; dait dengan saq kenal kance Allah, dengah ucapante. Dengan saq asalne ndéq léman Allah, ndéqne dengah ucapante. Siq care nike ite nenaoq bédene antare Roh kebenaran dait roh saq nyesatang.

Allah nike kasih

⁷ Semeton senamian saq tiang kasihin! Silaq ite saling kasihin sopoq kance saq lain, séngaq kasih nike asalne léman Allah. Sebilang dengan saq bedowé rase kasih, asalne léman Allah dait kenal kance Allah.

⁸ Dengan saq ndéq bedowé rase kasih, ie ndéq kenal kance Allah; séngaq Allah nike kasih.

⁹ Siq care niki kasih Allah nike tenyatayang léq ite, siq care ngutus Bije-Ne saq nunggal ojok dalem dunie adéq ite mauq idup langan Bije-Ne nike.

¹⁰ Niki kasih nike: Ndéqne ite saq sampun ngasihin Allah, laguq Allah saq ngasihin ite dait saq sampun ngutus Bije-Ne adéq langan Ie, ite tedaméang léman dose-dosente.

¹¹ Semeton senamian saq tiang kasihin, lamun maraq nike beléqne kasih Allah léq ite, ite éndah harus saling kasihin sopoq kance saq lain.

¹² Ndéq araq sopoq dengan juaq saq sampun serioq Allah. Laguq lamun ite saling kasihin, Allah tetep araq léq dalem ite dait kasih-Ne jari sempurne léq dalem ite.

¹³ Séngaq Allah sampun ngicanin Roh-Ne tipaq ite, make ite nenaoq bahwe ite sampun araq léq dalem Allah, dait Allah léq dalem ite.

¹⁴ Tiang pade sampun serioq Bije-Ne, dait tiang pade beriteang bahwe Ie teutus siq Bapa jari Juruselamet dunie niki.

¹⁵ Sai-sai saq ngaku bahwe Deside Isa nike Bije saq asalne léman Allah, Allah araq léq dalem dengan nike, dait dengan nike éndah araq léq dalem Allah.

¹⁶ Ite sampun nenaoq dait percaye mengenai kasih Allah tipaq ite. Allah nike kasih. Dengan saq idupne tekuasein siq kasih, dengan nike araq léq dalem Allah, dait Allah léq dalem ie.

¹⁷ Siq care niki kasih Allah tejariang sempurne léq dalem ite, adéq ite parek tipaq Allah siq keyakinan saq pasti léq Jelo Pengadilan, séngaq idupte léq dunie niki pade maraq idup Almasih.

¹⁸ Léq dalem kasih, ndéq araq rase takut, séngaq kasih saq sempurne nelangang selapuq rase takut. Séngaq léq dalem rase takut araq siksaq hukuman dait dengan saq takut ndéqman sempurne léq dalem kasih.

¹⁹ Ite ngasihin, séngaq Allah sampun juluan ngasihin ite.

²⁰ Lamun sopoq dengan bebase, “Tiang ngasihin Allah,” laguq ie ndéq ngasihin semetonne, dengan nike penduste. Séngaq dengan saq ndéq ngasihin semetonne saq ie serioq, ndéq mungkin bau ngasihin Allah saq ndéq ie serioq.

²¹ Niki préntah saq teicanin siq Almasih tipaq ite: Sai juaq saq ngasihin Allah harus éndah ngasihin semetonne.