1 YAHYA 3 - KITAB SUCI ZABUR INJIL

Bije-bije dowén Allah

¹ Serioq berembé beléq kasih Allah léq ite, sehingge ite teakuq jari bije-bije dowé-Ne. Dait mule ite niki bije-bije dowén Allah. Keranaq nike dunie saq jahat niki ndéq kenal kance ite, séngaq dunie ndéq kenal kance Allah.

² Semeton senamian saq tiang kasihin! Mangkin ite niki bije-bije dowén Allah, laguq keadaante éraq ndéqman jelas. Laguq ite nenaoq bahwe lamun Almasih rauh, ite gen jari maraq Ie, séngaq ite gen serioq Ie léq dalem keadaan-Ne saq setetune.

³ Selapuq dengan saq bedowé harepan maraq niki léq Almasih, jagaq diriqne adéqne tetu-tetu suci, bersi léman dose maraq Almasih nike suci.

⁴ Dengan saq piaq dose, ngelanggar hukum Allah; séngaq dose nike pelanggaran hukum Allah.

⁵ Side pade nenaoq bahwe Almasih sampun rauh jari ngapus dose-dose manusie, dait bahwe ndéq araq dose léq dalem diriq-Ne.

⁶ Selapuq dengan saq idup léq dalem Almasih, ndéq terus-terusan piaq dose. Dengan saq tetep piaq dose, ndéq uwah serioq dait kenal kance Almasih.

⁷ Bije-bije tiang, ndaq alurang sai juaq nyesatang side pade. Sai-sai saq ngelaksaneang napi saq kenaq, nike kenaq, pade maraq Almasih nike kenaq.

⁸ Laguq dengan saq tetep piaq dose, nike anak Belis, séngaq Belis gawéq dose léman penembéqne. Nike lantaranne Bije saq asalne léman Allah rauh, jari ngancurang pegawéan Belis.

⁹ Dengan saq asalne léman Allah, ndéq terus-terusan piaq dose, séngaq sipat Allah mésaq araq léq ie. Dait lantaran Allah nike jari Bapane, make ie ndéq bau terus-terusan piaq dose.

¹⁰ Niki bédene antare bije-bije dowén Allah kance anak-anak dowén Belis: Sai-sai saq ndéq ngelaksaneang préntah Allah, atao ndéq ngasihin semetonne, ie ndéqne bije dowén Allah.

Saling kasihin sopoq kance saq lain

¹¹ Léman penembéqne sampun tesampéang berite niki tipaq side: Ite harus saling kasihin sopoq kance saq lain.

¹² Ndaq ite maraq Kain, saq jari anak Belis dait nyematéq semetonne mésaq. Napi penyebapne Kain nyematéq semetonne? Séngaq ie ngelaksaneang hal-hal saq jahat, laguq hal-hal saq telaksaneang siq semetonne nike kenaq.

¹³ Keranaq nike, semeton-semeton, ndaq bengaq lamun dengan-dengan dunie niki meriq léq side pade.

¹⁴ Ite nenaoq bahwe ite sampun sugul léman kematéan, dait ngalih tipaq idup. Ite nenaoq nike, séngaq ite ngasihin sepade semetonte. Dengan saq ndéq ngasihin sepadene manusie, artine masih tekuasein siq kematéan.

¹⁵ Dengan saq meriq léq semetonne, pade maraq tukang nyematéq, dait side pade nenaoq bahwe tukang nyematéq ndéq bedowé idup sejati dait kekel.

¹⁶ Langan hal niki ite nenaoq kasih Almasih: Bahwe Ie sampun nyerahang idup-Ne umaq ite. Keranaq nike, ite éndah harus nyerahang idupte umaq semeton-semetonte!

¹⁷ Lamun sopoq dengan bedowé lebih, serioq semetonne saq ndéq bedowé, laguq ndéq mélé nulung semetonne nike, berembé dengan nike bau bebase bahwe ie ngasihin Allah?

¹⁸ Bije-bije tiang! Ndaq ite ngasihin cume léq biwih atao cume siq ucapan doang. Ite harus ngasihin siq kasih saq sejati, saq tebuktiang siq perbuatante dait léq dalem kebenaran.

Keyakinan léq arepan Allah

¹⁹ Maraq nike entane ite nenaoq bahwe ite niki asalne léman kebenaran. Maraq nike éndah aténte iniq tentrem léq arepan Allah.

²⁰ Séngaq ite nenaoq, bahwe lamun ite tesalaqang siq aténte, Allah beléqan léman aténte, dait Ie wikan selapuqne.

²¹ Jari, semeton senamian saq tiang kasihin, lamun aténte ndéq nyalahang ite, ite parek tipaq Allah siq keyakinan saq pasti.

²² Dait napi saq ite tunas léman Ie, ite gen nerimaq, séngaq ite taat léq préntah-préntah-Ne dait ite ngelaksaneang napi saq nyenengang Ie.

²³ Niki préntah-Ne tipaq ite: Ite harus percaye léq Bije-Ne, nike Deside Isa Almasih, dait ite harus saling kasihin, maraq saq sampun tepréntahang siq Almasih tipaq ite.

²⁴ Selapuq dengan saq taat léq préntah-préntah-Ne, idup léq dalem Allah, dait Allah araq léq dalem ie pade. Dait ite nenaoq bahwe Allah araq léq dalem ite, séngaq Ie sampun ngicanin Roh-Ne tipaq ite.