1 YAHYA 1 - KITAB SUCI ZABUR INJIL

Manik saq idup

¹ Isi surat niki mengenai Manik saq ngicanin idup, nike Manik saq sampun araq léman penembéq. Tiang pade sampun dengah ie dait serioq mésaq. Tiang pade sampun perhatiang dait negel ie siq ime tiang pade.

² Idup nike sampun tenyatayang, dait tiang pade sampun serioq ie. Keranaq nike tiang pade ngebéng kesaksian mengenai hal nike. Tiang pade beriteang léq side pade mengenai idup sejati dait kekel, saq araq bareng Bapa, dait saq sampun tenyatayang tipaq tiang pade.

³ Napi saq sampun tiang pade serioq dait dengah, nike éndah saq tiang pade beriteang tipaq side pade, adéq side pade bareng kance tiang pade éndah, idup akrab kance Bapa dait kance Bije-Ne, nike Deside Isa Almasih.

⁴ Tiang pade nulis niki adéq angente pacu-pacu gembire.

Allah nike cahaye

⁵ Niki berite saq sampun tiang pade dengah léman Almasih, dait saq tiang pade dait saq tiang pade sampéang tipaq side pade: Allah nike cahaye, dait léq Ie tetu-tetu ndéq araq saq peteng.

⁶ Lamun ite bebase bahwe ite idup akrab kance Allah, padahal ite idup léq dalem saq peteng, make ite beduste siq ucapan-ucapan dait siq perbuatan.

⁷ Laguq lamun ite idup léq dalem cahaye, maraq Allah araq léq dalem cahaye, make ite idup akrab, rukun sopoq kance saq lainne, dait daraq Deside Isa Almasih, Bije-Ne nike, nyuciang ite léman selapuq dose.

⁸ Lamun ite bebase bahwe ite ndéq bedose, ite nipu diriqte mésaq; dait kebenaran ndéq araq léq dalem ite.

⁹ Laguq lamun ite ngaku dose-dosente léq Allah, make Ie setie dait adil, sehingge Ie gen ngampunin dose-dosente dait nyuciang ite léman selapuq kejahatan.

¹⁰ Laguq lamun ite bebase bahwe ite ndéq bedose, make setetune ite anggep Allah jari penduste, dait hal nike nyatayang bahwe Manik-Ne ndéq araq léq dalem aténte.