1 TIMOTIUS 3 - KITAB SUCI ZABUR INJIL

Pengawas jemaah

¹ Mule kenaq ucapan niki, “Dengan saq melét jari pengawas jemaah, setetune ie melétang sopoq pegawéan saq solah.”

² Keranaq nike pengawas jemaah harus dengan saq ndéq bedowé cacat cele, semame léman sopoq senine, tao nahen diriqne, bijaksane, bedowé tate kerame; demen béng dengan nyodoq léq baléne, dait ceket ngajah dengan;

³ ndaq dengan saq girang bowos, atao girang sili. Sebalikne, ie harus gerasaq, demen bedamé dait ndéqne tejariang panjak siq képéng.

⁴ Ie harus tao ngatur keluargene secare solah, dait didik bije-bijene jari taat dait hormat léq ie.

⁵ Séngaq lamun dengan ndéq tao ngurus keluargene mésaq, berembé ie bau ngurus jemaah Allah?

⁶ Pengawas jemaah ndéqne kanggo dengan saq baruq betobat, séngaq laun ie jari sombong dait kene hukuman Belis.

⁷ Ie harus dengan saq solah aranne léq masyarakat; séngaq lamun ndéqne maraq nike, ie gen tehine siq dengan, sehingge ie geriq ojok dalem siasat Belis.

Syarat-syarat dengan saq jari pelayan jemaah

⁸ Pelayan jemaah éndah, harus dengan saq solah dait tulus; ndéq kanggo dengan saq girang bowos siq anggur atao dengan saq mentingang képéng.

⁹ Ie pade harus taat léq rahasie iman saq sampun tenyatayang siq Allah, dait selapuqne nike harus telaksaneang siq angen saq tulus.

¹⁰ Ie pade harus teuji bejulu, dait lamun ternyate ie mule ndéq bedowé cacat cele, baruq ie bau jari pelayan léq dalem jemaah.

¹¹ Senine ie pade harus éndah dengan saq solah, ndéqne dengan saq girang pitnah dengan. Ie pade harus tao nahen diriqne dait jujur léq dalem selapuq hal.

¹² Pelayan jemaah harus bedowé cume sopoq senine. Ie harus tao ngurus bije-bijene dait keluargene.

¹³ Dengan-dengan saq solah entane jari pelayan léq dalem jemaah, gen tehormatin dait jari sayan bani ngeraos mengenai iman ie pade tipaq Almasih.

Jemaah Allah, dasar dait pilar kebenaran

¹⁴ Tiang beharep gen bau jangoq side léq waktu saq ndéq ngonéq malik. Timaq maraq nike, tiang tulis surat niki tipaq side,

¹⁵ adéq lamun tiang telat dateng, side sampun nenaoq berembé ite harus idup sebagé keluarge Allah, nike jemaah Allah saq idup. Jemaah niki saq jari pilar dait dasar kebenaran.

¹⁶ Ndéq araq sopoq dengan juaq saq tao nilas, berembé beléqne rahasie ibadahte: Ie saq sampun nyatayang diriq-Ne léq dalem wujut manusie, dait tenyatayang kenaq siq Roh Allah, dait tesaksiang siq pare malaékat. Beritene teumumang léq antare bangse-bangse saq ndéq kenal Allah, dait Ie tepercaye léq dalem dunie dait teangkat ojok dalem kemuliean.