YOHANES 8 - PERJANJIAN BARU NALCA YUBA

Malya Umok Gel Ge Yesus Ak Bo Yeilimek Yuba

¹ Bok, Yesus ak dara, Zaitun meinik sam bilimok.

² Onoʾ Yesus maboka gwelegok dara, hyak lugunaʾ nong enyek, Yerusalem heikek Imik Neyung ek yeilimok. Dara, nimi nauba al damak mamagal yeilimek dara, alda bukoka, onoʾ Imik Neyung yuba sikenek lelesuk.

³ Ban salek enyek, Yahudi yuba neksin nang eb, Parisi nang eb dara, malya umok gel gek bomeekanya, Yesus ak yeiniboka gel ak anda hnon laga seklom aboka orugomeekanya,

⁴ Yesus ak lelemekja, ”Neklesilimnya o, ban gel gen era malya ul yabok enyek eiyimakaʾ anasa, bo yeilimab.

⁵ Dara, Musa bedya unuwanalum an yuba nuk lebsukaʾ ara, onoʾ ban anaso malya ubija geleb ara, girik adya salyaʾ ololulum amok anasa, wenyek anja dara, hekaʾ senelam do?” aboka heimek.

⁶ Ban nenera, Yesus adya dara hek hulul do aboka, alja wenyhelyaʾ yub edya alak malya uyiwanobaʾ aboka sene heimek. Bok, Yesus sokok sam genib lobonggoka, soruk adya soko dubuk momnya dolomok.

⁷ Yahudi nang adya sene hek hulul do aboka Yesus ak saaboka heildibilloklemek dara, alda sekoka sikenek lebokja, ”Wera or ugun gangganek sam ara, malya unaʾ oroknya bedya, gel genyek, men girik adya doboka oblul,” hyok.

⁸ Dara, Yesus ara onsok sokok genib lobonggoka soruk adya soko dubuk momnya dobok.

⁹ Yesus adya ban wenhyok yuba kemek dara, Yahudi nang era, nauba nang sok ab ara, mek nang ek moruwoka, hnonok-hnonok sen-senem aboka balameekanya, dengaboka, gel ab Yesus ab ok, anyagan lobsik.

¹⁰ Dara, Yesus ara sekoka gel genyek lebokja, ”Genong o, sikda har sam byak do? Anak ben hnon ogenaʾ orok de?” hyok.

¹¹ Wera, gel genedya Yesus ak, ”Neyung o, yo orok,” hyok. Dara, Yesus adya malya umok gel gek lebokja, ”Nababya obnenggununggenaʾ anasa, amba or binilam bok, wenera malya unaʾ pik ara hyak lobongganalam,” hyok.

Yesus Ara Sokok Sam Dilinaʾ Ulumla Yuba

¹² Dara onoʾ, Yesus ara nim ek yuba lelesuk dara, lelesukja, ”Nara sokok an dilinaʾ ulumna e. Anasa, nak diriga yalanelnya bera, alda embengaʾ dilinaʾ ak sam ulmorulumnamla,” hyok.

¹³ Dara, Parisi nang adya Yesus ak lebekja, ”Anja unululamaʾ ak ara, an damnya bedya ok leldalalamaʾ anasa, ban yuba dib senewanggunenjab,” hyek.

¹⁴ Bok, Yesus adya Parisi nang ek lebokja, ”Na yasaʾ ak ara, onoʾ saaboka binimnaʾ ara, ella ulumna bok, ugunuk dara, hyak dib lelemna.

¹⁵ Ugunda nim adya unulumaknya nenesa sunuwoka yana lelelelum bok, nak dara, nimi hnonok sibin anaba yana kinggulusin.

¹⁶ Dara onoʾ hnon, nabeyok unggulumna, Neyung be nak sokok bokol yeilinyoknya bera, nablaboka ulunamaʾ anasa, nadya yuba lelel yabasinya dara, hyak beknaʾ dangalamla.

¹⁷ Musa bedya unuwanalum an yuba momnya dobokaʾ ara, Nimi penya yuba lelerak dara, nera pero balamla, alamla.

¹⁸ Anasa, nadya unulamnaʾ ak dara, nak hnon leldalamna. Neyung be, na sokok sam bokol yeilinyoknya bedya hnon nak lelenel,” hyok.

¹⁹ Parisi nang edya alak, ”Anjaʾ neyung bera hanyagar ulumla do?” aboka heimek. Dara alja dara, ”Nunda penya nidyaʾ ugunja dara, elgom ulusulum. Ugunda nak ella ubnesom dara, wera nadyaʾ neyung anaba ella ubnesom,” hyok.

²⁰ Yesus adya ban nidyaʾ wenyaboka lebokaʾ ara, Yerusalem heik Imik Neyung ek sam rupiah beillilimekaʾ ok berem sekoka lemok. Bok ban salek era, alak obnemek salek anam danggumokaʾ anasa, nimi hnon alak salawanggumek.

Na Binyaʾ Ak Ara Yanggunulum Aboka Lebok Yuba

²¹ Dara onoʾ Yesus adya, hnon saaboka lebokaʾ ara, ”Nara binya dara, ugunda nak elemnenulum bok, ugunuk dara, ugunda malya ubgiga balamnelumukanya, somoklomnelum. Ugunda na binyaʾ ak ara, ugunda yamenggom dangalemnesil,” hyok.

²² Dara, Yahudi dub nang adya heibdangoka lelemekja, ”Na binyaʾ ak ara ugunda yamenggom alamlaʾ anasa, al damnya obdanamlaʾ ak lelemla de?” aboka lelemek.

²³ Dara, onoʾ Yesus adya sikenek ara, ”Ugunda sokok ab yeililum, nara imik ab yeilimsa. Ugunuk dara, anyagan sokoknya nek ululum, bok nak dara, anyagan sokoknya bek unggulumna.

²⁴ Ban damok enesa leboka, ousa era, ugunda ugunja malya unaʾ ak sam somoganalum abmeisinaʾ ara, ban nenesa lebmesin. Nera aldib, ugunda nak, bera alan senewoka, dib senewoka dobnenggununulum dara, ugunja meneng malya unaʾ lomok sam somoganalum,” hyok.

²⁵ Dara Yahudi nang edya, ”Wera anda onoʾ heknya do?” aboka heibek. Danyek Yesus adya sikenek lebsukaʾ ara, ”Sobaʾ lelesin sok ok ulumna.

²⁶ Nadya ok ganya doboka yuba nauba ugunuk nekoka yana lelewanasisinya. Bok, nak bokol yeilinyoknya bera dib nong ulumlakanya, alja anyek leblul senewoka neklenelnya nok sokok lelemna bar,” hyok.

²⁷ Dara Yahudi nim edya dara, Yesus bedya ban wenyaboka lelemlaʾ ara, Imik Neyung amba lelemla senewoka ella danggumek.

²⁸ Anasa wera, Yesus adya onoʾ sikenek ara, ”Ugunda Imik Neyung adya bokol yeilimoknya nimi dibaʾ me, imik beibnelum sum enyek, nara heknya ulumnaʾ ara, ella danalum. Dara, onoʾ nadya yokaʾ-yokaʾ unulamnaʾ ara alja ganya doboka ununggulumok, alda al bokol yeilimoknya bedya lelemokaʾ ok sunuwoka lelemokaʾ ara, ella danalum.

²⁹ Neyung be sokok sam bokol yeilinyoknya bera, nablaboka sobaʾ neikik ulunam. Nara alja ganya perob senelamnaʾ anyek, sobaʾ unulamnaʾ anasa, alda nak lo banggulunel,” hyok.

³⁰ Yesus adya ban nidyaʾ wenyalamok sum enyek, nimi nauba alak dib senewoka domek.

Yesus Ara Dib Senemek Nang Ak Lebok Yuba

³¹ Dara, onoʾ Yesus adya Yahudi nang alak dib senemek nang ek lebokja, ”Ugunda nadya lelesin yub ek salabmoubmun dara, aldib, ugunda nak diriga yalalum nim ulumnulum.

³² Ban nenyek dib unulumun dara, aldib ugunda hekab-hekab dib ulumlaʾ ara ella danalumukanya, ban dib unaʾ enedya ugunuk gobdo lob lobnesil,” hyok.

³³ Sikda alak, ”Nunda Abraham nang yilaʾ ulumabakanya, nunda yok nimi wa wen nimi danganaʾ orok anasa, anda hekasa ugunda yok blebdangoka seknelum alasilim do?” hyek.

³⁴ Anasa Yesus adya lebokaʾ ara, ”Nara ugunuk hyak dib lebnesin, Heknedya malya ululanya bera, alda malya unaʾ amba wa wenya ulumla.

³⁵ Wa welemna nang era, wa welenanya bedya ek ara sobaʾ ulmorunggulumla bok, alja me yokaʾ ak dara, alja ek ulmorulamla.

³⁶ Anasa wera, Imik Neyung me adya ugunuk bleboka sekiyiwesilya dara, wera danyek ugunda aldib seleb blebiyiwosuk nimi dangoka ulumnalum,” hyok.

³⁷ Dara, onoʾ Yesus hnon lebokaʾ ara, ”Ugunda Abraham nang yilaʾ ululumaʾ ara eillilisin bok, nadya yub enyek ugunja ganya lomok sam doboka beilinaʾ orok bok adya, ugunda nak obnenobaʾ aboka ulunulumaʾ ara, nara ella ulumna.

³⁸ Bok ugunuk dara, ugunjaʾ neyung be yokaʾ adya lebnanya nok unululum. Neyung benya neikaʾ ulunuma sum enyek eiyimsaʾ anyek, nara lelemna,” hyok.

³⁹ Dara, Yahudi nang lebekja, ”Nunda neyung be yokaʾ ara Abraham ulumla,” hyek. Dara, onoʾ Yesus adya sikenek lebsukja, ”Ugunda Abraham nang yilaʾ dib ulusom dara, alja pe unulumokaʾ anyek unulumnosomaʾ.

⁴⁰ Nara Imik Neyung ak ab, dib yuba keboka neklesin bok, ugunda nak obnenobaʾ aboka dulunulum. Abraham bek dara, ban anaso unuwanggumok.

⁴¹ Ugunda ugunjaʾ neyung be yokaʾ-yokaʾ unulamlaʾ anyek unululum,” hyok. Dara, sikja alak, ”Nunda beiyik ab beiyisin nimi gomaʾ. Nunjaʾ neyung be nong dibaʾ ara al Imik Neyung hnonok ulumla,” hyek.

Ugunda Bisaʾ Mab Ululum Hyok Yuba

⁴² Dara, Yesus adya Yahudi nang ek lebokaʾ ara, ”Imik Neyung ara ugunja neyung be yokaʾ ulumso dara, nara nabeyok ganya doboka salyaʾ lelem sokok an yanggubsa bok, Imik Neyung adya bokol yeilinyok anasa, ugunda nak wanaʾ ulumnesom.

⁴³ Hekasa ugunja ganya lomok sam ara, nadya lelesin yub era ella unggululum do? Nadya lelesin yub ek dara, kebla henggonggom ululumaʾ adya ella unggululum.

⁴⁴ Ugunda bisaʾ dubnya bedya mab ululum. Ugunjaʾ neyung Iblis dubnya bera hyak youmaʾ ek moruwoka dib osinaʾanya ulumlakanya, alda hyak dib unaʾ alak mekaʾ unggulumla. Dib yub ak sam mekaʾ uruma doboka neikaʾ unaʾ ara hyak unggulurak. Alda sondaʾ lenaʾ hwam dubnya ulumlakanya, sondaʾ lelemlaʾ ara aljinya nenesa, doumdigum dangalamla.

⁴⁵ Bok nak dara, dib yub ek lelesin bok, ugunda nak dib senenggulunulum.

⁴⁶ Ugun gangganek ab nimi ben hnonja nak sam anda malya ulum aboka beknaʾ laga aawaneneso de? Orok bok dara, dib nong yuba lelemna dara, ugunda hekasa nak dib senenggulunulum do?

⁴⁷ Imik Neyung ak, al yalamak nim era Imik Neyung yuba perob aboka ganya gwelelek aboka dolomak bok, ugunda Imik Neyung mabo dibaʾ unggululumaʾ adya, kenggululum,” hyok.

Yesus Ara Abraham Be Anam Bok Seleb Ulumok Yuba

⁴⁸ Yahudi nang edya Yesus ak lebekja, ”Imik Neyung yuba donaʾ elgom nang Samaria nimi bisaʾ gologoknya anjubaʾ ara, dib lenjuba do?” hyek.

⁴⁹ Bok, Yesus adya sikenek, ”Nara bisaʾ gologanenggom. Nara Imik Neyung bek imik nenelamna bok, ugunja danyek, nak derewoka walenulum.

⁵⁰ Nara nadya ok ganya doboka nimi giblenokaʾ aboka imik neneldanggulumna. Bok Neyung bedya alja ganya doboka nak gibnokaʾ aboka memelenel. Alda dib yana lelenanya ulumla.

⁵¹ Nara ugunuk dib lebsin, nadya yub ek dib senewoka unululanya bera, alda somoknaʾ hyak loboka ulmoublumnamla,” hyok.

⁵² Dara Yahudi nang edya, ”Nunjaʾ neyung Abraham beb, yok-yok senenggom ununumnaʾ lelemek nang enebabya, seleb somogek bok anasa, anja dara, nadya yub ek dib senewoka unululanya bera hyak dib somoganggunumla alamaʾ adya, wera aldib anda bisaʾ gologonjoknya ululamaʾ ella ulunjab.

⁵³ Nunjaʾ neyung Abraham beb, nidyaʾ ununumnaʾ lelemek nang era nidyaʾ seleb somogomek bok lelelamaʾ anasa, anda heknya do? Anda hyak senenggomnya bek ululam, Abraham bera meknya bek, anasa lelelam de?” hyek.

⁵⁴ Dara Yesus adya sikenek lebsukaʾ ara, ”Nara nim adya nak giblenenokaʾ aboka hogunga bo eldalasinya dara, dib danganggulumneneso. Bok nadyaʾ neyung, ugumba nunjaʾ neyung alalumnya, Imik Neyung bedya imik nenelenel.

⁵⁵ Dara nera, Imik Neyung bek ara, ugunda elgom ululumjok, salyaʾ lelem lelelum. Bok nak dara, alak seleb ella ulumna. Nadya Imik Neyung bek, nara alak elgom ulumna henesinya dara, ugun ululum sok, senenggom sondaʾanya ulumnesinya. Bok, nara Imik Neyung bek ella ulumnakanya, alja yub ek dib senewoka unulamna.

⁵⁶ Ugunjaʾ neyung Abraham bera, nadya sum eimik yenewanamlaʾ eibnamnaʾ anyekaʾ aboka, alda hyak ei-ei ganya bolomok. Wera anasa, eimik seleb eibuk dara, hyak eiya dabok,” hyok.

⁵⁷ Dara, Yahudi nang edya alak, ”Bablong o, anda gibnaʾ denga penya ubnenggulam bok, Abraham bek seleb heng eiyilum de?” hyek.

⁵⁸ Dara, Yesus adya sikenek, ”Ugunuk dib lebsin, Abraham bera anam unggulumok salek, nak men ulumsa,” hyok.

⁵⁹ Banyek kemek dara, alak obnobaʾ aboka girika dol yabek bok, Yesus ara dengaboka Imik Neyung ek sam ab loboka byuk.