YAKOBUS 4 - PERJANJIAN BARU NALCA YUBA

Soko Ab Kwebdangoka Un Yuba

¹ Ugun gangganek an wabdangoka oldanaʾ lanalamlaʾ ara hanyagar ab do? Ugunja sokok anyeb anyek-anyek dobsibya ganya bololumaʾ adya, doluwoka oldalamlakanya, wera damoka beknaʾ dibaʾ ara an anara ulumla do?

² Ugunda dobnob senelelum bok, dobnenggubna dara, wera hnon oldalalum. Ugunda hman ganya boboka, dobnob senelelumnya dobnenggubna dara, wera ugunda mala weboka oldalalum. Ugunda Imik Neyung ak molenggululumaʾ adya, yokaʾ-yokaʾ ara donggululum.

³ Ugunja mololumaʾ ara nunok ok pewosulul senen ganya boboka, malya uboka mololelumaʾ anasa, ugunda molowanaʾ anaba eleknaʾ lobsin dara yokaʾ-yokaʾ hnon donggululum.

⁴ Ugunda hyak bojam unaʾ orok nim ek ululum! Nimi sokok ab kwebdangoka ulumak dara, Imik Neyung ak ara, isaʾ geblemakaʾ ara, ugunda ella ululum de? Anasa nimi ben hnon sokok sam wanaʾ ulunun senelelanya bera Imik Neyung ak ara isaʾanya geblamla.

⁵ ”Nunjaʾ nong lomok ara, Imik Neyung adya beibuk geisa ganya enyek dibum-dibum aboka ulumlaʾ” ara, Imik Neyung yuba momnya dobokaʾ anyaʾ anasa salyaʾ lebok senenggom, mem.

⁶ Ban ununaʾ anaba, Imik Neyung adya nuk elegosuk wanaʾ uboka arasinaʾ enyek hyak senenggomaʾ ulumla. Ban nenesa leboka Imik Neyung yuba bukuk sam ara, ”Imik Neyung ara, ganya imik nenewoka ulumak nim ek lek senelesilikanya, ganya sokok nenebdangoka ulumak nim ek wanaʾ uboka aralesil,” aro momnya dobok.

⁷ Anasa wera, ugunda Imik Neyung bek, nunja dubnya senewoka, pe kelemunukanya, Iblis bek mala bolomun dara, yeiri bindowanamla.

⁸ Ugunda Imik Neyung berem bumun dara, alda ugun berem yanasil. Ugunda malya unaʾ nim o, ugunja soruk era pe mek elekdolulum! Ugunda ganya penya-penya ululum nim o, ugunja ganya enyek geisa nenebdolulum!

⁹ Ugunda hyakaʾ gobdo solom ganya boboka, angwei senewoka, engewoka, ugunja oksenaʾ ganya anyek, engenaʾ geboka, perob ganya anyek, sugunaʾ ganya geboka, ulululum.

¹⁰ Ugunda Wenelesilnya bek ganya sokok nenebdangoka ulululum, dara alda ugunuk imik nenewanasil.

Yok Nim Ek Geklewoka Lenaʾ Mem Aboka Wenewosuk Yuba

¹¹ Na kabo nim o, ugunda geklewoka waldanaʾ ara hyak mem. Neik yuba dolomak nimi moumen geklewoka wabdangoka, yana lelelanya bera, alda Imik Neyung adya unuwanalum an yub ak geklewoka waboka yana lelelamla. Anya ugunda ban Imik Neyung yub ak yana lelelelum dara, wera ugunda Imik Neyung adya unuwolulum alamla yub ek, ununaʾ loboka, alda yana lelen nimi dangalalum.

¹² Alda nim amba yuba meewoka yana lelelesilnya bera hnonok ulumla. Ara Imik Neyung adya hnonok embengaʾ dangiyi somogiyi ulusilnya bek hnonok ulumlaʾ ara an. Anasa wera, ek ululumaʾ adya, wera anda meneng nim ek yana lelelesilem do?

Unuwanamna Senelamaʾ Ak Ara Imik Neyung Ak Bekoka Hyok Yuba

¹³ ”Nunda sumen yok heikek don biniboka, gibnaʾ hnonok uboka bonaʾ dekoka rupiah elemnemab,” ugunda wenyalalum nim era, nadya wenesinaʾ anyek pe kebnelum.

¹⁴ Ugunuk an ampum hekaʾ unuwanasilaʾ ara, ugun dam nang anaba elgom ululum! Ugunda hukaʾ ak anam salek ok laga welenaʾ ara, eimik era dengalamla sokaʾ ak ululum.

¹⁵ Alda ban nenyek wenyhenesom dara perob, ”Imik Neyung adya unuwanamak senemlya dara, nunda embengaʾ ulumeibyekanya, ban unu an unu ulumnamab,” henesom dara perob.

¹⁶ Bok ugunda wenera dengdang ganya boboka nauba nonggo aldalalum. Anya ban unu lelelumaʾ ara malya unaʾ anyaʾ.

¹⁷ Wera anasa, nimi ben hnon pe ununaʾ ara ella ululadyok, ununggulumla dara, malya unaʾ ara alan.