YAKOBUS 1 - PERJANJIAN BARU NALCA YUBA

Gibsuk Yuba

¹ Nara Yakobus bedya Imik Neyung ab, Wenelesilnya Yesus Kristus amba arawoka welenanya bedya, obadya nang yilaʾ ak, mok soko me nidyaʾ ob lelewoka ululum nim ek nadya perob aboka gibsin.

Dib Senenaʾ Ab Geremseng Ella Danganaʾ Yuba

² Hemyabo nim o, ugunuk yokaʾ-yokaʾ damok adya nauba sunulusil dara, ban ara perobaʾ ak ulusil senewoka pe eiya daboka ulululum.

³ Ban unu sunulusil salek enyek, Wenelesilnya bek dib senelelumaʾ adya, wera ugunda pe ganya siklewoka unaʾ dangalamlaʾ ara ella ululum.

⁴ Dara wera ugunja ban unu pe ganya siklewoka wen ululumnya nenedya, ugunda dib ganya kaboka, hnon mekaʾ dangoka unaʾ loboka, ulululumaʾ aboka, alda nauba danggiga balalulaʾ aboka, onoʾ pe diri ulululum.

⁵ Nimi ben hnon ugun gangganek an mek geremseng ululenya hnon ulumlya dara, Imik Neyung ara, salyaʾ wanggulusilnya bek anasa, heknaʾ uboka, geremseng unaʾ ara nimi nidyaʾ eleklesilnya bek anasa, Imik Neyung ak molowalya dara, alak geremseng eleganemla.

⁶ Bok ban geremseng unaʾ eleganenelem aboka molowalenya bera, eleganenel gom orok gom senewoka ganya el meneknaʾ ara mem, alda eleganenelaʾ ak molowan senewoka dib senewolul. Nera ganya el meneknaʾ ara, senenggomaʾ longomna mek gwan ek, kaboʾ adya loksom-loksom alamla sokaʾ ak uboka, ganya enaʾ ara mem.

^7-8 Ban unu ganya eb menegoka unululanya bera, alda ganya pe siklewoka namenaʾ ak unggulumla, alja unulamlaʾ nidyaʾ ara banyek pe unuwanamna senewoka orowek pe gegenggulumla. Anasa wera, ban anaso unululanya bera, alda Wenelesilnya bek ab yokaʾ perobaʾ dobnamna senewoka ganya wenaʾ ara mem.

Bonaʾ Orok Nim Eb Dub Nim Eb Yuba

⁹ Imik Neyung yuba don nimi bok, bonaʾ garana ulumak dara, Imik Neyung adya alak imiknya nenelamla dara, alda bera ei-ei ganya bololul.

¹⁰ Bonaʾ dub nim era holaʾ esaʾ anaso ak haboka denghenemak bok anasa, onoʾ alda bonaʾ dubnya bok yuba dololanya bera, alak Imik Neyung adya sokok nenelamla dara, alda or perob aboka ei-ei ganya bololul.

¹¹ Esaʾ ara henga doroklamla dara, hyak poba nong adya esaʾ ara yalawan dara, hogunga pelemlaʾ damok ara haboka dengalamla. Anasonya neikek, bonaʾ dub nim era, nadya bonaʾ nauba donulul senewoka anam dulumlya salek enyek, al nong ara unu haboka denghenemla.

Nimi Ganya Sunulusil Yuba

¹² Yokaʾ-yokaʾ sunulyamalamla salek enyek, ganya siklewoka ululanya bera pelemlaʾ nong ara an. Anasa wera, ban benera unu sunuwalyebok, alda ganya pe siklewoka ulumlya dara, wera Imik Neyung adya alak wanaʾ ulumeija nim ek embeng unaʾ eleganesin wenyasuknya nera, al hnon eleganamlaʾ anasa, pe ulumla.

¹³ Bok onoʾ nimi ben hnon ban unurub sununaʾ edya sunuwanamla dara, ”Ban sununaʾ era Imik Neyung ak ab yalamla sununaʾ,” anaʾ ara mem. Imik Neyung ara malya ublul aboka yuʾ adya dara hnon sununggulumlekanya, onoʾ aljaʾ anaba nim ak hnon sununggulusilnya, hnon sunuwoka, onoʾ nim ek hnon salyaʾ sunul yamenggulusilnya.

¹⁴ Bok nim ara alja nara anyek-anyek malya unuweisinya senewoka meneng seinilamlaʾ adya, al nong sunuwoka gliboka bo balamlaʾ adya alak sunulamla.

¹⁵ Wera onoʾ malya ubsinya senewoka seinin ganya era seleb gigiwoka unuwan dara, wera malya unaʾ mengelamla, dara onoʾ anyek seleb doka moubna dara, wera eimik dara nimi somoknaʾ bo lanalamla.

¹⁶ Nadya hyak wanaʾ ulusin hemyabo nim o! Ugunuk hyak sondaʾ amba bobnenewoka malya neneweisijik.

¹⁷ Yok-yok perob eleksinaʾ nidyaʾ ara, yok-yok dilinaʾ uyimoknya Imik Neyung adya, imik heikek abaʾ ara dolunglamla. Anya Imik Neyung ara yokaʾ danganaʾ adya, alda yok bokaʾ dangaldinggulumla.

¹⁸ Alja ganya edyok albeyok ganya doboka, alja dib nong ulumla yub edya nuk alja mabo dangiyisuk. Ban unusuknya nera, anadya nidyaʾ yokaʾ-yokaʾ uyimokaʾ ara mek so bok, nuk perob ekla oulyanga dobnokaʾ aboka unusuk.

Yuba Keboka Unulumak Yuba

¹⁹ Nadya wanaʾ ulusin hemyabo nim o, ugunda banyek hyak pe seiniwolulum! Nimi nidyaʾ ara ken dara, berra kebnemak bok, yuba saboka nim ek yu ganya bosinaʾ ak dara, mandewanamak dara, perob.

²⁰ Nimi yu ganya adya, Imik Neyung adya unuwanok senelelanya nenyek bo yangganggulumla.

²¹ Anasa wera, sob sembejaʾanya neb, yu ganya hwamnya neb dara, bobogolulum. Imik Neyung adya alja yub era ugunuk blebsin danasa migib ulumlaʾ anasa, ugunja ganya lomok sam melesilaʾ anyek, ugunja ganya sokok nenebdangoka doblulum.

²² Ugunda yuba kelonggom mem. Ugunda yuba kelolomun dara, yuba dib dolomab e senebdomunuk aboka, yuba kelemunukanya onoʾ unulululum.

²³ Nim Imik Neyung yuba kelemak bok, pe doboka pe ununaʾ orok nim era, nimi heng kemeldanaʾ doboka hogunga kemeldalamnaʾ anasoʾ ak ulumak.

²⁴ Nadya hogung era anasoʾ ak ulumna senewoka keebdan bok, yokok sam yabanek ab dara, har soʾ ak eibdangabman do senewoka ganya eboka hiligeldalamak sokaʾ ak ulumak.

²⁵ Bok, Imik Neyung adya unuwanalum an yub era, nimi blebsinaʾ migib damok ara an ulumla. Anasa nimi nidyaʾ yuba keb loboka hibigal henggonggom pe doboka einiwoka pe keeboka unulumak nim era, alja yok-yok wa welemlyaʾ ara, Imik Neyung adya alak aralamnamla.

²⁶ Nimi ben hnon yuba dolomna ak pe unulamna senebdangoka ululabok, alda yuba sibamaʾ silyum pe bo diri uldanaʾ orok dara, alja yuba dib senelamlaʾ ara salyaʾ lelem dangoka, al damnya sondaʾ leldalamla.

²⁷ Imik Neyung adya nim ek yuba donaʾ ara, yuba pe dib senenaʾ ganya ab, neyung Imik Neyung bek dib senewoka bojam unaʾ damok alja perob senelelanya nera, genonga neyung orok mab ek pe arawoka, onoʾ nenya orokaʾ yamen nim unuruwaʾ oka kwelesil nim ek pe arawoka, sokok anyeb malya ub eleganelyek senewoka, pe diri uldalamak nim era pelemakaʾ ara an.