WAHYU 7 - PERJANJIAN BARU NALCA YUBA

Israeli Nang Ek Ab Wesa Gobsuk Nang Yuba

¹ Nen seleb dara, dombadya lero nang era, soko gokgoba dombadya sek ligiwoka, kaboʾ ara beiyik sam ab hnon, mek gwanek sam ab hnon, onoʾ gal donggalek sam ab hnon, dorogalyek aboka, sala seklemekaʾ ak eibsa.

² Wera hnon kemelamsa dara, yok lero hnon henga doroklamla sam ak ab lanawokaʾ ak eibsa. Lero era Imik Neyung mem an beknaʾ ak bomookanya, alda dombadya lero, soko ab mek ab soldob meneganalum aboka migibaʾ enyek elegosuk nang ek an hyak senenggomaʾ bii aboka,

³ lelemokja, ”Nunjaʾ Imik Neyung bedya wa wen nang ek, mem an beknaʾ enyek asok ak anam denewanggumeibya bok dara, soko ab mek gwan ab gal donggala nidyaʾ, soldel meneknaʾ ara mem!” alamok.

⁴ Wera an mem an beknaʾ denesuk nang hiboka, deng ara anasoʾ ak kebsa. Nimi Israeli nang nidyaʾ nimi yilaʾ sunuwoka doboka denesuk nang era, denga salyaʾ anyek hiboka seratus empat puluh empat ribu nim ulumak, an yub ek kebsa.

⁵ Yehuda nang yilaʾ ek ab dara, denga yubaʾ ara, dua belas ribu nang beknaʾ en denesuk. Ruben nang yilaʾ ek ab dara, denga yubaʾ ara, dua belas ribu nang beknaʾ en denesuk. Gad nang yilaʾ ek ab dara, denga yubaʾ ara, dua belas ribu nang beknaʾ en denesuk.

⁶ Asyer nang yilaʾ ek ab dara, denga yubaʾ ara, dua belas ribu nang beknaʾ en denesuk. Naftali nang yilaʾ ek ab dara, denga yubaʾ ara, dua belas ribu nang beknaʾ en denesuk. Manasye nang yilaʾ ek ab dara, denga yubaʾ ara, dua belas ribu nang beknaʾ en denesuk.

⁷ Simeon nang yilaʾ ek ab dara, denga yubaʾ ara, dua belas ribu nang beknaʾ en denesuk. Lewi nang yilaʾ ek ab dara, denga yubaʾ ara, dua belas ribu nang beknaʾ en denesuk. Isakar nang yilaʾ ek ab dara, denga yubaʾ ara, dua belas ribu nang beknaʾ en denesuk.

⁸ Zebulon nang yilaʾ ek ab dara, denga yubaʾ ara, dua belas ribu nang beknaʾ en denesuk. Yusuf nang yilaʾ ek ab dara, denga yubaʾ ara, dua belas ribu nang beknaʾ en denesuk. Anya, Benyamin nang yilaʾ ek ab dara, denga yubaʾ ara, dua belas ribu nang beknaʾ en denesuk.

Nimi Nauba Adya Einiwamenggoma Dok Yuba

⁹ Nen seleb dara, nimi mandebnaʾ hyak einildaknaʾ oknaʾ anyek, senenggom dub ekla bunaʾ ak, domba me adya saramek seklemekaʾ ak eibsa. Dara, seklemek nim era, nidyaʾ yok-yok mok soko ulumak nim ek ab hnon, nidyaʾ yok-yok nimi yilaʾ ulumakaʾ ek ab hnon, nidyaʾ sikja nimigumaʾ yok-yok unulumak nim ek ab hnon, nidyaʾ yok-yok yuba salamak nim ek ab hnon, an nimi gong danyek ulumek. Sikda geisa dolungnaʾ akleng ongowoka, anya yokol meklaʾ sikja soruk ak leb salawoka bo seklemek.

¹⁰ Anya yuba senenggomaʾ bii aboka, ”Nimi blebsinaʾ ara nunjaʾ Imik Neyung senenggom ekla bunaʾ bululanya bek ab hnon, onoʾ domba me ak ab hnon, lanalamla,” alamek.

¹¹ Dara, lero nidyaʾ ara ekla bunaʾ ab, nonga kaboka wa borob nang eb, dombadya gamyakaʾ ab ulumekaʾ ak aknewoka sek ganagoka, ekla bunaʾ dam berem huk oumuwoka Imik Neyung ak giblemeekanya,

¹² lelemekja, ”Amin! Giginaʾ ab, si imik nenenaʾ ab, geremsengaʾ ab, perob aboka gibnaʾ ab, wa bonaʾ amba giginaʾ ab, migibaʾ ab, senenggom unaʾ ab, nunjaʾ Imik Neyung ak dara, or sobaʾ ulmorululul, aldib or unululul!” wenyaro giblemek.

¹³ Dara anyagan nonga kaboka wa borob nang enedya, be hnon nak, ”Dolungnaʾ geisa akleng ongomak nang era, hek nang uboka, sikda hekmok ab yeilimak nang do?” aboka heibnyok.

¹⁴ Dara nadya benyek an, ”Nadyaʾ neyung o, anda seleb ella ululam,” hesa. Dara onoʾ alja nak, ”Wera an nang enera igina kweboka okna ulusilaʾ ak ab gobek nang era an. Sikja akleng era, domba me eneng adya seleb meka elegoka, geisa nenerobaʾ ak ulumak nang era an.

¹⁵ Wera anedya nang danera, Imik Neyung adya ekla bunaʾ saramek sekoka, inimnek yubyek pik, alja ek sam alsamba welemak. Wera al senenggom ekla bunaʾ ak sam an bululanya bedya, sikenek alja e nera sob goluwanesil.

¹⁶ Dara, sikda gwaneng oka, mek oka, kwebnenggunusil. Anya henga yu ab, yok pob edya dara, sikenek mekaʾ obnenggunusil.

¹⁷ Wera domba me, senenggom ekla bunaʾ ak hnoum ululanya bedya, sik nong ara pe beiyiwoka bo ulumnesilikanya, alda embeng mek luk sam bo balamnesil. Anya wera, Imik Neyung adya sikenek ulusil heng mekaʾ nidyaʾ ara, lubnesil,” wenyaboka lebnyok.