WAHYU 20 - PERJANJIAN BARU NALCA YUBA

Seribu Gibnaʾ Sam Ubnemak Yuba

¹ Dara nara onoʾ kendesa enyek, leronya ben hnon imik heikek abaʾ ara, goluklemokaʾ ak eibsa. Dara, lero enedyaʾ sorukuk ara, somoknaʾ nang dorongnaʾ somoknaʾ gweren selengaʾ pik baknaʾ ab, senenggomaʾ gel heng gasaʾ anyek hnon, salawookanya yanggokaʾ ak eibsa.

² Dara alda youmaʾ eneba ulumoknya senenggom wisa naga bagaʾ era, Iblis goma, Satan goma aboka si silimakaʾ ara an. Wera alda gibnaʾ ara, seribu gibnaʾ lebnamlaʾ anasa aboka, ban gasa heng enedya dibaʾ goubokaʾ ak eibsa.

³ Dara onoʾ al neik lero enedya, bagaʾ era, somoknaʾ selengaʾ lomok boro boublinggok. Dara, alda seribu gibnaʾ ulumlya salek era, anam denghenggulyebok, yok-yok mok soko me ulumak nim era, sondaʾ bobnenewoka malya gebsilyek aboka ubokomokja, ban somoknaʾ gweren selengaʾ pik ara hyak gasa seregookanya, an eilib ara, yok beknaʾ memewok. Wera anya eimik danyek, seribu gibnaʾ ulumlyaʾ seleb dara, or mek ok seʾ ubnamla aboka lob lobongganamla.

⁴ Dara onoʾ, nara perob ekla bunaʾ mandebnaʾ enyeb, an eilibik bulumek nang eb, hnon eibsa. Wera ban nang danyek, nimi yana lelen migib elegosukaʾ ak hnon eibsa. Dara onoʾ al neikek anera, nimi nidyaʾ Yesus bek laga leboka Imik Neyung yuba lero yabanaʾ amba leboka, ya nganga dakoka osik nang ganya ek hnon, eibsa. Sik an nang era, ban yu nongaʾ nong ak hnon, yokaʾ ak al nong sunuwoka memenaʾ ak anyek, gibnenggulumek nang. Dara ban nang dara, bisaʾ ak giblemak nang era an aboka, beknaʾ dibaʾ asok ak gom, soruk ak gom, an beknaʾ beilinaʾ era, orok nang. Ban nenesa leboka, sikda embengaʾ subeekanya, Kristus ab neikaʾ dub nang dangoka, seribu gibnaʾ ulumlya salek era, nimi nidyaʾ sokok nim ek wenewoka bo ulumekaʾ ak eibsa.

⁵ Dara nenyek nimi youmaʾ somogomek nimi mennya suboka bukiyiwanasilnya nera an. Bok yok hnon nim era an seribu badya gibnaʾ ubnemaknya nera anam seleb denghenggulyebok dara, embengaʾ suboka bukiyiwanggunusil.

⁶ Nimi nidyaʾ Imik Neyung mab ulumek bok, men somogorob nimi men subnemak nim era, or pe uboka, munaʾ ulumnamak. Nim eimik hnon sounuwoka somoganamaknya nera sikenek ara hnon mekaʾ bebeganggunusil. Sik nong ara, Imik Neyung ab, Kristus ab dadya, yuba wa gak nim ulumnemak dara, sikda hiboka Imik Neyung ab neikaʾ seribu badya gibnaʾ salek era, nimi nidyaʾ ak wenewoka bo ulumnesak.

Bisaʾ Dubnya Oblamagok Yuba

⁷ Wera onoʾ bisaʾ dubnya Satan ara, henga geregoka gasa ek sam beiyimlyaʾ ara, gibnaʾ seribu badya leblyaʾ seleb salek era, henga lob lobnamla.

⁸ Dara, bisaʾ enedya mok soko me pika dombadya nidyaʾ eb girigoka, yok-yok mok soko nimi nidyaʾ, Gog beb Magog bebdak anyek, sondaʾ lero yibinamla. Dara, nimi bolowesilya nim era, obdanob aboka ebmamaganamlakanya, nimi deng ara, mek weneng anasoʾ ak danamla.

⁹ Wera ban nimi danedya, mok soko me neikaʾ ok niniwoka lobijekanya, Imik Neyung mab longolomek heik era, Imik Neyung adya wanaʾ heik, anyek aknewoka doluwanasak. Bok uk ara imik ab yingginiboka, sik nonga dengaboka denesilikanya,

¹⁰ sikenek nauba sondaʾ leboka malya nenelesuk bisaʾ dubnya Iblis ara, sobaʾ singilamla uk mek gwanek doboka doronggok. Wera anyaganera, men dara, yu nongaʾ ab, sonda leboka bob nenesuknya beb, doronggousuk. Dara sikda anyeganera, inimnek yubyek pik, malya nenewoka nauba sobaʾ gwekelmorulumnemak.

Sidyaʾ Nong Obdakok Yuba

¹¹ Dara onoʾ eimik so era, yok hyak senenggom geisa ekla bunaʾ ek, ana dubuk ara, alak bukumokaʾ ak eibsa. Dara, im ab soko ab, benedyaʾ hogunguk ak ab dengaro lobok adya, ban danedya oulyang era, orokaʾ dok.

¹² Dara onoʾ nimi nidyaʾ, mek nimi, nauba nimi, seleb somogorobnya nera, senenggom ekla bunaʾ beremek sam seklemekaʾ ak eibsa. Anya, momnya dolomok buku gong era, pika bakloro yibuk. Dara onoʾ yok buku hnon, nim embengaʾ un buku enyek, hnon bakok. Wera nimi nidyaʾ somogomek nim, embengaʾ ulumeka wenyek, sikja unulumek ununaʾ gong era, buku enyek an momnya dolosukaʾ sunuwoka, sikenek yana lelewosuk.

¹³ Anya onoʾ, senenggom mek gwan edya nimi somogomek nim alak an ulumeknya nera doboka elegok. Anya somoknaʾ damok ab, alja somoknaʾ nang heik digum, somokdobaʾ anyek ulumek nim era, doboka elegarek. Dara sik nimi danera, sikja yokaʾ-yokaʾ unulumekaʾ nidyaʾ ara, sunuwoka yana lelewosuk.

¹⁴ Dara nimi somoknaʾ damok ab, alja somoknaʾ nimi heik digum eb dara, doboka, sobaʾ singilamlaʾ uk mek gwanek doboka doronggosuk. (Ban sobaʾ singilamlaʾ uk mek gwan alalanya nera, dibaʾ somoganamaknya, penenya nera an.)

¹⁵ Dara, nimi nidyaʾ sikja si, nimi embengaʾ un buku lomok sam momnya donaʾ orok nim era, ban sobaʾ singilamlaʾ uk mek gwanek sam doboka doronggousukaʾ ak eibsa.