WAHYU 2 - PERJANJIAN BARU NALCA YUBA

Epesus Heikek Yuba Donaʾ Nim Ek Lebok Yuba

¹ Epesus heikek yuba donaʾ nimi lero ek, ban unuwoka momnya dobnelam: ”Sekbadya guraʾ soruk ak salawookanya, sekbadya emas uk dininaʾ dam pik yabalelanya bedya yub era an lebsil.

² Anja hekaʾ unululamaʾ ara, anda wa yeiriwoka welelamaʾ hnon, anda ganya siklewoka welmorululamaʾ hnon, nara seleb ella ulumna. Anja ganya era malya ulumak nim ek or unulunok senenggululam. Nimi nidyaʾ yuba lenaʾ gak nang dibaʾ orokjok, nunda yuba lenaʾ gak nang aldalamak nang ek, anda seleb sunubyamalumukanya, sikda sondaʾ hwam nang ulumakaʾ ara, seleb ella dangalum.

³ Anda nadya si amba leboka, igina kwelesilaʾ anaba siklewoka ululumukanya, hmengaʾ danggiga banggululam.”

⁴ ”Bok nara anak sam malya senelenggenaʾ ara, Nak men danyek anda wanaʾ ulunulum sok, weneba anaso ununenaʾ anyek orok ak hnonok.

⁵ Anasa wera ban nenesa leboka, anda hekmok ab malyinggulumaʾ nong anyek pe beknelam! Anja malya unaʾ ak ab wen ganya dangawoka, youmaʾ pe unululum ununaʾ enyek onoʾ unub einiwanalam. Nenyek pe unuwanggunulam dara, nara anak an yeiniboka anja uk dininaʾ era al ulumlaʾ ak ab gwenewoka dobnamna.

⁶ Ban wenyhenaʾ anaba yokaʾ don perobaʾ anak ab ulumlaʾ ara, Nikolaus bek diriga ban maba lek alamnaʾ digum anyek, ambabya lek ganya bololamaʾ anasa, nenyek hnon pelemla senelenggen.”

⁷ ”Heknyek o yakaʾ ara, Imik Neyung Geisinya adya yuba donaʾ nim ek lelemlaʾ ara pe keblul! Heknedya malya unaʾ ak ab oblamaganalanya bera, Imik Neyung perob heik sam nim embeng unaʾ gal doka delemnamla henemna,” aro momnya dobnelam, hyok.

Smirna Heikek Yuba Donaʾ Nim Ek Lebok Yuba

⁸ Smirna heikek yuba donaʾ nimi lero ek ban unu: ”Ban yub enera men youmaʾ ulumokaʾ ara, onoʾ eimik sobaʾ ulmorulumnelanya bedya yuba, alda seleb somogoka onoʾ embengaʾ dangamoknya bedya yub era an.

⁹ Anak an yokaʾ-yokaʾ okna uboka ulunggelaʾ ara nara seleb ella ulumna. Anda bonaʾ garan ululamaʾ ara naba ella ulumna! (Bok saawoka anda aldib dubnya ululam.) Hnon nim era bisaʾ dubnya Satan alja bisaʾ mabo silibaʾ uboka, Yahudi nimi dibaʾ unaʾ orokjok, nunda Yahudi nim aldalamak nim edya anak an, geklewoka derewoka walasakaʾ ara nara seleb ella ulumna!

¹⁰ Wene salek enyek, yokaʾ-yokaʾ igina kwebnenggelnya nenesa leboka, anda lok ganya bonaʾ ara mem. Anda pe beknelamaʾ nong ara, anak sunuwanenggelaʾ ara, Iblis adya ugun gangganek sam hnon nimi doboka gasa ek sam henga geregoka beibnesil. An henga geregoka beiyisilya salek era, lika sagobadya mabnelum. Unuweigijaʾ anaba, anda bojam ululom! Anya somogamen dara, nadya anak dib embengaʾ ulmoubnaʾ huk golunaʾ ek goliyiwanenggen.”

¹¹ ”Heknya o yakaʾ ara, Imik Neyung Geisinya adya yuba donaʾ nim ek lelemlaʾ ara pe keblul! Heknedya malya unaʾ ak ab oblamaganalanya bera, eimik somoknaʾ damoka lanawanamla sum era, alak bebeganggunumla,” aro momnya dobnelam, hyok.

Pergamus Heikek Yuba Donaʾ Nim Ek Lebok Yuba

¹² Pergamus heikek yuba donaʾ nimi lero ek ban unuwoka momnya dobnelam: ”Ban yub enera u penyaʾ paranga sala ululanya bedya yub era an.

¹³ Nara anda har sam ululamaʾ, nara seleb ella ulumnaʾ ara, anda bisaʾ dubnya Satan bedya dub heikek sam ululam. Anyek bok, anak dara, nadya si nek hyak pe bojam ulunelem. Nadya bojam unenya Antipas be ugunja heikek obek sum eneba, anja dara, nara Yesus ak dib senenggulumna aboka gunuwoka lebnenggublum.”

¹⁴ ”Ban unulum bok, onoʾ yok-yok unaʾ hnon unululamaʾ anyek, nara lek senelamnaʾ ara, nim an gangganek sam hnon, Bileam bedya neklesil yub ek salabmouboka ulumak. Bileam bedya dara, Balak bedya Israeli nim ek hekaʾ huboka malya unaʾ lomok bobonggesukaʾ anyek nekemok, bisaʾ ak sam beil balamek denaʾ delelulum, hnonda gela salyaʾ salelulum aboka neklesilom aboka nekemok.

¹⁵ Dara, hnon ugun gangganek ara, Nikolaus bedya neklesil yub ek neik so salawoka ulumak nimi hnon ulumak.

¹⁶ Ban nenyek dara, al wene salek enyek, ganya dib dangawanalam! Unuwanggubmen dara, nara mek anam yanamnakanya, nadyaʾ sibamaʾ ak an ulunel parang enedya sikenek obnesin.”

¹⁷ ”Heknya o yakaʾ ara, Imik Neyung Geisinya adya yuba donaʾ nim ek lelemlaʾ ara, pe keblul! Heknedya malya unaʾ ak ab oblamaganalanya bera, doknowoka ulumla mana gwaneng delom aboka elegoka, nadyaʾ geisa dangman girik era benyek eleganamna. Ban girik enyek ara, yok nim elgom ulumak. Alda sik dobnemak nim edya ok ella ubnemak wenyok si nenyek, momnya dorob girik ek eleganamna,” aro momnya dobnelam, hyok.

Tiatira Heikek Yuba Donaʾ Nim Ek Lebok Yuba

¹⁸ Tiatira heikek yuba donaʾ nimi lero ek ban unuwoka momnya dobnelam: ”Ban yub enera Imik Neyung bedya me, alja heng era uk bokaʾ laralamlaʾ anaso uboka, alja yan era gabya silikaʾ uka damnaʾ ak seng-sengaʾ mengewoka delemlaʾ sokaʾ ak delelanya bedya, yub ek ulumla.

¹⁹ Anja unululamaʾ ara, nara nidyaʾ ella ulunggen. Anera, anda wanaʾ ululamaʾ hnon, anda dib senelelamaʾ hnon, nidyaʾ ara nara seleb ella ulumna. Anya anda yok nim emba aralalamaʾ hnon, anda siklewoka welmorululamaʾ ara, nara seleb ella ulumna. Hnonda anda youmaʾ dara, wa welelum bok, wenyek danyek, nauba welelamaʾ ara, nara seleb ella ulunggen.”

²⁰ ”Bok nara anak igin ganya bolenggenaʾ ara, Imik Neyung adya lelemla aboka laga sondaʾ amba lelemla gel Izebel gek, eil lololamaʾ ak, banyek hnonok ulumla. Nimi nadya wa wen nang ek sondaʾ leboka, gela salanaʾ nauba unuwoka, bisaʾ ak beil balamak denaʾ bukoka dero yabalemakaʾ ak, bobnenewoka malya pik bo ablesil.

²¹ Anasa, alja malya ulumlaʾ ak ab ganya dangawolululaʾ aboka, ganya dangan salek elegasebok, alda nauba malya uboka, salawoka malya uluneseng ganya ok bolomla.

²² Wera anda kendelom! Gel genyeb, sikda alak malya ulumak nim eb, ban unulumakaʾ nidyaʾ ak ab ganya dangawanggunumak dara, al nonga doboka, gweklamla ekla manaʾ ak boboganamna. Dara anyek anyeb al nong ab alak salalemak nang eb dara, oka nauba gweklemnemak.

²³ Anya gel genedya mab era, dengaboka obnamna. Anya, yuba donaʾ nimi nidyaʾ ara, nara nimi nong lomok ab ganya lomok eboka eillilesinya bek ulumnaʾ ara, ella danamak. Anasa leboka, ugunja nidyaʾ unululum sok sunuwoka ugumba deknesin.”

^24-25 ”Bok ugun yok nimi Tiatira heikek ululum nim era, ban malya unaʾ yub ek sunuwoka ununaʾ loboka, Satan bedya hyak lomok so unuwanalum alalanya nek ara einiwoka ella danganggululum nim ek lebsin. Ugunuk an hekaʾ ulusilaʾ anyek, pe salabmoubuka ulumunaʾ moruwoka na yanamna. (Nara anak an yok igin yakaʾ ara hnon eleganggununggen.)”

^26-27 ”Heknedya malya unaʾ ak ab oblamaganamlakanya, nadya unuwanok senelamnaʾ anyek unubmoruwanalanya bek ara, yok soko-yok soko nimi nidyaʾ wenewosululaʾ aboka, nadya neyung bek ab migib unaʾ domsa unaʾ enyek, onoʾ alak hnon eleganamna. Dara, Imik Neyung bukuk sam momnya dobok sok, Alda gasa gamaʾ dungunaʾ boboka mok soko me nidyaʾ alja dub dangoka wenelemnesilikanya, onoʾ alja soko adya memelemaknya jobol meneklemak sok, alja unub meneganesil.

²⁸ Dara, nara alak yale sam guraʾ ak eleganamna.”

²⁹ ”Heknya o yakaʾ ara, Imik Neyung Geisinya adya yuba donaʾ nim ek lelemlaʾ ara pe keblul!” aro momnya dobnelam, hyok.