WAHYU 19 - PERJANJIAN BARU NALCA YUBA

Babel Heika Malyinggyukaʾ Amba Sebek Ber Yuba

¹ Ban nen seleb dara, imik heikek ara, nimi gong longowoka yuba irir aboka salamnaʾ anaso ak kebsaʾ ara, ”Haleluya! Imik Neyung ak or giblenob e! Blebsinaʾ ab, si imik nenenaʾ ab, migib unaʾ ab dara, nunjaʾ Imik Neyung aljaʾ ak ulumla. Alak giblenob e.

² Alja yana lelelesilaʾ ara hyak perob ok beknaʾ sunuwoka pe unulusil! Imik Neyung era, sokok an alak salalemek malya unaʾ edya senenggomaʾ malya nenelesuk gel gek seleb igina elegok. Anya, Imik Neyung mab alsamba welemek obsuk nang era, sikja eneng emba dara, Imik Neyung adya gel genyek an seleb dirigok,” wenyaboka lelemek.

³ Dara onoʾ hnon yuba salameknya nera, ”Haleluya! Imik Neyung ak giblenob e! Alak uka daboka olomlya solom era, sobaʾ welelemnamla!” wenyaboka lelemek.

⁴ Dara, domdaraʾ badya nonga kaboka wa borob nang eb, yok gamyakaʾ dombadyaʾ ab dara, Imik Neyung alja ekla bunaʾ ak bulumoknya bek oumuwoka, ”Amin! Haleluya! Aldib e, or Imik Neyung ak giblenob e!” wenyaro giblemek.

Yesus Adya Gela Dobok Yuba

⁵ Ban nen berem ara, senenggom ekla bunaʾ ak ab, yuba hnon lanawokaʾ ara, ”Nunjaʾ neyung Imik Neyung ak giblelulum e! Wei, or mek nanga nauba nang, ugun alja wa wen nang nidyaʾ, ugun alak lok ganya bolulum nang era, onoʾ weneba alak gigilelulum e!” wenyalamek.

⁶ Dara nara, onoʾ nimi gonga longowoka yuba irir aboka salamna anaso ab, mek lumdam yub ollallek anaʾ anaso ab, liminga gururu anaʾ yub anaso ab dara, an unurub digum anasoʾ adya wenyalamokaʾ ak kebsaʾ ara, ”Haleluya! Nunjaʾ Wenelesilnya Imik Neyung senenggom migib yaknya bera, wera seleb dubnya dangoka wenel yabalasil. Imik Neyung ak or giblenob e!

⁷ Domba me gela don sum era, seleb oka dalakanya, alja dobnamla gel gera seleb meebgogowalaʾ anasa, wera nunda nidyaʾ ara eiya ganya boboka, eiya hlaboka glolomnemabakanya, alja si imik nenelemnemab!

⁸ Anya nimi gel dobnamnaʾ anasa ongolomakaʾ melelaʾ namenaʾ uboka geisa perob akleng era, ongowolulaʾ aboka seleb alak an elegal,” wenyalamekaʾ ak kebsa. (Ban melelaʾ namenaʾ boksom era, munaʾ Imik Neyung mab adya, sikja perobnya unulumakaʾ ara an.)

⁹ Dara onoʾ lero adya nak hnon, ”Banyek momnya dobnelamaʾ ara, Sik domba me gela dobnamlaʾ ak an masa del yanalum henesil nim era pe ulumnamak, momnya dobnelam,” henyok. Dara onoʾ hnon lebokja, ”Ban lebna yub dara, Imik Neyung bek ab uboka, hyak aldib nongaʾ ak lebna yub era an,” wenyhenyok.

¹⁰ Wenyek, nara al yan berem oumuwoka gibnunaʾ ul yabasa bok, alja dara, ”Anaso ununaʾ ara mem! Nababya anaso uboka, an kabo Yesus ak laga lemok yub ek salawoka ulumak nang eb, neik wa wen nang ulumab. Alda Imik Neyung ok giblelom!” wenyhenyok. Anasa Yesus ak laga lenaʾ ara, ununumnaʾ len ganya era an.

Imik Neyung Bek Ab Yubnya Yuba

¹¹ Dara onoʾ hnon eimik so danyek, imik heikek ara gaboka, wera nim abaksin pama, kul pam ek eibsa. Pam en abagemoknya bedya alja si nera Bojam hwam uboka, dib nongnya aboka simek. Alda nimi henga goubnaʾ ab, mala weboka oldanaʾ ab dara, pe senenya loboka yana lelelesil.

¹² Alja heng dok era, uk bokaʾ anaso singiwoka, alja hukuk ara, yokaʾ-yokaʾ ak oblamaganaʾ amba donaʾ ara gong uboka, al nongok ara, alak ok ella ulumla si nenyek, benyek an ulumok.

¹³ Dara alja waran akleng era, eneng lomok sam hwiboka ngikimek akleng enyek ongomookanya, wera alja si nera, Imik Neyung bek ab yubnya, alamek.

¹⁴ Dara imik heikek sam yin bonaʾ ulumak nanga nidyaʾ ara, perobaʾ geisa boksom ok ongob dirigoka, nim abaksin pama, kul pam ek bukoka alak diriga yabalamek.

¹⁵ Dara, aljaʾ sibamaʾ ak ab hyak yu nong parang enesoʾ ak lanawoka, parang enedya mok soko me nimi nidyaʾ oblamagoka, alda dub nang edya gasa gamaʾ edya wenewoka bo ulumnesil. Anya Imik Neyung migib yaknya bedya yu sen-sen aboka obnesilaʾ ara, anggur meka londenaʾ ak anggur dok londelemak sok, unuwoka obnesil.

¹⁶ Hnon aljaʾ akleng ek ara, anya eilik ab dara, Mok soko me dub nang nidyaʾ dubnya ulumlakanya, nidyaʾ wenelesak nang dubnya ulumla, wenyaboka momnya domek si nenyek ulumokaʾ ak eibsa.

Sondaʾ Ununumnaʾ Lenaʾanya Oblamagok Yuba

¹⁷ Wera onoʾ nara hnon kemel yabasa dara, lero ben hnon heng lomok sekoka, alda im hnoumung nonga kwebdo yabalamok wining gong ek, yuba yeiriwoka saboka lel yabokja, ”Anyagan yoululum! Imik Neyung adya denaʾ youmlaʾ ak, hyak senenggomaʾ meemlaʾ ak neikaʾ mamagoka ubibyekanya,

¹⁸ ugunda mok soko wenesin nang edya soub eb, yina bonaʾ dub nang edya soub eb, mal si sinaʾ uboka oldanaʾ geremseng nang edya soub eb, abaksin pam soub eb, pam enyek an abakna nang edya soub eb, or mek nang gom, senenggom nang gom, sikbeyok un nang gom, nim amba wa salyaʾ wen nang gom, sikja soub eb danyek, or denelum anasa, yoululum,” wenyaboka bii al yabokaʾ ak eibsa.

¹⁹ Anya nara, ban yu nongaʾ ab, sokok an wenesin nang gong eb, sikja yin bonaʾ nang gong eb dara, sikda kul kuda pam abagamoknya beb, alja yin bonaʾ nang eb danyek, mala boboka obdanobaʾ aboka seleb mamagamekaʾ ak eibsa.

²⁰ Dara ban yu nongaʾ ab, anyeb neikaʾ dara sonda leboka gamyakaʾ hogung ak yok-yok damoka memelemoknya beb, henga goubsuk. Ban sonda lelemoknya bera, beknaʾ dibaʾ yok so damok unulumokaʾ adya, sikda gamyakaʾ adya beknaʾ doboka, aljaʾ sunumnaʾ ak giblemek nang ek bob nenesuknya. Wera sik penya danera, gasaʾ adya sobaʾ singilamlaʾ uk mek gwanek, embengaʾ somobdaboka obsuk.

²¹ Wera ban abaksin pam eilib abagamoknya bedyaʾ sibamaʾ ak ab goblomok parang enedya, yok isaʾ nang era, nidyaʾ saboka hyakaʾ obsuk. Dara wining mandebnaʾ ara, gong-gong yeiniboka obsuk nanga soub enyek delemeekanya, mona bulusukaʾ ak eibsa.