WAHYU 18 - PERJANJIAN BARU NALCA YUBA

Babel Heika Malyinggyuk Yuba

¹ Wera nen seleb dara, lero be hnon imik heik ab yinggyukaʾ ak, nara eibsa. Alda senenggom migibaʾ yaknya uboka, alja senedyaʾ era, soko nidyaʾ dilinaʾ ok ub lobok.

² Dara alda yuba migibaʾ nauba bii aboka, ”Seleb malyinggil! Ban Babel nauba heik era seleb malyinggil! Anya, wenera bisaʾ gong danyeb, yu hwam ganya adya un oulyanga dal. Anya ane lomok an nidyaʾ ab, hyak malya anasa lek senelemak wining gong eb danyek, ulumak.

³ Dara, yok-yok mok soko ulumak nim era, alja salyaʾ salaleneseng ganya anggur mek enyek, seleb sikda jek. Hnonda sokok an wenewoka bo un dub nang eneba, alak salyaʾ salawoka, sokok an bonaʾ dekdo yaben nang eneba, alja salyaʾ salaleneseng ganya youruk-youruk anaʾ enedya dub dangamek,” hyok.

^4-5 Hnon onoʾ imik heikek ab yok kebsenya nera, ”Alja malya unaʾ hwam era deknebgiga balamlaʾ ara, imik si singiwanamlakanya, Imik Neyung ara alja malya unaʾ ek seiniwanamlaʾ anasa, ugunda nadya nim edya alja malya unaʾ hwam enyek dilildo dobnenggom. Anedya igina kwenaʾ ara, alab neikaʾ dobmunuk aboka, alak ab loblulum! Alak ab loboka, ane lomok ab goboka yibilulum.

⁶ Dara, alja ugunuk unulusukaʾ sunuwoka, onoʾ albabya unuwanalum. Anya alja unulusukaʾ amba dara, anyek ugunsamba beiyisuk sok, onoʾ albabya lunuwoka penya yandara diriganalum.

⁷ Hnonda alak ara, nauba perobnya benya anaʾ ab, dub dangoka pe ulumokaʾ sunuwoka, ganya okna danganaʾ ab, ganya soloma dabnaʾ ab, danyek alak eleganalam. Hnonda al nong anasa, sobaʾ leleladya, Nara nenya somogamna gel gomaʾ, nara wenewoka usin dub gel! Anasa nara ganya okna dabsinaʾ ara, hnon nak dobnenggunusinya, wenyaboka nonggo alamla.

⁸ Wera an wenyaboka nonggo anaʾ anasa, neik sum ok gwaneng okaʾ ab, ganya angoo senenaʾ ab, somoknaʾ damok ab, alak yamab gouluwanamla. Dara Imik Neyung ara, alak yana lelenanya bera senenggomnya ulumlaʾ anasa, alda uk adya garaʾ selewoka deregoka hama buknamla,” wenyaboka lel yabokaʾ ak kebsa.

⁹ ”Hnonda sokok an wenesin dub nang era, alak neikaʾ salyaʾ salawoka ulumeija nang era, onoʾ ban gel gedya dub dangoka pe ulumakaʾ bokoka domek nang enyek, sikda alak uka delemlya soloma welelamlyaʾ eibnemak dara, alsamba ganya ingmuna berewoka engewanamak.

¹⁰ Anya onoʾ alja gwegoka unulamlyaʾ, hyak okna anyek, nuk doroweisilyek senewoka, mok seklemnemak. Dara sikda, Lok bar, Babel heik ara, hyak migib nong bok, alak igina dobokaʾ ara, hyak omom nong! Wera wene salek ok bok, anak igina kwenaʾ adya, seleb malya gebgel,” wenyaboka lebok.

¹¹ ”Dara onoʾ, sokok an bonaʾ dekdo yaban nang eneba, nimi sikja bonaʾ dekoka donaʾ orok anasa, alsamba ganya ingmun berewoka, nauba geklewoka engewanemak.

¹² Anya, sikja emas bonaʾ gom, perak bonaʾ gom, dangman gom, meilik gom anaba, hnon deknenggunumak. Hnonda, goulun boksom gom, namenaʾ anyek ongon boksom gom, imengen gwaneng bunduk boksom gom, goron boksom gom, onoʾ yok-yok perob gal eneba, dobnenggunumaakanya, nauba deklemek perob-perob gal eb, gaja pam bong ab, besi bonaʾ gasaʾ ab, tembaga bonaʾ ab, yok perob girik eneba, hnon dekoka dobnenggunumak.

¹³ Anya onoʾ, perob gal bokaʾ ab, doknaʾ galdok ab, so meklaʾ ab, weik ab, perob song meklaʾ ab, anggur ab, pam mek ab, gwaneng werenaʾ aso ab, gandum ab, sapi pam ab, domba pam ab, abaksin pam ab, gliboka bo yabasin ekla bunaʾ ab, wa arawoka wen nang eb, anya nimi nong anaba, hnon dekoka dobnenggunumak,” hyok.

¹⁴ ”Anasa ban bonaʾ dekdo yaben nang era, ban gel genyek an, anja yokaʾ-yokaʾ nidyaʾ dobsinya senelelamaʾ ara, wera denghyok. Anya anja hyak dub dangoka pero ululamnya nera, seleb denghel. Anasa wenera hnon anasoʾ digumaʾ ara, onoʾ saawoka hnon eibnenggunulam, wenyaboka lebnemak.

¹⁵ Dara ban dek girigoka alak ab dub dangameija nang era, alak ganya okna daboka unaʾ anyek, nuk doroweisilyek aboka, mok diri seklemnemak. Hnonda sikda ganya ingmun berewoka engewoka,

¹⁶ lebnemakja, Lokja, alda si sinaʾ heik bok, malyaʾ nong anyek dobla! Alda namen boksom ab, goron boksom ab, imengen gwaneng bunduk boksom ab, ongowoka, meilik ab, dangman bonaʾ ab, emas ab dadya, e diblelabok unuwal!

¹⁷ Dara alja dub dangoka ulumlaʾ nidyaʾ ara, wene salek ok, nidyaʾ ara dengaro lobla, henemak. Hnonda nauba mek ekla bunaʾ bon nang eb, an eilibik wekemeijaʾ anyek, bosilya nim eb, ane lomok welemeija nang eb dara, mok ab sekoka ngouluganemak.

¹⁸ Anya sikda ban heik enyek, uk adya bluboka delemlyekanya soloma lo welelamlyaʾ anyek eibija dara, sikda unuwamen heikek, gomaʾ senewoka, ban nauba senenggom heik era, hnon anasoʾ heik era, yoknya nera unggululabok! wenyaboka, hina kwe aboka ngouluganemak.

¹⁹ Dara sikja ganya soloma dabnaʾ dibaʾ ara, sikjaʾ hukuk aso dakdangoka, mamagoka ban wenyaro engewanamak: Angoo, ban naubaʾ senenggom heik era, hyak malyaʾ dalaʾ ara, lok bar! Anya, alja bonaʾ mandebnaʾ edya mek dubuk yabalamlaʾ bolomak nang nidyaʾ ara dub dangiyiwousuk! Bok alja yokaʾ-yokaʾ nidyaʾ ara, wene salek ok dengaro lobla! wenyaro engelemnemak,” hyok.

²⁰ Hnon kebsenya nera, ”Dara Imik Neyung ara, alja ugunuk unulusukaʾ ara, seleb lunuwoka alba dirigalaʾ anasa, wei, imik heik o, ganya heklom. Wei, munaʾ Imik Neyung mab o, yuba lenaʾ gak nang o, ununumnaʾ len nang o, anera hyak pewal senewoka ganya heksulul!” wenyaboka lebokaʾ ak kebsa.

Babel Heik Ara Saawoka Merewanggunumla Yuba

²¹ Wera nen seleb dara, lero be hnon hyak senenggomnya bedya, nauba girik dam e girik enesoʾ ak, dobsalawoka, mek gwanek bobogol yabookanya lebokja, ”Babel heik nauba si sinaʾ heik era, ban anaso unu yeiriwoka boboganamlaʾ adya, hyak gobdo soldowanamlakanya, hnon saawoka eibnenggunumak.

²² Hnonda benggong lenaʾ yub gom, bera sebnaʾ gelewa edya ber sebnaʾ gom, poo anaʾ benggong yub gom, gegena porobaʾ soruk adya siklewum-siklewum alamak benggong yub gom, anak ab dara, hnon kebnenggunumak! Anya, yok geremseng uboka wa wen nang hyak unggulumnemak. Dara, yokaʾ ak girika ya seiknaʾ yub eneba hnon ane lom pik ab kebnenggunumak.

²³ Anya nim ara lampu dilinaʾ gom, nenya gela domna enyek eiya hlaboka sanaʾ yub gom digum danaba, hyakaʾ hnon kebnenggunumak. Hnonda anja bonaʾ bo dekel giriknaʾ nang era, senenggom nang ulumeekanya, yok-yok mok soko nimi nidyaʾ ara, anja bobnenewoka sonda lebsulum.

²⁴ Anasa ban Babel heikek igina kweiyiwokaʾ ara, an heik lom enyek anera, ununumnaʾ len nang enenga ab, munaʾ Imik Neyung mab eneng ab, eibukaʾ anasa unuru obok. Dara, ban ok gom, alda soko dubuk an nidyaʾ obsuk nim eneng eneba, eibuk,” wenyaboka lebok.