WAHYU 17 - PERJANJIAN BARU NALCA YUBA

Babel Heik Ak Yana Lelewok Yuba

¹ Wera nen seleb dara, ban sekbadya lero nang era, sekbadya nimi somogollisinaʾ bomek nang era, ben hnon nak yeiniboka, ”Salyaʾ dongolamla gel, mek gong hnoum bulumla gel genyek, hekaʾ huru obnamlaʾ anyek anak amawanenggenaʾ anasa, yalom.

² Sokok an bo uboka wenesin nang era, alak nauba salawoka, onoʾ sokok an ulumak nim era, ban alak salanaʾ ganya edya uu aro yabalamak,” wenyaboka lebnyok.

³ Dara nara Imik Neyung Geisinya adya gologanyookanya, lero enedya holaʾ seknaʾ orok mok bo binyok. An bo binyok ak ara, gela hnon yokaʾ yu nongaʾ goron houm-houm arobaʾ eilibik bulumokaʾ ak eibsa. Anya ban yokaʾ yu nongaʾ ak anera, Imik Neyung ak geklewoka walamekaʾ si gong-gong momnya enyek domekaʾ anyek ulumok. Wera ban yu nongaʾ ara, huk ara sekbadyakanya, bong ara sagobadya bogomok.

⁴ Dara ban gel gera, goronokaʾ houm-houm arobaʾ hnon, imengen gwaneng bunduk anaso boksom hnon ongowoka, emas ab, meilik ab, dangman ab, bonaʾ danyek urugoka, gereng yaleng amok gel gek bulumok. Dara alja sorukuk ara, alak salawoka ulumekaʾ hyak malyaʾ sembejaʾ enyek, emas adya mek hmeiyek sala bulumok.

⁵ Dara alja asok ok ara, yok si gunuwoka sin si nenyek momnya domek. Ban unu momnya domek si nera, ”Babel heik hyak senenggom nong heik era, nimi sokok an malya dangoka, salyaʾ dongon gelewa sikjaʾ genong genyaʾ!” wenyaboka webemek.

⁶ Dara ban gel gera, munaʾ Imik Neyung mab uboka, Yesus amba laga leboka ulumek nang, sikja eneng enedya, yu meka demna anasoʾ anyek, ganya uu aro bulumokaʾ ak eibsa. An gel gen eibsegab dara, nara omom uboka hyak loka dabnyok.

⁷ Anasa ban lero era nak, ”Anda hekasa omom ganya bololam do? Wera anasa nara anak, ban gel gera, alda hek gel ge ulumlaʾ ara, al yok yu nongaʾ enyek, alak abagamokaʾ ara, huk ara sekbadya ubookanya, bonga sagobadya bogokaʾ anyek, neknenggen.

⁸ Ban yok yu nongaʾ eiblamaʾ ara, men dara ulumok bok, wenera unggulumla. Bok, alda somoknaʾ gweren selengaʾ lomok ab gobnamlakanya, onoʾ somoknaʾ ak sam binimla. Soko an anam uyiwanggom enyek, sikja si embengaʾ un buku lomok momnya dobnenggubsuk nim era, ban yokaʾ yu nongaʾ ara, men ulumok bok dengamokaʾ ara, onoʾ lanawanamlaʾ anyek eibnemak dara, hyak lokja senewoka ganya omom uboka loka dabnesil.

⁹ Anasa, geremseng un ganya boboka beknemakaʾ ara ban. Ban huka sekbadyaʾ ara, gel gen bulumla meina sekbadya ulumlaʾ ara an.

¹⁰ Dara, sekbadya wenewoka bo usin dub nang ulumakaʾ ara, lambadya dara seleb malyinggik. Anya ben hnonda or weneba bo ulumlakanya, onoʾ yoknya be hnonda anam yanggom. Bok yalya dara, alda or mekaʾ ok ubnamla.

¹¹ Dara, ban yok yu nongaʾ youmaʾ men ulumok bok, wen unggulumlaʾ ara, wenewoka bo usin dubnya linnya bera an. Ban benera sik sekbadya nang en ulumek sonya bok, alda somoknaʾ ak binimla.

¹² Dara bonga sagobadyaʾ eiblamaʾ ara, sagobadya wenewoka bo un dub nang, anam wenggulusak nang era an. Bok sikda ban yok yu nongaʾ ab neikaʾ wenewoka bo ubsinok aboka, wene salek ok ban wa nera eleganesil.

¹³ Dara ban sagobadya dub nang era, sikja unuwanamab senewanamak ganya era neikik hnonok ganya ok bobnemak. An ganya era, nunda ban yok yu nongaʾ ak migibaʾ ab, dub unaʾ ab, danyek alak eleganamab senewanamak.

¹⁴ Anya sikda domba me ak mala boboka oldalamnamak. Bok ban domba me ara nidyaʾ wenelesak nang sikja senenggom Wenelesilnya ulumnamlakanya, nidyaʾ dub nang dubnya ulumlaʾ anasa, alab, sikenek weboka doboka alak bojam ulumak nang eb dadya, oblamaganamak,” wenyaboka nekenyok.

¹⁵ Anya hnonda lebokja, ”Ban eiblam mek gong dara, gel gen bulumla mek danera, sikja nimi gumaʾ yok-yok unulumak nim eb, sik nimi dumunga yok-yok ulumak nim eb, sik yok-yok mok soko ulumak nim eb, sik yok-yok yuba salamak nim eb dara, an.

¹⁶ Dara, bonga sagobadya eiblamaʾ ara, ban yokaʾ yu nongaʾ ab dadya, dongon gel gek hyak lek senewanamak. Hnonda sikda alja hekaʾ ok alak ulumlyaʾ nidyaʾ ara doboka, nong baneng nenewanamak. Anya, alja nong soub era gweboka deregoka, onoʾ uk adya dengaboka dabnemak.

¹⁷ Dara Imik Neyung ara, alja senelamlaʾ gigiwoka unuwanamak aboka, sikja ganya lomok ara, unuwanok senen ganya enyek beibsuk. Anedya sikda neik ganya boboka, sikja wenesin migib era yokaʾ yu nongaʾ ak eleganamab ganya era hnon elegosuk. Wera anedya, Imik Neyung yuba nidyaʾ ara, gigiwoka unuwanamla aboka unuwok.

¹⁸ Hnonda ban eiblam gel gera, sokok sam an dub nang wenesin dub heik era al an,” wenyaboka neknyok.