WAHYU 16 - PERJANJIAN BARU NALCA YUBA

Imik Neyung Adya Sekbadya Obnesilaʾ Damok Yuba

¹ Wera onoʾ nara hnon kebsa enyek, Imik Neyung bedya e lomok ab, ban sekbadya lero ek, ”Bindewoka ban Imik Neyung adya yu sen-sen anaʾ beiyimlaʾ anyek, mok soko eilib yekel bululum,” wenyaboka yuba migibaʾ leboka orugoul yabasuk.

² Dara men lero era bindewoka, alja bomoknya nera, mok soko eilib yekok. An unuwok enyek, ban yu nongaʾ adya alja yok beknaʾ dibaʾ ulumok nim eb, yokaʾ anyek alja nong anaso sununaʾ ab danyek, giblemek nim era, soroka mouboka yamawousuk enyek, ok adya hyak nauba gwekdo balamek.

³ Onoʾ penenya lero era bindewoka, alja bomoknya nera, mek gwan eili yekok. An unuwok enyek, mek gwan ara, somogamna nim edya eneng enesoʾ ok dookanya, yokaʾ-yokaʾ mek gwanek uru yabalamlaʾ nidyaʾ ara somogok.

⁴ Wera onoʾ winilinya lero era bindewoka, ma yabalamla mek eilib ab, mek lu nidyaʾ ab, alja bomoknya nera, an eilib yekdo bobogok enyek, meka nidyaʾ ara eneng ok dok.

⁵ Wenyek mek ak bo ulumok lero era, ”Hyak geisa nongnya bek ululam, hnon anja boublinggalem igin kwenaʾ era, pe beknaʾ sunuwoka ublam. Wera anda Imik Neyung bek ululamakanya, seleb orowek dib hweko ululam Imik Neyung.

⁶ Dara sikda munaʾ Imik Neyung mab ab, ununumnaʾ len nang enenga seleb yek menegek anasa, anda wera sikbabya onoʾ eneng anyek deb eleganasilim. Ban enenga denaʾ ara sikinek dara, hyak domdigum nong!” globoka wenyaboka lebok.

⁷ Hnonda uka daboka gibnaʾ oulyang edya lel yabokaʾ ak ab kebsenya nera, ”Imik Neyung, Imik Neyung, anda hyak migib nongnya, anja igina kweldinaʾ boro boublinggalamaʾ ara hyak beknaʾ sunuwoka, perob ok ublam!” wenyal yabok.

⁸ Wera nen seleb dara, onoʾ dom lero era, ban alja bomoknya nera, heng ak yamaro bobogok enyek, heng ara poba migib nong adya, nim ara uka singiro balamok.

⁹ Dara nim ara, ban poba enedya yalegoka sesero byuk. Hnonda sik Imik Neyung si, ban igin damok bo uboka ululanya bek, derewoka malyaʾ geblemek. Wera an unuwosuk bok, sikda sikja malya unaʾ ak ab, ganya dangawoka Imik Neyung senenggomnya ululanya bek ara, gibnenggulumek.

¹⁰ Dara onoʾ lam lero era aljinya ban yu nongaʾ adya ekla bunaʾ ak yamaro bobogok. An unuwok enyek, ban alja wenewoka bo ulumok mok era, gunaʾ ok dok adya, nim ara si silyum sabdangoka, ok anasa nauba gweklemek.

¹¹ Wera an unu oka deregoka, soroka mouru balasuk dara, sikda Imik Neyung ak derewoka waboka ulumek. Anababya, sikda sikja yu hwam uboka unun malya unaʾ ak ab, ganya dangawanggumek.

¹² Nen seleb dara, hnabnya lero era, alja bomoknya hyak nauba mek Efrat mekek yekdo bobogok. Unuwoknya nera, yali sam ab wenewoka bo un nang dub nang enyek mek en dalawalya pik an yanok aboka unuwok.

¹³ Dara yu hwam unaʾ ganya winilya enyek, hyeiya anasoʾ ak hnon eibsa. Ban hyeiya era, naga bagaʾ edya si ak hnon, yu nongaʾ adya si ak hnon, sonda amba bobnenewoka len nang edya si ak hnon, goboka lanawok.

¹⁴ Wera ban hyeiya anasoʾ ara, hyak yu hwam unaʾ ganya enyek, yokaʾ-yokaʾ mengewoka unuru yibilimek. Dara ban winilya ganya yu nong era, nidyaʾ soko me bilimeekanya, wenewoka bo un dub nang ek, Imik Neyung hyak migib ululanya bedya senenggom sum enera, obdanok aboka, mamagiyiweisik.

¹⁵ Wera keblulum! Nara hokaʾ donya benesoʾ ak yanamna! Alda nong baneng yibinyaʾ adya, nimi hogung ak alya dabnelyek aboka dara, alda pe diri uboka, alja boksom pe keeboka bo ululanya bera, hyak pe ulumla.

¹⁶ Dara alda, Ibrani yub adya dara, Harmagedon alamak olok, sik dub nang era, anyagan mamagiyiweisik.

¹⁷ Nen seleb dara, sek lero era alja bomoknya nera, salyaʾ imik yamaro bobogok. An unuwok salek, Imik Neyung adya ekla bunaʾ ak ab, ”Seleb sidyaʾ dakla!” wenyaboka yeiriwoka lel yabok.

¹⁸ An wenhyok sab-sab, liming yub ab, ebnaʾ ab, sougumaʾ ab dara, borom-borom aboka, hyak yok so dok. Anya ban sougumaʾ era, nimi uyiwousuk salek ek abaʾ ara mouruwoka, hnon anaso sougumaʾ era, orokaʾ ak unuwok. Anasa hyak yok soʾ ak unuwok!

¹⁹ Dara ban naubaʾ soboka ulumek heik era joboka, winilya gebookanya, soko dubuk an nauba solomek heik eneba, soldowoka urub-urub hyok. An unuwok ara, hnonda Imik Neyung ara Babel heik amba, ganya bekokokanya, alsamba Imik Neyung adya yu sen-sen anaʾ anggur mek enyek memewoka elegok.

²⁰ Hnonda mek dubuk soko era dengaboka, mok soko meini nidyaʾ ara orok dok.

²¹ Anya saragenaʾ mok doun naubaʾ anyek, alja igin era lima puluh kilogram anasoʾ ak, imik ab ara, nimi eilib ak siklero yibok. An unuwok enyek, ban nim enesa leboka, Imik Neyung ak derewoka hyak malyaʾ geblemek.