WAHYU 15 - PERJANJIAN BARU NALCA YUBA

Oblamagek Nang Ber Yuba

¹ Wera onoʾ hnon imik sam ara, yokaʾ hyak omomaʾ yok so anyek, lanawokaʾ ak eibsa. An eibsaʾ ara lero sekbadya nang, malya damok ok sekbadya, sidyaʾ obnesilaʾ anyek, yok-yok bomek. Anya Imik Neyung adya yu sen-sen anaʾ hyak dengaboka obnesilaʾ ara wera an.

² Nen seleb dara, yokaʾ ak hnon, gwan mek ak heng kemeldanaʾ anaso ab, uk bokaʾ ab, an penya anera hiboka neikaʾ ulumokaʾ ak, nara eibsa. Dara ban mek gwan anaso gemek ara, yokaʾ anyek yu nongaʾ al nong anaso sununaʾ ab, alja einin nomor si ara enam ratus enam puluh enam ab, anya anyek oblamagamek nang ek seklemek. Dara ban oblamagamek nang era, Imik Neyung adya sikenek benggong elegesukaʾ ak, bo seklemek.

³ Dara, Imik Neyung wa wenya Musa beb, domba me ab, sikja seblemek bera era anaso: ”Imik Neyung, hyak migib nongnya ululam. Anja unululamaʾ ara hyak omom nongokanya, hyak senenggom! Nidyaʾ mok soko amba wenewoka bo uboka, senenggom dubnya ululam. Anja unulusilimaʾ ara pe beknaʾ sunuwoka, yana lelewoka, perob ok unululamnya.

⁴ Anasa Imik Neyung o, heknedya anak ara loka dabnenggununggeso do? Onoʾ heknedya anja si imik nenewoka gibnenggununggeso do? Anasa anak ok hyak geisa nong ak ululam. Hnonda anja yuba saboka memenaʾ anyek, nimi seleb nauba eillilimak anasa, yok-yok mok nimi nidyaʾ ara, anak gibil yalemnenjak,” wenyaboka seblemek.

Sekbadya Lero Nang Yuba

⁵ Wera nen seleb dara, imik heik ara, Imik Neyung adya e lomok, alda sik gangganek ulumok an beknaʾ e nenyek, pika bakokaʾ ak, nara eibsa.

⁶ An unuwok dara, ban sekbadya lero nang era, an sekbadya sidyaʾ obnesil damok en boboka, ban lomok geisa ek ab gobek. Wera sikja ongomek boksom era melelaʾ bobogoka, hyak namenokaʾ sembejaʾ orok boksom ek ongomek. Dara, sikja saraʾ goukwa noronaʾ era, emas adya wimek ak ongomek.

⁷ Dara, ban gamyakaʾ dombadya anera, hnonnya nedya ban sekbadya lero ek, emas mek hmeiya sekbadya doboka elegosuk. Ban sekbadya mek hmeiya era, Imik Neyung hyak sobaʾ ulmoublelanya, alja yu sen-sen anaʾ adya deknewoka beiyimok.

⁸ Anya, ban Imik Neyung e lomok ara, Imik Neyung adya migibaʾ ab, alja melelaʾ senedyaʾ ab dadya, uk solom anaso ak weleldo lobok. Anasa, ban sekbadya sidyaʾ onaʾ, sekbadya lero nang edya bomekaʾ ara, anam nidyaʾ gigiwanggom dara, nimi be hnon sibin anaba, ban geisa e lomok ara weknenggunumak.