WAHYU 12 - PERJANJIAN BARU NALCA YUBA

Gel Ab Naga Bagaʾ Eb Yuba

¹ Wera imik ara yokaʾ ak hyak senenggomokanya, okna so beknaʾ ubukaʾ ak eibsa. Dara, gela hnon, alda heing einira boksom dibaʾ ongowoka, walaʾ ara yan damumduk geboka seklemok. Anya alja hukuk ara, dub nang edya goulunaʾ enyek, guraʾ o badya uruwaʾ ak goulumok.

² Wera ban gel gera me bomookanya, beibnamen salek anasa, alda me juga gweklemok.

³ Bok onoʾ imik ara, yokso beknaʾ anyek, lanawok. Wera anera, naga bagaʾ gorona senenggomaʾ huka sekbadya uboka, bonga sagobadya umok bagaʾ ek lanewok. Dara, huka yok-yok, dub nang huk goulunaʾ anyek goulumok.

⁴ Anya, alja amo edya imik umok guraʾ ololaʾ era, winilya geboka hnon sam legewoka sokok boroboublinggok. Anya, ban naga bagaʾ era, alda me beillil yabelya salek enyek, doboka menegounun senewoka, gel gen saramek oka diri seklemok.

⁵ Bok gel gera nengma ak, nimi mok soko ulumak nimi nidyaʾ ak, besi gamaʾ adya bomlyekanya wenelemnesilnya bek beibok. Bok beibok salek era, me nera gel genyek anyeb alawoka, Imik Neyung bek, al bulumokaʾ ak bo byuk.

⁶ Dara gel gera Imik Neyung adya anyagan ulumnamla senewoka orowek mememlyaʾ ak, egenyaʾ ok maro lomlya sokok yeiri bilimok. Dara, alda anyeganara liga seribu dua ratus enam puluh sum arawoka bo ublul aboka bilimok.

Naga Bagaʾ Oblamagok Yuba

⁷ Dara wera, imik heik ara mala lanabdek. Wera Mikhael beb, alja lero nang eb dara, ban naga bagaʾ ek, mala lanawoka obdang einiwek. Dara onoʾ ban naga bagaʾ enebabya, alja lero nang edya arawoka, Mikhael bek mala boboka oldalamek.

⁸ Bok ban naga bagaʾ era, alak sam ara oblamageisik. Anedya, alab alja lero nang eb dara, imik heik un oulyang era, hnon alawanggubek.

⁹ Dara ban senenggom naga bagaʾ era sokok yakdo boblenggok! Wera ban wisa youmaʾ bagaʾ era, nidyaʾ sokok an sondaʾ leboka malyaʾ geblamlaʾ, alja si nera Iblis hnon, Satan hnon aboka si silimak ara an. Alab, nidyaʾ alak aralemek lero eb dara, sokok an unu boublinggosuk.

Oblamagokaʾ Amba Ber Yuba

¹⁰ An nen seleb dara, nara onoʾ imik heik ab yuba hnon nauba lel yabokaʾ ak kebsa: ”Wera ban nunja hemyab ek, yubyek inimnek Imik Neyung bek miniwoka, meknelum alalanya bera, imik heik ab seleb boublinggal anasa, Wenera Imik Neyung ara alja nimi blebsin salek! Wenera Imik Neyung ara dubnya wenesinnya bemba alja migibaʾ laga dal salek! Anya onoʾ alja bokol yeilisuknya, Kristus beneba alja wenesinaʾ laga dal salek!

¹¹ Dara nunja hemyab era, domba me eneng adya hnon, dib yub ak hnon, sikja laga lelemeknya nenedya, alak oblamagamek. Sikda sik nong anaba, or somogamnya anaba senewoka seleb unuru yabalamek nang.

¹² Wera anasa, imik heik ab, ane lomok nidyaʾ ulumunya nera, eiya hlaboka globlulum! Bok bisaʾ dubnya Iblis ara, seleb yinggilaʾ anasa, sokok mekek ululum nang nidyaʾ o, hyak lobaʾ nenewoka obnesilaʾ ak ululum. Iblis ara unun salek era seleb mek ok ubla senewoka seleb ella ublakanya, hyak yu asaʾ ganya bolomla,” wenyaboka lebok.

Naga Bagaʾ Era Gel Ak Doblemok Yuba

¹³ Dara, ban naga bagaʾ era, nara sokok an seleb boublingganyo senewoka seinimok dara, alda ban nengma beiyimlya gel genyek yeiriwoka dobdibigomok.

¹⁴ Bok ban gel genyek ara, naga bagaʾ adya berewanamla danyek, hwalek mok, egenyaʾ ak sokok, lak-laka biniboka, pe murugoululaʾ aboka, senenggom weidya wining edya oll enyek ongiyiwok. Dara anyaganara gibnaʾ winilya uboka, walaʾ hnabbadya bo ublul aboka unu mememok.

¹⁵ Dara ban naga bagaʾ era, ban gel genyek meka boblul aboka, alja si bamaʾ ak ab, ililamla mek anaso anyek gel genyek sam larara dorogok.

¹⁶ Unuwok bok, soko ara gel genyek arawok. Arawokaʾ ara, soko ara lek loboka, ban naga bagaʾ edya larel yabok mek enyek, dobom-doboma menegok.

¹⁷ Unuwokaʾ anasa, ban naga bagaʾ era hyak yu nong berewoka, gel gen nimi yilaʾ yok nim ek, Imik Neyung adya oruksin yub pe keboka unulumek nim eb, Yesus adya laga lenaʾ bolomek nim eb danyek, waregoka norowousuk.