WAHYU 10 - PERJANJIAN BARU NALCA YUBA

Baklorob Buku Yuba

¹ Wera nara yok lero be hnon, hyak migib nong anyek imik heik ab golugoka yanggokaʾ ak eibsa. Alda debaʾ adya lilib ganagamookanya, mano ara alja huk dubuk geemok. Anya alja hogung era, henga dingiro lolomna anaso uboka, alja yan era, uka singilamna egomnaʾ gal enesoʾ ak umok.

² Dara alja sorukuk ara, mek buku kerewaʾ bak lorobaʾ ak salamok. Dara alja sirik yan era, gwaknaʾ seiriwoka nauba mek gwan eilib ingibookanya, alja waneng yan era soko eilib ingiwok.

³ Dara, alda yu nong ulumla singa gam edya yeiriwoka ngoublamla sok, yuba nauba bii alamok. Wenyalamok dara, sekbadya liming era yuba sab onowek.

⁴ Dara ban sekbadya liming danera, seleb yuba sabgogowek dara, nara momnya dobnunaʾ aboka ul yabesebok, wene salek yok yuba hnon imik heik ab, anaso wenyal yabok, ”Ban sekbadya liming edya yuba sabakaʾ ara, gelelenga doknowoka deneb lendewanalam bok, momnya donaʾ ak dara, dobnenggunulam!” wenyal yabokaʾ ak kebsa.

⁵ Dara onoʾ mek gwan eilib hnon, soko eilib hnon, yan ingi seklemokaʾ eiyimsa lero era, alja sirik soruk era, imik sam ok weininggok.

⁶ Unuwoka alda, hyak dib hwekwa ulmoublelanya, im ab, soko ab, mek gwan ab, nidyaʾ ane lomok ulumlaʾ uyiwoknya bedya si sibuka, dib unuwanamna aboka anaso wenyal yabok, ”Goʾ mabdabnenggunumla.

⁷ Dara, sek lero edya alja benggonga yuba lelemnamlya sum era, Imik Neyung adya alja wa wen nang ek hnon, ununumnaʾ len nang enyek, seleb wenyalamok sok, Imik Neyung adyaʾ gunuwokaʾ ara gigiwanamla,” alamok.

⁸ Dara imik sam ab hnon, nadya yuba hnon nak lebnyokaʾ ara, ”Biminekanya, mek eilib soko dubuk yan ingi seklelanya bedya sorukuk, bak lorob buku ulumlaʾ anyek dobnelam,” wenyhenyok.

⁹ Dara nara benyek an biniboka, mek buku kerewaʾ ara, nak elegounululaʾ aboka, alak molowasa. Wenyek alja nak, ”Anera or dobmenekanya, denelam. An del yabamen dara, anja mon era sika lebnelabok, anjaʾ si lomok ara, lusa mek anasoʾ anyek pe lebnamla,” henyok.

¹⁰ Dara nara buku enyek, ban lero enedyaʾ sorukuk ab doboka del yabasa dara, nadyaʾ sik ara, lusa mek anasoʾ ak pe lebok bok, alda seleb debdaksa dara, nadya mon era, sik ok lebok.

¹¹ Dara alda onoʾ nak hnon, ”Anda yok mok soko nimi gong ek hnon, yok-yok nimi yilaʾ gong ek hnon, yok-yok yuba salamak nimi gong ek hnon, wenesin dub nang gong ek hnon, ununumnaʾ yuba hnon lero yibinelam,” aboka oruganyok.