WAHYU 1 - PERJANJIAN BARU NALCA YUBA

Si Sibuk Yuba

¹ Ban buku enyek an momnya dobokaʾ ara, Yesus Kristus adya eimik unuwanalanya nemba yub ek ulumla. Imik Neyung adya dara, Kristus ak onoʾ alja wa wen nim ek eimik men berra unuwanamlaʾ anyek aawosululaʾ aboka elegok. Ban nenesa leboka Kristus adya dara, alja lero pik uboka, alja wa wenya Yohanes bek nekok.

² Dara onoʾ aldib Yohanes bedya aljaʾ dib heng yokaʾ adya eibukaʾ nidyaʾ ara, Imik Neyung adya lebok yuba hnon, anya Yesus Kristus amba len yuba hnon, ban bukuk sam laga lelemla.

³ Ban nidyaʾ ununumnaʾ lebokaʾ ara, mandenaʾ loboka unuwanalabok anasa, alda ban buku enyek an momnya dobokaʾ ak laga einililanya hnon, sikda ban unuwanamlaʾ hyok yub pe keboka al lomok ulumla yuba nidyaʾ salabmouboka unulumak nimi hnon, pe ulumnamak.

Sekbadya Yuba Don Heikek Nim Ek Gibsuk Yuba

⁴ Nadyaʾ hemyabo nim, sekbadya Asia sokok sam yuba don heikek yuba donaʾ nim ek gibsin! Ugunuk wanaʾ uboka eleksinaʾ ab, namen ganya unaʾ ab dara, al wen ululanya, youmaʾ ulumokaʾ ara, onoʾ eimik sobaʾ ulmorulumnelanya bedyaʾ ara ugunuk elegoka ulusulul, anya aljaʾ saramek sam sekbadya ganya edyaʾ anaba ugunuk elegoka ulusulul.

⁵ Anya Yesus Kristus yuba bojam laga lelesilnya bedya ugunuk ban nidyaʾ elegoka ulusulul. Yesus nong anyek, alak men nimi somoknaʾ ak ab suboka embengaʾ bukiyimoknya uboka, onoʾ al nong anyek nidyaʾ soko dub nang ulumakaʾ sikenek wenewoka bo usinaʾ dubnya ulumla. Dara alak, al Yesus ara nuk wanaʾ uboka, alja eneng edya, nunjaʾ malya unaʾ ak sam ab, blebsuknya bek,

⁶ anya onoʾ alja dara, wenewoka bo un nang, yuba wa gak nang, gebsuk. Dara, ban Yesus Kristus enyek, hyak imik nenewoka, onoʾ alak hnonok senenggom dubnya migibaʾ sob-sobaʾ ulusulul. Amin.

⁷ Wera, Yesus ara debaʾ hnoumung sam uboka yalamlyeʾ anyek kendululum e! Nimi nidyaʾ soko nim eibnemak dara, onoʾ alak gamaʾ adya gondowoka orob nim eneba eibnemak. Dara, nimi mok soko yok-yok nidyaʾ ara, alak eiyiwoka nauba engenaʾ salawanamak. Anasa aldib nera hyak dib unuwanamla! Amin!

⁸ Wenelesilnya Imik Neyung wen ulumlaʾ, youmaʾ men ulumokaʾ ara, onoʾ eimik yanalanya bera, onoʾ hyak senenggomaʾ migib ululanya bedya dara, ”Nak danyek, men ub einiwasenya bera onoʾ eimik sidyaʾ dakoka ubdaknanya ulumna,” alamla.

Nimi Sirigaʾ Anaso Ak Patmos Sam Eibuk Yuba

⁹ Nara Yohanes bera, ugunjaʾ hem be nimi nidyaʾ Kristus mabo dangamna nim ek kwelesil igin yakaʾ neikek kwelesilnya bek ulumna. Nunda igina kwelesil bok, Imik Neyung amba ulumabaʾ anasa, or unulusululaʾ aboka ganya siklebdaboka ganya gouluwoka ulumabakanya, alja mabo hnonok ulumab. Dara nara, mek dubuk sokok Patmos heikek an henga gouboka bokol yanyekaʾ ara, Imik Neyung yub amba hnon, Yesus amba len yub enyek, lero yabanaʾ amba leboka ubnyek.

¹⁰ Wenelesilnya bedya sum yenewokaʾ eibsaʾ ara, nara Imik Neyung Geisinya adya ok gologanyookanya, poo anaʾ benggong yub anasoʾ anyek, nadyaʾ weilik sam lel yabokaʾ ak kebsa.

¹¹ Wera ban yub enedya nak, ”Anja seleb eiblamaʾ ara nidyaʾ momnya doboka, an momnya dobmen buku era, ban sekbadya heikek yuba donaʾ nim ek, Epesus, Smirna, Pergamus, Tiatira, Sardis, Filadelfia, anya Laodikia heikek hnon, beibnelam,” henyok.

¹² Ban heknedya sal eleklenel do aboka saawoka weilik sam kemel yabesa. Dara uk dininaʾ sekbadya emas adya memerobaʾ anyek beiyimekaʾ ak eibsa.

¹³ Dara onoʾ ban uk dininaʾ sekbadya beiyimekaʾ hnoum ara, nimi sirikaʾ anasoʾ ak ben hnon sekemok. Bera alda hyak waran nongaʾ anyek yan anaba siklemok akleng ek ongomok. Aljaʾ saramek sam ara dangman selerobaʾ ak wan-wanamok.

¹⁴ Alja huk era hong anyek, hyak kul ara domba pam kul anasookanya, geisa nong debaʾ anaso honga yaknya bek sekemok. Alja heng era uk bokaʾ anasoʾ ak lara yabalamok.

¹⁵ Benedya yan era gabya weʾ uka singilamlaʾ anasoʾ anyek singelemok. Alja yub era, mek lumdam yub anasoʾ anyek olalalak alamok.

¹⁶ Aljaʾ sirik soruk ak sam ara guraʾ sekbadya salamok, aljaʾ sibamaʾ ak sam ab parang u penyaʾ ak goublemok. Alja hogung era, hyak yubyek dukdukanek dingilamlaʾ heng senedyaʾ eneso ulumok.

¹⁷ Nara benyek eilil yabasa dara, na nong ara somoganya benesoʾ ak, aljaʾ yan berem glob lobsa. Bok aljaʾ sirik soruk era nak diyiwoka lebnyokaʾ ara, ”Anda lok ganya bonggom, mem. Nara men youboka ulusenya bera, onoʾ eimik sidyaʾ daknananya ulumna.

¹⁸ Nak danyek, embengaʾ ulmorulunanya bera an! Nak dara, seleb somogasebok, wera nara hyak sobaʾ ulmorulumnamna. Nara somoknaʾ amba dubnya uboka, nimi soko nimi somoknaʾ heikek amba dara, nara pik baknaʾ salananya ulumna.

¹⁹ Anasa wenera, ban nenesa leboka, wen anja seleb eiblamaʾ ara, wen ululanya neb, eimik unuwanamlaʾ ab, anja okoka eiblamaʾ lelewoka momnya dobnelam.

²⁰ Wera sekbadya guraʾ nadyaʾ sirik soruk ak sam ab, uk dininaʾ sekbadya ulumlaʾ eiblamaʾ gunun damok ara, Sekbadya guraʾ era sekbadya yuba donaʾ nim edya lero nang era an, anya sekbadya uk dininaʾ ara, sekbadya yuba donaʾ nim era, gereja nong ara an,” hyok.