ROMA 8 - PERJANJIAN BARU NALCA YUBA

Geisinya Pik Ab Embengaʾ Ulumak Yuba

¹ Anasa wenyek dara, sikda Kristus Yesus lomok ulumak nim ek ara, igina kwenaʾ ara unggulumla.

² Dara Kristus Yesus pik uboka, unuwanalum an yub edya embengaʾ unaʾ eleklesil Geisinya damok migib adya, ugunda malya unaʾ damok ab, somoknaʾ damok ab, seleb lob lobsuk.

³ Anera Yahudi nim emba unuwanalum an yub ara, nimi nonga hmeng adya, pe gigiwoka unuwamenggom anasa, Imik Neyung ara, alaʾ me yokaʾ anyek, malya ulumak nimi nonga nenewoka bokol yookanya memewokaʾ ara, malya unaʾ ak nenesemba leboka igina kwenaʾ elegok.

⁴ Nera, unuwanalum an yub adya anyek-anyek unulumnelum alamokaʾ anyek, nimi ganya ak sunuwoka unulumak nang ek gom, alda Geisinya bedya ganya ak sunuwoka unulumak nang ek gigiwolul aboka an unuwok.

⁵ Anasa sik nimi ganya ok sunuwoka ulumak nang era, nimi ganya adya seinilamla ganya ok seinilimak. Bok Geisinya bedya ganya ok sunuwoka ulumak nang era, Geisinya adya seinilamla ganya ok seinilamak.

⁶ Anasa nimi ganya adya seinililanya nera somoknaʾ damok ak ulumla. Bok Geisinya adya seinililanya nera embengaʾ unaʾ ak hnon, ganya pe namenaʾ unaʾ damok ak hnon, ulumla.

⁷ Dara nim adya ganya seininaʾ era, alda Imik Neyung adya unuwanalum an yub ak ganya beildanggulumla anasa, Imik Neyung adya isaʾanya ulumla. Anasa aldib, ban yub enyek dara, alda hyak okna ak ulumla.

⁸ Anasa sik nimi ganya seininaʾ ok unuru ulumak nang era, Imik Neyung bek ganya hekel dinggulumak.

⁹ Bok Imik Neyung Geisinya ugun nong lomok seleb ulusil dara, ugunda nimi ganya adya bo unggulusil, bok Geisinya adya bo ulusil. Bok onoʾ nimi be hnon Kristus adyaʾ Geisinya unggulumla dara, alda Kristus bedyinya unggulumla.

¹⁰ Dara Kristus ara ugun lomok seleb ulumla dara, wera nong anera malya unaʾ adya somogok ak ululabok, anja ganya ak dara perob nenesinaʾ adya embengaʾ ulumla.

¹¹ Dara onoʾ, Yesus ara somoknaʾ nang gangganek ab subuka bukiyiwoknya bedya Geisinya ara, ugun lomok ulumla dara, wera onoʾ alja Kristus Yesus somoknaʾ nang gangganek ab subuka bukiyiwoknya bera, alja ugun lomok ulusil Geisinya edya, eimik era ban ugunja somokna nong eneba subuka bukiyiwanasil.

¹² Anasa hemyabo nim o, nunda nim ek del lonaʾ nang ek ulumab, bok nimi ganya ok denaʾ sam ak gom, anedya nimi malya unaʾ ganya ak sunuwoka unggulumnemab.

¹³ Dara, ugunda nimi malya unaʾ ganya ak sunuwoka ulumnelum dara, ugunda eimik era somoganalum. Bok ban Geisinya pik uboka ugunja ganya nong adya unuwounun senelamlaʾ anyek pika garawoka olomnelum dara, ugunda embengaʾ ulumnelum.

¹⁴ Dara, nimi nidyaʾ Imik Neyung Geisinya adya arawoka bo ulusil nang era, wera Imik Neyung bedya mab era al an.

¹⁵ Anasa ugunda wa orugoka anyek welemnelam henemlaʾ anyaʾ senewoka loka dabsin ganya enyek dobnenggublum, bok ugunda ugunuk Imik Neyung me nenesin ganya enyek seleb doblum. Dara ban ganya pik uboka nunda, ”Ai, na Neyung o, ai, na Neyung o!” wenyaro mololomab.

¹⁶ Dara ban Geisinya adya, nunja ganya ek, nunda Imik Neyung bedya mab ulumab aboka, laga neklesil.

¹⁷ Anasa nunda alja mab ulumab dara, wera nunda alja misaʾ don nang ulumab. An wenyhenya nera Imik Neyung adya dobnemak hyokaʾ anyek, nunda Kristus ablaboka imik nenewesinok aboka alja ganya igina berenaʾ anyek dolomnemab dara, numbabya Kristus ablaboka neikaʾ dobnemab.

Imik Neyung Mab Adya Ganya Wenaʾ Yuba

¹⁸ Anasa nadya hyak okoka ella ulumnaʾ ara, ban wene salek enyek ganya okna dablesilnya nera, eimik nuk si imik nenesinaʾ anyek laga anyeb dara, neikik sunuwamenggomaʾ ak ulumla.

¹⁹ Wera anasa, embengaʾ ulumakaʾ nidyaʾ ara, Imik Neyung mabo laga nenewanamla sum amba hyak ganya weboka diri ulumak.

²⁰ Nidyaʾ embengaʾ ulumakaʾ ara seleb salyaʾ lelem ak sokol banaʾ gebok ara, alja ganya edya gom, bok ban salyaʾ lelem ak sokol banaʾ geboknya bedya, alja ganya doboka unuwok.

²¹ Bok ban ganya wenaʾ adyok, sikba embengaʾ ulumakaʾ ara eimik era, somokna wa wenaʾ ak ab ara blebnesil anasa, Imik Neyung mab adya blebeldanaʾ senenggomaʾ perobaʾ ak weknemak.

²² Anasa nunda ella ulumabaʾ ara, nidyaʾ yokaʾ-yokaʾ embengaʾ ulumakaʾ ara al wenebabya neikaʾ ganya oldalamlakanya, neikaʾ me juga gwekleng sok ulumak.

²³ Nera sikinok gom, bok numba Geisinya men perob eleknaʾ seleb dowub nang eneba, me anasoʾ anyek somowanasil salek, nunja nonga blebnesil sum emba, numbabya nunja nong era ganya obdangdo diri ulumab.

²⁴ Anasa nunda ban ganya wenaʾ lomok uboka blebsuk. Bok eillilimaknya nera, ganya hnon wenaʾ anggulumak. Anasa nim ara alja seleb eillilisonya nek ara, ganya webnamso dara, har so do?

²⁵ Bok nunda eilinggulumabnya nenesa ganya welemab dara, wera nunda ganya gouluwoka diri ulumnemab.

²⁶ Dara neikik, nunda heng uboka molonaʾ ara, okoka pe elgom ulumab anasa, Geisinya bera ban nunja hmeng ulumabaʾ ak an, nuk arasil. Anya onoʾ Geisinya bera albeyokaʾ ganya doboka nunsamba Imik Neyung ak hyak lebnamenggomnya neneba, nekoka mololosil.

²⁷ Wera Imik Neyung ara alda nunja ganya anyek lelewoka ella ulusilnya bera, ban Geisinya bedya mololamlaʾ ganya era beknaʾ ella ulumla ara, alda Imik Neyung adya seinilamlaʾ sunuwoka beknaʾ, munaʾ Imik Neyung mab amba heng uboka mololosil.

²⁸ Nunda wenera ella ulumabaʾ ara, Imik Neyung ara alak wanaʾ ulumak nang ek, alja adya ganya seinimokaʾ sunuwoka weboka dobsuk nang ek, siksamba perob damok lanalalulaʾ aboka dara, yokaʾ-yokaʾ nidyaʾ ara, Imik Neyung adya arawoka welesil.

²⁹ Anera hyak men danyek, alja nidyaʾ webesuk nang era, al sikinek alja me nedya diligaʾ dobnok aboka, men danyek alja sunuwoka bokosuk. Anedya, alda alja me nera, aljaʾ hemyabo gong ek ab uboka, yandonya dok.

³⁰ Dara sik ban men danyek alja sunuwoka bokosuk nang enyek, alja al sikinek yoululum aboka lebok. Anya al sik alja yoululum aboka lemok nang enyek, alja al sikenek perobaʾ nenewousuk. Wera sikenek alja perobaʾ nenewousuk nang enyek, alja al sikenek imik senenggomaʾ nenewosuk.

Ganya Aldib Senenaʾ Yuba

³¹ Wera ban nidyaʾ amba dara, nunda hek henemab do? Wera Imik Neyung ara, nuk sam dangalamla dara, heknedya nuk isaʾ nang nenewanasil do?

³² Alda, alja me yokaʾ ak wanaʾ ubok bok, alda nidyaʾ amba elegousukaʾ anasa, alda nuk yokaʾ-yokaʾ nidyaʾ ara ganya doboka eleganggunusil de?

³³ Imik Neyung adya weboka dobsuk nang era, heknedya yuba saawanamla? Imik Neyung adya sikenek perobaʾ nenewok nang ek heknedya sikenek igina eleganasil?

³⁴ Kristus Yesus, seleb somogokaʾ ara, onoʾ imik soʾ dara, alda seleb embengaʾ subuk, dara onoʾ al alak Imik Neyung adyaʾ sirik sam bulumla, wera onoʾ alja nusamba yuba ligiwoka sanya danamla ara heknya do?

³⁵ Anasa heknedya nunda Kristus bedya wanaʾ unaʾ ak ab bok meneganasil do? Malya nenesinaʾ adya gom, mekaʾ nenesinaʾ adya gom, doboka osinaʾ adya gom, gwaneng okaʾ adya gom, nong baneng unaʾ adya gom, lok ganya adya gom, mala adya gom?

³⁶ An momnya dobok sok, ”Wera ansamba nunda mabom bukuma somoknaʾ damok lok ulumab, nunda obnamna domba pam enesoʾ senelesak,” hyok.

³⁷ Bok ban nidyaʾ an lebnaʾ ak ab dara, nuk wanaʾ ulusilnya be pik ab uboka, nunda ol lamakna nang ek ulumab.

³⁸ Anasa nadya dib senelamnaʾ ara, or somoknaʾ embengaʾ, lero nang gong, bisaʾ wenesin dub nang, or wen ulumlaʾ eimik lanawanamlaʾ,

³⁹ or yok-yok migib damok, imik ulumlaʾ, damumduk ululanya gom, or yok embengaʾ ulumla digum, ban nidyaʾ anedya, nunda Imik Neyung adya wanaʾ usinaʾ ak ab, nunja Wenelesilnya Yesus Kristus ak ulumlaʾ an, ara ane digum adya douluwoka bok meneganggunusil.