ROMA 7 - PERJANJIAN BARU NALCA YUBA

Unuwanalum an Yuba Yokaʾ Yuba

¹ Hem yabo nang o, nimi hnon anam embengaʾ ulumna salek ok, unuwanalum an yub ara bo ulumla ara, nara ugunda unuwanalum an yuba ella ululum nang ek wenyalamlaʾ anyek bok, ugunda anam ella unggululum de?

² Anasa sununaʾ ara, gela hnon alja nenya anam umna salek ok, unuwanalum an yub adya alaʾ nenya ak ganya malamla. Bok alja nenya somoklamla dara, ban ganya era unggulumla.

³ Anasa alja nenya anam ulumla salek, alda yoknya bedya gel dangalamla dara, alak ara mouna kwelemla gel genyaʾ alamnamak. Bok alja nenya seleb somogan enyek, alda yoknya bedya gel dangalamla dara, unuwanalum an yub ek ab goʾ dangalamla anasa, mouna kwelemla gel genyaʾ wenyanggulumla.

⁴ Anasa, nadyaʾ hemyabo nim o, ugunda yoknya, nimi be hnon somoknaʾ nim gangganek ab embengaʾ subuka bukuknya Kristus aljinya dangoka, Imik Neyung amba doka moulunok aboka, ugunda Kristus nong pik uboka, unuwanalum an yub ak seleb somok irigoulum.

⁵ Anasa nunda malya unaʾ ganya lomok anam ulumoub salek era, Yahudi nim emba unuwanalum an yub adya dara, malya unaʾ ganya ek onowoka, nunja ganya nong lomok welemok adya, somoknaʾ damok ak bo balasuk.

⁶ Bok wenera nuk ganagosuknya bemba, nunda alsamba seleb somogokaʾ anasa, nunda unuwanalum an yub ak seleb blebsuk. Wera anasa, nunda wenera wenyoknya nera Geisinya bek sunuwoka welemabakanya, youmaʾanya oruknaʾ yuba momnya domoknya nek sunuwoka wenggulumab.

Unuwanalum An Yuba Geisaʾ Ak Ulumla Yuba

⁷ Anaso dara, wenera nunda hek henemab do? Dara, ban Yahudi nim emba unuwanalum an yub ara, malyaʾ de? Anaso gom, hyak orok nong! Alda ban oruksin yuba pik uboka, nara malya unaʾ anyaʾ senenaʾ ara, okoka beknaʾ ella ulumsa. Anasa an oruknaʾ yub adya, ”Nim adyaʾ ara, dobsinya senenggom mem,” wenyanggulumnamso dara, nababya nim adyaʾ ak dobsinya ganya era, hekaʾ ak do senewoka ella danggunusinya.

⁸ Bok ban unuwanalum an yuba lanawok dara, malya unaʾ ara, nadyaʾ ganya lomok ara yokaʾ-yokaʾ ak unun ganya lanalenyok. Malya unaʾ ara, unuwanalum an yuba gonggom dara, debdobaʾ dangalamla.

⁹ Men dara, nara unuwanalum an yuba gomgom ulumsa. Bok ban wenesin yub seleb yok danyek, malya unaʾ ara ebek einiwok adya, nara somogamsa.

¹⁰ Anasa, ban wenesin yub era embengaʾ ak bo bininesoʾ anyek bok, nasamba dara, somoknaʾ ak bo balanyok.

¹¹ Anera ban oruknaʾ yuba lanawok dara, malya unaʾ ara, ban salek era, nak sonda leboka, an oruknaʾ yub pik uboka alda nak onyok.

¹² Anasa Yahudi nim emba unuwanalum an yub ek dara, geisaʾ ak ulumla. Anya, ban wenesin yub enebabya, geisaʾ ab, dib nong ab, perobaʾ ab, ulumla.

Unuwanalum An Yub Ab Malya Unaʾ Ab Dadya Pika Elerek Yuba

¹³ Wera anaso dara, yok perobaʾ digum adya nasamba hnon somoganaʾ danamso de? Hyak orok nong! Bok alda malya unaʾ ulumlaʾ ara, laga doulul aboka dara, malya unaʾ ara nak somokna damba, ban perobaʾ pik unulamla. Dara ban wenesin yub anedya malya unaʾ ara al beknaʾ malya unaʾ nong ulumlaʾ ara laga geblamla.

¹⁴ Anasa, nunda seleb ella ulumab ara, ban Yahudi nim emba unuwanalum an yub era, ganya ak ulumla. Bok nara nimi nong ak ulumnakanya, malya unaʾ migib lomok beilinel.

¹⁵ Anasa nadya unuwanamna senenanya nenyek dara, nara ununggulumna, bok nadya lek senenanya nenyek, nara unulamna. Dara, hekasa anaso unulamlaʾ ara, nab okoka elgom ulumna.

¹⁶ Wera anasa nadya unuwanggunumna senenanya nenyek unulamna dara, anedya nara ban unuwanalum an yub ara perobaʾ anyaʾ alamna.

¹⁷ Wera anaso dara, na nong adya ununggulunabok, alda na lomok ulumla malya unaʾ edya unulamla.

¹⁸ Anasa nara ella ulumnaʾ ara, na nimi nonga ulumnaʾ ak ara, yokaʾ hnon perob soʾ digumaʾ ara unggulunel, orok. Na pe unuwanesinya beknaʾ era ulunel bok, perobaʾ amba ununanya nera, unggulumla.

¹⁹ Anedya nara perobnya unuwanamna senelenanya nenyek ununggulunabok, alda nadya lek senenanya malyinya yunya nenyek, unulamna.

²⁰ Wera anasa, nadya lek senenanya nenyek unulamna dara, anera nadya ununggulunabok, alda na lomok ulumla malya unaʾ enedya unulamla.

²¹ Wera an unulamla adya, pik enyek anyeb nara ban unuwanalum an yuba damok enyek ella ulumnaʾ ara, Nara perobnya nenyek unuwonun senewan dara, wera ban malyinya nera nak an ul ganaklenel.

²² Anara nadyaʾ ganya lomok ara, Imik Neyung adya unuwanalum an yub enyek hyak perob senelamna adya.

²³ Bok nara eillilamnaʾ ara, nadya nong lomok ara, yok unuwanalum an yuba damok edya nadyaʾ perob ganya damok enyek olgoklamlakanya, nara nadyaʾ nong pik nidyaʾ ulumla malya unaʾ damok edya henga geregoka beiyimnaʾ geblenel.

²⁴ Na anara, nimi si lebnenanya hyak omom nong ak ulumna! Anasa heknedya na an somoganamna nong, somoknaʾ ak ab dara, blebnenel do?

²⁵ Bok Imik Neyung adya nunja Wenelesilnya Yesus Kristus pik uboka blebnyok anasa, alak ok giblenob! Anasa nara nadya geremseng ganya ak sam ara, Imik Neyung adya unuwanalum an yub amba welenabok, nadya nong unaʾ ak sam ganya era malya unaʾ damok wa amba welemna.