ROMA 5 - PERJANJIAN BARU NALCA YUBA

Perobaʾ Nenelesilaʾ Ak Ab Lanalamla Yuba

¹ Wera anasa, nunda ganya aldib senenaʾ adya perobaʾ nenelesil nang era, nunjaʾ Wenelesilnya Yesus Kristus pik uboka, nunda Imik Neyung ab neikaʾ hiboka ganya namenaʾ ulumab.

² Dara ban ganya aldib senelemabaʾ adya, nunda al pik uboka, perob eleknaʾ ban pik era seleb doboka ulumab. Anya, nunda ban perob eleksinaʾ pikek ulumabakanya, Imik Neyung adyaʾ perobaʾ senenggomaʾ ara, dobnemab senewoka, ganya weboka bolboloklemab.

³ Anya nenyek ok gom. Alda nunda ganya igina daboka unaʾ ara, ganya gouluwoka unaʾ damoka bo lanalamlaʾ ara, seleb ella ulumabaʾ anasa, nunda nunja ganya okna dablesilaʾ anaba bolboloklemab.

⁴ Dara ganya goulunaʾ ak ab dara, ganya siklebdaboka unaʾ damoka lanalamla. Anya, ganya siklebdaboka unaʾ ak ab dara, ganya wenaʾ damok lanalamla.

⁵ Anya, Imik Neyung adya wanaʾ usinaʾ dibaʾ ara, Geisinya ara, nunja ganya lomok seleb elegousukaʾ anasa, ban ganya we unaʾ adya dara, soloma nenenggulusil.

⁶ Wera anasa, nunda anam hmeng ulusuk salek, Imik Neyung adya ban salek enyek senemokaʾ sunuwoka, Kristus ara nunda wonaʾ dangamoub nang emba seleb somogosuk.

⁷ Anasa nimi be hnon pelelanya bemba dara, somoknaʾ ara okna so, bok perobnya bemba danyek leboka, nimi hnonda li hnon, or somogonun senewanamso.

⁸ Anaso bok, nunda anam malya unaʾ bo ulumoub salek, Kristus ara nusamba seleb somogok pik uboka, Imik Neyung adya alja yadyek ulusilaʾ laga dangalamlaʾ ara an.

⁹ Anya, nunda wera alja eneng edya seleb perobaʾ nenewosukaʾ anasa, hyak nauba so ara, nunda Imik Neyung bedya wema daboka osinaʾ ak ab dara, blebnesil ok.

¹⁰ Wera, nunda anam isaʾ gebdangoka ulumoub salek eneba, Imik Neyung bera alja me somogok pik uboka neikaʾ hiyiwosukaʾ anasa, dara wen nunda neikaʾ hiyiwosuk nang era, nauba so ara, wera alja embengaʾ unaʾ edya blebnesil ok.

¹¹ Anya onoʾ nenyek ok gom! Hnonda onoʾ, nunja Wenelesilnya Yesus Kristus al pik uboka, nunda ban neikaʾ hinaʾ dobubaʾ anasa, wera nunda Imik Neyung lomok uboka bolboloklemab.

Adam Beb Kristus Ab Yuba

¹² Wera anasa, neikik malya unaʾ ara sokok anara hnonoknya pik ab lanawookanya, an malya unaʾ enedya somoknaʾ damok lanawok. Wera an unuwoka nidyaʾ nang ara seleb malya umek anasa, ban somoknaʾ damok era nimi nidyaʾ ak ob lelewok.

¹³ Anasa Yahudi nim emba unuwanalum an yub anam lanawanggom bok, malya unaʾ ara men sokok an ulumok. Wera an bok, oruksin yub ak unaʾ orok dara, malya unaʾ ara, anyaʾ senewangguneseng.

¹⁴ Wen senewangguneseng bok, somoknaʾ damok ara, Adam be ulumok salek ek ab ara, mouruwoka Musa be ulumok salek era seleb ob lelewoka ulumok. Hnonda Adam bedya blekemok malya unaʾ era, yok nang eneba, neiksonya nenyek malya unggulumek bok, sikinek hnon ob lelewoka ulusuk. Dara, Adam bera eimik yanamoknya be sununaʾ so ak ulumok.

¹⁵ Bok Imik Neyung bedya perob eleknaʾ ara, Adam bedya meknemokaʾ anaso gom, yok so. Wera hnonoknya bedya meknenaʾ enesa leboka, nimi gong ara somogomek bok, hyak nauba so ara, Imik Neyung adya wanaʾ uboka eleksinaʾ ab, Yesus Kristus be hnon pik uboka perob eleknaʾ ab, nimi gong anasa leboka hmaboka elegousuk.

¹⁶ Dara onoʾ, hnonok meknenaʾ amba yana lelen dara, igina kweboka donaʾ an seleb lanawok. Bok meknenaʾ gong amba leboka perob eleknaʾ elegousukaʾ ara perob nenesinaʾ an lanawokaʾ anasa, hnonoknya bedya meknenaʾ adya dangamoknya nera, ban Imik Neyung adya perob eleknaʾ eb dara, domdigum danganggulumla.

¹⁷ Anasa, hnonoknya bedya meknenaʾ enesa leboka, wera ben pik ab uboka somoknaʾ damok ara, ob lelewok dara, nauba so ara, nim Imik Neyung adya perob eleksinaʾ doboka, hmaboka perobaʾ geblesil nang ek dara, ban hnonoknya Yesus Kristus adya, ob lelewoka embengaʾ ulmorulemnemak.

¹⁸ Anasa neikso, be hnonoknya bedya meknenaʾ enesa, nimi nidyaʾ ara igina dobek sok, be hnonoknya bedya pe unuwoknya nedya, nimi nidyaʾ ara embengaʾ ulunob aboka perobaʾ nenenaʾ ara, dolomak.

¹⁹ Anasa, be hnonoknya bedya bleknaʾ edya, nimi gong ara malya unaʾ nang dangamek sok, onoʾ be hnonoknya bedya pe keboka unuwokaʾ adya, neik so nimi gong ara perobaʾ nenelesil.

²⁰ Bok meknenaʾ hwam ok dangalalul aboka, unuwanalum an yuba hnon makok. Dara, hanyagarek meknenaʾ hwam ok gong danggiga balamlaʾ ak ara, wera wanaʾ uboka eleksinaʾ ara, sounum-sounum abgiga balamla.

²¹ Anedya, malya unaʾ ara soko me nidyaʾ ob lelewok sok, nunjaʾ Wenelesilnya Yesus Kristus pik uboka, wanaʾ uboka eleksinaʾ anaba, perob nenesin pik uboka, embengaʾ ulmoubnaʾ amba ob lelewanamla.