ROMA 1 - PERJANJIAN BARU NALCA YUBA

Men Perob Hyok Yuba

¹ Paulus bek ab, Kristus Yesus wa wenya, yuba lenaʾ gaknya dalyekanya, perob lero yanggan yuba lero yabalalulaʾ aboka, yalom hyoknya.

² Ban aljaʾ perob lero yanggan yub era, alja ununumnaʾ lelemek nang, men sik pik uboka geisa Imik Neyung yuba momnya dobokaʾ lomok wenyalasuk.

³ Alja me nek dara, nim ek sam dara, Daud nang yilaʾ ak ab beibek;

⁴ bok Geisinya bedya geisa migib enedya, alja somoknaʾ gangganek ab suboka embengaʾ bukuk anyeb, alda Imik Neyung me hyak migibnya, nunjaʾ neyung Wenelesilnya, Yesus Kristus ulumlaʾ laga nenebdokaʾ ara an.

⁵ Dara al si pik ab uboka, nunda wanaʾ uboka eleksinaʾ ab, yuba lenaʾ gak wa dara, nidyaʾ yok-yok mok soko nim era yub ak ganya dib donaʾ pik uboka pe keboka, sikda alja si nek aldib senewanok aboka dobub.

⁶ Ugumbabya sik gangganek ululumukanya, ugunda Yesus Kristus adya seleb bii aboka yoululum hyok nim ululum.

⁷ Ugunda Roma heik ululum nimi nidyaʾ ara, wera Imik Neyung ara seleb wanaʾ ulusuukanya, ugunuk munaʾ Imik Neyung mabo danalum aboka youbosuk nim ek ara, wanaʾ uboka eleksinaʾ ab, perob dangoka pe namenaʾ unaʾ ab danyek, Imik Neyung bek ab hnon, nunjaʾ neyung Wenelesilnya, Yesus Kristus bek ab hnon, ugunuk arawoka bo ulusulul.

Paulus Bera Roma Heikek Bisinya Senemok Yuba

⁸ Hyak men dara, nadyaʾ Imik Neyung bek perob aboka giblamnaʾ ara, Yesus Kristus pik uboka, ugunja ganya yuba dib dobek an yub enyek, mok soko nidyaʾ ol lelelamlaʾ amba giblamna.

⁹ Nadyaʾ ugunuk seinilisinaʾ beknaʾ aldib anaʾ dibaʾ ara, Imik Neyung adya, alja me nedya perob lero yanggan yub wa pik uboka, nadya ganya gouluwoka laga welemna pik an ella ulumla.

¹⁰ Nara sobaʾ heng uboka mololamna dara, ugunuk beklesin. Anya, Imik Neyung senemlya dara, wera pe yeiniboka ugunuk younunaʾ aboka mololamna.

¹¹ Hnonda kemel yanggubsisa salek era nauba mandewok anasa, ugunuk yanakanya, Imik Neyung amba wa wen migib nenenaʾ amba perob ganya eleknaʾ enyek, hnon eleganasin senelamna.

¹² Wera banedya, neikaʾ uwibyikanya, ugun pik uboka, ugunja yub ak dibaʾ dolum ganya eb, nadya dibaʾ domsa ganya eb, ugunub, nab neikaʾ ganya meebdanasibya.

¹³ An nenyek ok gom, nadya hemyabo nang, alda nadya ugunuk younunaʾ ulumna damok enyek, ugunda ella danalum senelamna. Bok al danyek mouruwoka sumeneba, yok mok soko nim ek doka moulumlaʾ eillilamna sok, ugunuk doka ulumlyaʾ anyek eiblyek senewoka, yokaʾ adya salalenel.

¹⁴ Dara, Yunani nim gom, Yunani gom nim gom, sekolah dorob nang gom, dobnenggom nang gom, sikinek bol lonaʾ dangalanel bok ulumna.

¹⁵ Wera ban nenesa, ugun Roma heik ululum nim ek, nara perob lero yanggan yuba era leb elegesisinya senelamna.

Perob Lero Yanggan Yub Ara Imik Neyung Migibaʾ Ak Ulumla Yuba

¹⁶ Perob lero yanggan yub ek dara, nara alya dabnenggulunel. Ban yub era Imik Neyung migibaʾ nong ak ulumlakanya, nimi nidyaʾ dib senelemak nim, men nong dara Yahudi nim, dara onoʾ Yunani nim eneba bleblesil anasa, alya dabnenggulunel.

¹⁷ Imik Neyung adya peldisinaʾ ara perob lero yanggan yuba pik ab laga dangalamla. ”Pellililanya bera ganya dib senenaʾ nong adyok ulumnamla,” an wenyaro momnya dobok sok, ban Imik Neyung adya peldisinaʾ ara ganya dib senenaʾ adya mengewoka sidyaʾ daklamla.

Nimi Malya Unaʾ Amba Imik Neyung Ara Igina Eleklesil Yuba

¹⁸ Dara nim ara malya ganya boboka malya ulumaknya nera, ban dib yub enyek siklilimak, anasa Imik Neyung adya yu ganya bonaʾ ara imik ab nimi malya ulumak nang ek laga dangalamla.

¹⁹ Sikja Imik Neyung ak ella ubnesengnya nera, Imik Neyung ara sikinek seleb laga nenebdangamok anasa, siksamba beknaʾ laga ulumla.

²⁰ Alak ab laga danganggulumlaʾ ara, aljaʾ migibaʾ ulmorulamlaʾ ab, aljaʾ Imik Neyung unaʾ dibaʾ an hnon, bok alja soko uyiwok salek ab mouruwoka, an penya damok era, seleb eillilimak anasa, eilinggulumaknya nera, anyeganyeb ella dangalamak anasa, sikda sene bobnenewoka anasa-anasa henggunuseng.

²¹ Wera sikda Imik Neyung ak seleb pe ella ulumek anyek babya, sikda alak Imik Neyung anasoʾ aboka si imik nenenggulumeekanya, alak perob aboka gibnanya neneba orok. Alda saawoka sikja ganya seininaʾ era salyaʾ hwam dangalamookanya, sikja dongdang anaʾ ganya era gunaʾ dangalamok.

²² Sikda geremseng uboka, pe ulumna nang enesoʾ seneldalamek bok, sikda hyak dongdang anaʾ hwam nang dangamek.

²³ Dara sikda Imik Neyung adyaʾ perobaʾ denghenggunumlaʾ ara, lowoka nim anasoʾ sunulumakaʾ denghenelanya nenyek lunuwoka, wining anasoʾ gom, yokaʾ-yokaʾ ganya orokaʾ yan dombadya ulumlaʾ anasoʾ gom, soko pik belega yabalelanya nenesoʾ gom, anyek lunuwoka memelemek.

²⁴ Anasa leboka, Imik Neyung ara sikda sikja unulusibya senen ganya era malya unuru yabanaʾ ak lobonggosuk, wera anedya sikda sikja nong era malya neneldalamek.

²⁵ Sikda Imik Neyung adyaʾ dib nongaʾ ara sondaʾ lenaʾ ab, ganya orokaʾ ak bera seboka gibnaʾ anyek lunuwoka unulumeekanya, uyiwosuknya bek hyak sobaʾ giblemnesengaʾ ara hibigek anasa, unuwosuknya nera, aldib.

²⁶ Wera ban unulumek anasa, sikja gelewa era, pe salaldanya nera, unuwamenggomnya nenyek lunuwoka unulumek anasa, Imik Neyung ara sikja ban unulusibya senen ganya ek, alya nenesinaʾ ak gwab losuk.

²⁷ Dara sikja nenyab enebabya, sikja gelewa ek pe salananya nera loboka, sikda nengmab moumen anyek salaldalasibya ganya enyek bolomek. Anedya sikda hyak malyaʾ elel nongnya nenyek unulumek ara, sik nengmab moumen salabdangdo balamek. Wera anasa, sikda sik nong ara anasa leboka diriganasilaʾ ak domek.

²⁸ Hnonda, Imik Neyung ak nunjaʾ neyung anyaʾ aboka laga len ganya enyek bonaʾ orok anasa, sikda Imik Neyung adya ganya eiyiba daranaʾ ganya enyek elegousuk. Wera anedya, sikda unuwamenggomnya nenyek unuru yabalamek.

²⁹ An unulumakaʾ ara, hyak malya ganya hogung ok deknewoka, yu hwam ganya ab, naubaʾ dero bolosinya ganya ab, song ganya ab, hyak lek senen ganya ab, oldan ganya ab, waldan ganya ab, sondaʾ miniwoka len ganya ab, malya unaʾ nang eb neikaʾ hiboka, an ganya danyek unuru yabalamak.

³⁰ Anasa ban sik nong ara, sondaʾ minin nang, nimi deresin nang, Imik Neyung ak lek senenaʾ nang, malya unun nang, ganya imik neneldan nang, kebom-keboma meren nang, yu ununaʾ ak ganya hwibmouboka unun nang, nauba nim ek blekna nang,

³¹ pe geremseng ganya orok nang, bojam ganya bonggom nang, wanaʾ senen ganya bonggom nang, anya yadyek anasa or arawounun ganya unggulumla nang.

³² Sikda Imik Neyung yub ara, ban nenesoʾ anyek unulumeija nang era, somoganeseng hyok yub era seleb ella ulumakjok, ban ununaʾ era unulmorulumeekanya, onoʾ sikda yok nang edya anaso unuwanya neneba perob senewoka pelum alamak.