RASUL 28 - PERJANJIAN BARU NALCA YUBA

Mek Dubuk Sokok Malta Sam Bul Byuba Yuba

¹ Wera seleb pe eikaʾ anyek embengaʾ bul byubuk ab danyek, wera anara Malta mek dubuk sokok yab senewoka ella douba.

² Malta sokok an ulumek nim era, nuk hyak perob senewoka pe arawoka ulusik. Wera moka nauba bliboka onoʾ saragenaʾ ul yabasuk anasa, anyagan heik yokaʾ nim edya uka lolowoka ul yabasik.

³ Wera onoʾ Paulus bera, alda uka daboka lekdanob aboka, gal eboka mamagoka ul yabok. Dara, alda gala ukuk sam beil yabok salek enyek, uka poba anasa, bagaʾ hnon gobuka Paulus bedya alja soruk ek si singiwoka bel-bel al yabok.

⁴ Wera sik ulumek nim era, Paulus bedya soruk ak sam bagaʾ hnon doldol yabok ak eiyimek dara, sik moumen lebdangdobekja, ”Ban benera alda mek ekla bunaʾ ak ab si denaʾ orok ubokaʾ lobok ab dara, nunja yana lelesinaʾ bisaʾ dubnya bedya alda or ululul aboka yeboka lobnenggubla anasa, alda aldib nim olesilnya be nong ara alan,” aboka lelemek.

⁵ Bok Paulus bedya dara, bagaʾ anyek ukuk sam blebdo dorogok dara, al nong ak hnon mekaʾ oka denggumok.

⁶ Wera onoʾ wekemek nim edya dara, ousa era Paulus bera al wene salek somoganamla gom, orok dara, soruk ara nebnamla gom, senewoka diri seklemek. Bok nauba so diri sekwenemek bok, Paulus bedya nongok sam hnon yokaʾ ununaʾ orok dara, sikda ganya ebdangoka lelemekja, ”Paulus bera aldib bisaʾ dubnya benyaʾ,” aboka lelemek.

⁷ Dara Paulus bek bagaʾ si samok soko berem era, Malta moko soko damnya Publius bedya soko ek ulumok. Wera soko damnya bedya nuk hyak perobaʾ leboka, nadya ek yanalum aboka doro diyiwoka li winilya unuwosuk.

⁸ Ban salek enyek, Malta mok soko damnya Publius alja neyung bera hyak nauba saragenaʾ ber-ber anaʾ neiknaʾ salawoka diasa ab nauba ulumok. Dara Paulus bera naubenya neiknaʾ salamoknya bek kemel biniboka, alja nong eilibik soruka diyiwoka heng uboka mololomok enyek, naubenya bera seleb meremok.

⁹ Paulus bedya ban unuwoka hwemok anyek nim okoka eiyiwoka, mek dubuk sokok an neiklemek nim era, Paulus bek yalamek dara, Paulus bedya sikenek meriyisuk.

¹⁰ Dara, sikda nuk yok-yok bonaʾ nauba elegesik. Wera onoʾ, nunda lanawoka binob aboka ul yabuba dara, nunja pikik beibya dara, anyek-anyek yak dara, bobsibya senemoubaʾ nidyaʾ ara mek ekla bunaʾ ak sam bo elegel bilisik.

Roma Heikek Byuba Yuba

¹¹ Wera nunda Malta sokok ara seleb walaʾ winilya ububa seleb dara, Malta sokok ab dara, Aleksandria mok eb mek ekla bunaʾ era, saragenaʾ li wenyek anyagan ulumok mek ekla bunaʾ ek bukoka lanabuba. Wera ban mek ekla bunaʾ saramek sekiyimek gal ak ara, sikja bisaʾ dub nang Kastor beb, Polluks beb danyek, sunuwoka garamek.

¹² Wera nunda Malta sokok ab uboka dara, Sirakusa moka heikek biniboka anyagan ara li winilya mabuba.

¹³ Wera Sirakusa heikek mok eb era, mek gek berem ok bilimouba ara, Regium heikek lanal bilimouba. Wera anyagan ara, seleb li hnonok maboka gwelegoba dara, woru sam kaboʾ dorogok dara, onoʾ li penenya sum maboka gwelegoba gab danyek, wera Putioli moka heikek byuba.

¹⁴ Wera onoʾ Putioli heikek ab dara, Yesus yuba dib senewoka domek nang edya, nublaboka neikaʾ deregoka maboka ubnemab anasa, yoululum aboka ebsik dara, sikeneblaboka neikaʾ uboka mem sum hnonok gobdo uboka neikaʾ juba. Wera nen seleb dara, Roma heikek lanabuba.

¹⁵ Wera hemyabo nanga Roma heikek ab dara, Yesus yuba doboka dib senewoka ulumek nang era, wera Paulus benya arobaʾ ara, wera Roma heikek an yalamak an yub kemek dara, sikda pika dibsinob aboka, Apius deknaʾ gasa ak hnon, dekoka malamak e winilya aboka simek heik sam hnon, pika dil yeilisik. Wera Paulus bera sik dil yeilisik nang eibok dara, Paulus bera Imik Neyung ak perob aboka giboka onoʾ alja ganya era hekoka sangamok.

¹⁶ Wera nunda seleb Roma heikek byuba dara, Paulus bera or henga lob loboka ambeyok ululom aboka, yin bonnya ben hnonok uboka neikaʾ bo diri ulumok.

Paulus Bera Roma Heik Nongok Ulumok Yuba

¹⁷ Paulus bera Roma heikek ara seleb li winilya mabok dara, Yahudi nang bok Roma heikek ulumek Yahudi dub nang ek yanalum aboka ebmamagesuk. Wera sikda seleb mamagel yeilimek dara, sikenek Paulus bedya lebsukja, ”Hem yab o! Nara nunja mok soko ek hnon, nunja neyung yabo youmaʾ nang ek ab domobnya nenyek hnon, laga blekoka hnon ubnenggumsa bok, Yerusalem heikek ab nak henga gouboka Roma nang ak elegel yanyek.

¹⁸ Roma nang adya nak yana lelewoka, obnemab senen malya unaʾ era mekaʾ orok anasa, senelenyek bok,

¹⁹ Yahudi nim adya nauba lolom-lolom amek adya, nara Kaisar Roma dubnya bek or yana lelewanenel aboka molomsa. Nadya heik yokaʾ nim ek lobaʾ nenelesunun aboka unggulumsa.

²⁰ Anasa, nara ugunublaboka neikik eibdangoka mek yuba sabnemab senemsa. Anasa leboka, Israeli nang adya eimik yanamlakanya blebnesil anasa diri ulumabnya benesa, Yahudi nang adya dara, henga goubenyek,” hyok.

²¹ Dara, sikda alak wenyamek, ”Nunda Yudea sokok ab ansamba leboka dara, surat sirik anaba dobnenggumouba. Onoʾ onobaʾ ara, hemyab edya anaba anyagan yeiniboka anja malya unaʾ nuk neksinaʾ ara hyak orok,” hyek.

²² ”Bok, nidyaʾ yok-yok sokok ara, anja dololam yub anyek malya nenelesak ella ulumab anasa, anja dib senewoka dololam anyek, kebnob aboka diri ulenjab,” hyek.

²³ Dara onoʾ, sikja Paulus bek anda sumenyek ansamba yana lelewoka lebnesilim anasa yanamab aboka leiyimek. Wera Yahudi nang edya Paulus bek an ululam ak yanamab amek sum era seleb yenebok dara, wera nimi nauba so yeilimek. Wera seleb yeilimek dara, Paulus bedya yeilimek nim ek, Imik Neyung adya senenggom wenesinaʾ yub amba geklewoka laga yana lelewoka leboka, Musa bedya unuwanalum an yub eb, ununumnaʾ lelemek nang edya hnon, Yesus anasa eimik era unuwanamla aboka lemeknya okoka laga poboka gararob aboka leb elegesuk. Wenyaboka yuba en lebdibigemok salek era lugunaʾ ebaʾ ara sin dok.

²⁴ Wera Yahudi nang edya dara, hnon darasam nang era sondaʾ lelemla senewoka dib senewanggumek dara, hnon nang era dib senewoka ganya ologomek.

²⁵ Wera Paulus bemba yuba sabnob aboka longomek ara, Paulus bedya yuba seleb lebgogomok dara, sikda nauba lolobdangoka goboka lo balamek. Paulus bedya lo balamek anasa sidyaʾ lebdakamok yub ara ban: ”Ununumnaʾ lelemoknya Yesaya bek pik uboka, Geisinya adya nunja neyung yabo youmaʾ nang ek lesuk yub era pe lebok.

²⁶ Geisinya adya lebokja, Ban nim ek biniboka, anaso lebnesilim: Ugunda eimik era Imik Neyung yuba ken dara, kelemnelum bok, anyek lebsil e senewoka dara, pe ella danggunulum. Ugunda heng eilin dara, heng eillilimnelum bok, anyek ubla senewoka dara, okoka eilinggulumnalum.

²⁷ Anasa wera, Yahudi sokok nim era ganya buguma dok. Sikja o nera lebdangamek. Sikja heng ak dara, heng ubek. Bok, sikda unubdangguseng dara, sikja heng adya kemedeneseng, sikja o adya, or kebneseng, sikja ganya anababya pe ella daneseng. Ban adya, nak ganya dangawoka, nara sikenek meriyiwanesisinya bok, wenyamok,” hyok.

²⁸ Paulus ban lemookanya onoʾ lemok ara, ”Anasa wera, ban ak ella danalum. Imik Neyung adya nimi blebsinaʾ damok yub anyek, yok soko nang ek sikenek leb elegeisinok aboka seleb orugosuk. Dara, sikda ban yuba kebnamak,” hyok.

²⁹ Seleb Paulus bedya ban wenyaboka lebgogomok dara, Yahudi nang sik moumen nauba lolobdangoka lo balamek.

Paulus Bedya Roma Heikik Imik Neyung Yuba Lelemok Yuba

³⁰ Wera Paulus bera Roma heikek ara alja rupiah seʾ dekemok ek, gobdo gibnaʾ penya ulumokok ab dara, nimi nauba alak yalamek dara, nidyaʾ perob aboka doro dililisuk.

³¹ Dara, yokaʾ-yokaʾ adya Paulus bek igina kwelinaʾ orokaʾ anyek, al nong ara asaʾ ganya boboka, Imik Neyung adya senenggom wenesinaʾ yub ab, Wenelesilnya Yesus Kristus amba yub ab, dara anyaʾ aboka geklewoka lelesuk.