RASUL 24 - PERJANJIAN BARU NALCA YUBA

Paulus Bera Feliks Bedyaʾ Saramek Ulumok Yuba

¹ Wera lambadya sum seleb maboka gwelegok dara, Yahudi yuba wa gakaʾ dubnya Ananias beb, Yahudi yuba dam nang eb, bera unuwanamla anya, bedya alja si nera Tertulus beb neikaʾ yeilimek. Sikda Feliks mok soko damnya bek hogung ak yeiniboka, Paulus bek yanamek damok ara alak nekel yeilimek.

² Dara, Tertulus bek anda unuwanalum alamnesilim aboka youbomeekanya, nimi longomek ak yeilimok dara, Tertulus bedya Paulus bek yana kiboka mok soko dubnya Feliks bek lebokja, ”Neyung, anda mok soko damnya o, anda perobnya ululam! Anda nunja moka bo ulusilim adya, nunja heikek soko era namena pe ulumab. Onoʾ hnon anja pe unululam adya nunja sokok yokaʾ-yokaʾ nidyaʾ ara pe memelemak.

³ Ban nidyaʾ anja unulusilim amba leboka, nunda nidyaʾ yokok sam anaba perob aboka imik nenewoka, onoʾ pe welesilim aboka doro dililinjab.

⁴ Wera anja ok unulusilim bok, sum enyek dara, anja pe unuwonun senemen sum enyek, salyaʾ dengaro loblyek aboka, nunja anyek neyung unuweisilom aboka, ban mek molowajab anyek kebnesilim.

⁵ Nunja laga gaboka eillilimab ara Paulus bek dara, alda hyak soko me yok-yok soko nidyaʾ alja adya malya nenewoka dolul meneklamla. Onoʾ alda Nazaret mok eb lanabok mal gaknya ulumla.

⁶ Ban nen ununaʾ orokaʾ anababya, alda Imik Neyung ek ab malya gebnun aboka ulumok bok, nunja alak salawoka henga goumoba. Nunja unumoubnya nera, Yahudi Imik Neyung yuba lelemlaʾ sunuwoka yana lelewoka unuwanob aboka henga goumoba bok,

⁷ yin bonaʾ dubnya Lisias alameknya bedya nunja sorukuk ab hyak migib adya bleboka dobokaʾ anasa lomouba.

⁸ Dara ono Lisias bedya dara, nuk ugunda mok soko damnya bek hogung ak laga bululum aboka orugusuk. Anasa neyung o, anja Paulus bek heibmenekanya, an aldib aboka anda malya unululam aboka yana kimab anyek damok ara an senewoka ella danalam,” hyok.

⁹ Dara onoʾ anyagan ulumek Yahudi nang era, Paulus bek sam ara anda malya unululamnya aboka yana kiboka, alda Tertulus bedya lelemoknya nenyek aldib lelemla aboka alak hmalamek.

Paulus Bera Yuba Garabdok Yuba

¹⁰ Dara mok soko dubnya Feliks bedya Paulus bek soruka gwakdewoka, ”Wera or anda yuba sablom,” hyok dara, Paulus bedya lebok ara, ”Neyung dubnya o, anda mok soko enyegan dubnya dangoka ululam salek era, gibnaʾ gong-gong lelemla ara, ella ulumna. Anasa wera nenesa leboka, nara sumen anja saramek sam ganya hekoka yuba garabdanamna.

¹¹ Wera neyung dubnya o, nara Yerusalem heikek sam Imik Neyung gibnun aboka li obadya manaʾ sibin anaba loboka yasa anyek, yok nang ek heibyaawoka berra ella danalam.

¹² Nak dara, Imik Neyung yuba gak ek gom, Yahudi nim edya yuba don ek gom, or salyaʾ ak sam gom ara, malya ubnun senewoka nim eboka bo bolowoka unaʾ ara, yana kilinyak nang adya, hyak eibnenggunyek.

¹³ Wera onoʾ sik Yahudi nang edya anaba, Paulus alja malya unulamla damok era ban aboka anak laga nekgenaʾ ara orok.

¹⁴ Anasa nak dara, wen nadya unulamna ara anak laga lebnenggen. Nara aldib Yesus adya nekesuk anyek sunuwoka, Yahudi nim edya dara, malya alamak bok, nunja Wenelesilnya Imik Neyung bek giblamna. Anyek hnonok aldib unulamna. An unulamna anaba, onoʾ Musa bedya unuwanalum an yuba hnon, yok ununumnaʾ lelemek nang edya momnya domek yuba hnon, or aldib senelamna.

¹⁵ Dara onoʾ, sik Yahudi nang adya Imik Neyung unuwanamla senelemak sok, naba neikik eimik era nimi embengaʾ ulumek ara somogorob nim era suboka embengaʾ buknemak senelamna. Nenyek dara, or perob ok ulumak nanga hnon, malya unaʾ unulumak nanga hnon, unuwanasil ara nara dib senelamna.

¹⁶ Wera nenesa leboka, nadya mek ganya enyek geisa ulunun senewoka, Imik Neyung ak anaba, onoʾ nimi sirik ak anaba, sikenek hyak pe unulunun senewoka sunulyamalamna,” hyok.

¹⁷ ”Nara gibnaʾ wen Yerusalem heikek unggulumsa ara, onoʾ wenyok ara, nadya mok soko nim emba sikenek arasik bonaʾ enyek, boboka onoʾ Imik Neyung ak gibgiga yokaʾ-yokaʾ beil bunun aboka anasa Yerusalem heikek yeilimsa.

¹⁸ Wera lebna bonaʾ dara, bobsedya onoʾ Yerusalem heikek yasa dara, wera arasik bonaʾ elegoka, onoʾ Imik Neyung amba beiyiwoka ulumsa sum enyek, Yahudi nang edya nak Imik Neyung ek sam, Imik Neyung ek wekoka seleb geisa nenebdangamsa bok, eibnyek. Dara, na unulamsa ak ara nimi nauba unaʾ orok uboka, onoʾ nimi yuba saboka eirigal ganya hnon unaʾ ara orok.

¹⁹ Alda Yahudi nang yokaʾ ak wenen nang Asia mok eb ara yeiniboka ulumek. Ban lebna nang nong enyek, nasamba leboka, sikda anyagan yeiniboka hnon yokaʾ ulumso dara leboka, anak wenyal yanenggeseng.

²⁰ Gom, alda onoʾ ban nak yana kinyak nang danedya, wera na nong anyek, Imik Neyung yuba damnya bek bo yeilinyek sum meknewoka malya umsa malya unaʾ enesa leboka, luluwananyak dara alan, perob.

²¹ Sikja dara, nak sam yokaʾ-yokaʾ lenenaʾ loboka, alda sikja lelemaknya nera ban nenyek ok dara, nara sumen yana lelewoka ulunyaknya nera, seleb somogorob nim era eimik onsok embengaʾ suboka buknemak aboka dib senelenanya nenesa leboka unyak amsa anasa, nenyek ok nak or yana lelewaneneseng,” hyok.

²² Wera danyek Feliks dubnya bera, Yesus adya neklesuk yub era, orowek pe ella ulumoknya bek adya, wera nera al anyagan seleb lero lobnob aboka, alja leboka ara, ”Yin bonaʾ dubnya Lisias be yalya danyek, nenera saawoka memero dakdowanamab aboka anasa,” lobnamab aboka lemok.

²³ Dara onoʾ Feliks dubnya bedya, Paulus henga goubuka bo ulumek yin bonaʾ gaknya bek, pe diri bo ululum aboka orugosuk bok, Paulus bek onoʾ Paulus alja hemyab edya alak denaʾ bo aral yeiniboka unulunok aboka orugosuk.

Paulus Bera Feliks Beb Drusila Gebdak Bo Byik Yuba

²⁴ Dara, onoʾ li wen maboka gwelegok dara, Feliks bera alaʾ gela Drusila geb neikaʾ halyaʾ alda Yahudi nang ulumok adya yeilirek. Dara onoʾ Feliks bedya, Paulus bek Yesus Kristus bedya yub enyek leblul aboka, anyagan do yoululum aboka orugosuk dara, yuba lelemokaʾ anyek dib senewoka kelemok.

²⁵ Bok Paulus bedya jong unaʾ yub ab, ganya siklewoka unaʾ yub ab, eimik Imik Neyung adya nidyaʾ yana lelewanasil yuba lel yabok dara, Feliks dubnya bera hyak loka daboka Paulus bek, ”Wera nera anda seleb leblam anasa, anda or bimenekanya, onoʾ yok sum lebnesilim senewanamna salek enyek, el bululum henya dara, anak el yananjak,” hyok.

²⁶ Feliks bedya nen wenhyok ok ab dara, alja dara, Paulus bedya eimik rupiah hnon eleganenel senewoka diri ulumok. Wera wen senen ganya bomok adya, wera Paulus bek henga geregemek bok, Feliks bedya nab neikaʾ yuba salamnanam anasa e yoululum aboka, liga gong oruklesuk.

²⁷ Seleb gibnaʾ penya lebgogomok dara, Perkius Festus benyek, Feliks be lunuwoka soko dubnya dangamok. Bok, Feliks bek dara, Yahudi nang perob senelemaknya nera unuwonun senewoka, alda Paulus bek heng goubnaʾ lomok lolomok.