RASUL 23 - PERJANJIAN BARU NALCA YUBA

¹ Wera Paulus bera Yahudi nang yuba sanaʾ gak nang anyagan ulumek nang ek pe keebdaboka lebokja, ”Nadya hemyab o, na embengaʾ ulunenya nenesa dara, nadya mek ganya edya dara, Imik Neyung ak malya unaʾ ara orok senelamna,” hyok.

² Paulus bedya ban wenyaboka lel yabok enyek, Yahudi Imik Neyung yuba wa gakaʾ dubnya Ananias bedya, al gokgobok sam seklemek nang ek, Paulus bek sibamaʾ mouboka oblulum aboka orugusuk.

³ Dara Paulus bedya, yuba lenaʾ dubnya Ananias bek lebokja, ”Sondaʾ anasa bobnenewoka geisa ulumna seneldalalamnya o, Imik Neyung adya ambabya waboka obnenggel. Anda anyagan bukoka Musa bedya unuwanalum an yuba sunuwoka nak yana lelenelem bok, onoʾ anda yub en blekoka, nak oblulum aboka nimek oruklelam,” hyok.

⁴ Wera danyek, Paulus ben berem seklemek nang edya Paulus bek lebekja, ”Anda Imik Neyung bedya yuba donaʾ gaknya bek malya geblelam de?” hyek.

⁵ Wera Paulus bedya leboka dara, ”Al wenyekaʾ e hemyab o, alda Imik Neyung yuba wa gakaʾ dubnya ulumla ara nara elgom ubman adya salyaʾ lebna. Dara, Imik Neyung yuba bukuk sam momnya dobok ara, Anja sokok yangawoka bo ulusilya nang ek salyaʾ malya nenewoka malya yuba lenaʾ ara mem hyok bok, lebna,” hyok.

⁶ Dara onoʾ Paulus bedya kemelemok enyek, anyagan ara yuba sanaʾ gak nang era, hnonda Saduki nang, hnonda Parisi nang hnon bulumekaʾ eiyisuk dara, Paulus bedya yana lelewanob aboka longomek nang ek lebok ara, ”Nadya hemyab o, nara Parisi nang yokaʾ uboka, Parisi nang edya beibnyek ak ulumna. Nak anyagan yana lelelenyak ara somoklomak nang era embengaʾ subnemak aboka dib senelenanya nenesa ulenyak,” aboka lelemok.

⁷ Ban wenyaboka Paulus bedya lelemok sum enyek, Parisi nang eb, Saduki nang eb, keboka mala webdangoka, iriri aboka lelemeekanya, wera yuba longowoka sanaʾ ara bokoka yok-yok buma penya dok.

⁸ Ban unuweknya nera, Saduki nang edya dara, somoklemak nang era eimik subnemak an yub era orok senelemek. Imik Neyung lero ara unaʾ orok, yok-yok ganya sununaʾ arobaʾ unaʾ anaba orok alamek bok, alda Parisi nang edya dara, ban nera nidyaʾ ulumla aboka dib senelemek adya umek.

⁹ Dara, sikda mala weboka doluwoka nauba obdangdo balamek. Dara, Parisi Imik Neyung yuba neksinaʾ ulumek nang edya yeiriwoka lelemekja, ”Nunja dara, Paulus benera hnon malya uboka meknenaʾ orok,” aboka lelemek. ”Alja yuba lelemla ara yok ganya edya gom, lero edya golulumokaʾ adya gom, lelemla gom anasa, mem,” hyek.

¹⁰ Wera hyak senenggomaʾ mala dibaʾ lanabdangoka oldal yibik dara, anyagan yin bonaʾ dubnya bedya dara, unuldeijekanya, Paulus bek giliwoka gal wabnaʾ geboka obijek aboka, yin bonaʾ nang hnon ak, Paulus be doboka bo bimunukanya, e lomok bo bululum aboka orugusuk.

¹¹ Dara onoʾ nenyek mabok sum enyek, Wenelesilnya Yesus bera, lendara dib Paulus berem sekoka, ”Anda ganya dabogalom,” hyok. ”Anyagan Yerusalem heikek nasamba laga lelelum sok, Roma heikek anaba neik so unulumnalam,” hyok.

Paulus Bek Obnobaʾ Aboka Gegelemek Yuba

¹² Ampum so maboka gwelegoka dara, Yahudi nang era, Paulus bek obnobaʾ aboka gegelemek. Sikja lelgogolomekaʾ ara, ”Nunda Paulus anam obnenggumeibya salek ara, gwaneng ab mek ab mekaʾ denggunumab,” aboka lelemek.

¹³ Paulus bek obnobaʾ aboka gegelemek nang era hiboka dara, denga yuba hnonok ebdobnya mekbadya piboka nauba so ulumek.

¹⁴ Dara, sikja Yahudi yuba wa gakaʾ dub nang ek hnon, yuba dam nang ek biniboka, ”Nunda orowek seleb laga leboka lemabja, Nunda anam Paulus bek obnenggumeibya salek era, yokaʾ-yokaʾ deregoka, meka denaʾ ara unuwanggunumab aboka lemab,” hyek.

¹⁵ ”Wei anasa hemyab o, wenera ugunda hnon, yuba sanaʾ gak nang nidyaʾ hnon, Roma nang senenggom yin bonaʾ dubnya bek, Paulus bek, bera onoʾ pe yana lelewoka ubnamab anaso anyek bo yanalam aboka momnya donaʾ doboka wenyaboka beibnelum. Anadya wera Paulus bera anyagan anam yanggumlya salek enyek obnamab,” aboka lelemek.

¹⁶ Bok Paulus bek unuro obnemab aboka gegel yabek anyek, Paulus ben eilibsal gedya me nedya kebok. Dara, al mam Paulus bera, al ulumok ek wekoka, ”Wera mam o, obnemab senelenjak,” wenyaboka nekdo bilimok.

¹⁷ Dara onoʾ Paulus bedya yin bonaʾ dubnya bek ben hnon yalom aboka lebokja, ”Senenggom yin bonaʾ dubnya bek ban me nenedya yokaʾ don neknamla anasa, eboka bo abal bilom,” aboka orugumok.

¹⁸ Yin bonaʾ dubnya bera, goubenya me nen eboka senenggom yin bonaʾ dubnya bek bo biniboka lemokja, ”Henga geregoubnya Paulus bedya, ban goubenya me nenedya, neyung anak yokaʾ don neknamla anasa, eboka bo bilom aboka nak orugenel anasa, nara bo yeilimna,” hyok.

¹⁹ Dara yin bonaʾ dubnya bedya nekdo bilimok me nek soruka glib salawoka sikbeyok munaʾ ak wekerek dara, ”Wera anda nak ara hekaʾ ak neknenelem do?” aboka heimok.

²⁰ Wera gobenya me nedya yin bonaʾ dubnya bek lebok ara, ”Yahudi nang edya yuba sabak ara, neyung anja Paulus be doboka yuba sanaʾ gak nang ak onoʾ saawoka pe yana lelewanamak anasa bo youlul senen lemak,” hyok.

²¹ ”Bok neyung o, Yahudi nang Paulus bera yana lelesinaʾ ak bo binimab anasa, molol yabeija dara, kenggom mem. Dara, nimi denga hnonok uboka, ebdobnya mekbadya anaso nanga pikik Paulus bobeija enyek obnob aboka webak bar. Dara, sikda Paulus anam obnenggumeibya salek era, gwaneng meka denaʾ denggunumab seleb memewoka lebgogomak. Wenebabya seleb weboka, neyung or anja lebmen yuba donok aboka umak,” hyok.

²² Dara, yin bonaʾ dubnya bedya nekdo bilimok me nek, ”Wera ban nak an nekel yalem yub enera, nara seleb yin bonaʾ dubnya bek nekemna anaʾ ara hyak mem,” wenyaboka, ”Or bilom,” hyok.

Paulus Bera Feliks Bek Bo Byik Yuba

²³ Wera onoʾ senenggom yin bonaʾ dubnya bera, yin bonaʾ dub nang ek penya nang yoururum asuukanya, sikenek lebsukja, ”Yin bonaʾ oldan nang denga yuba sekbadya hnon gegeb loboka, abaksinaʾ pam ak bukoka oldan nang denga winilya, doluknaʾ mal bolomak nang era denga yubaʾ sekbadya doboka gegeworurum. Al wen inimnek jam sembilan anyek Paulus be eboka Kaisarea heikek bo binilum aboka gegeworurum hyok.

²⁴ Dara onoʾ Paulus buknamlya abaksin pam era, hnon yok alsamba doboka beiblulum. Dara, Paulus bera pe bo bilimunaʾ ara mok sokok dubnya Feliks dubnya bek pe bo aba yanalum,” aboka orugusuk.

²⁵ Wera senenggom yin bonaʾ dubnya bedya mok soko damnya bemba momnya doboka beibok ara ban:

²⁶ ”Neyung hyak senenggom mak soko damnya Feliks o, Klaudius Lisias bedya perob aboka gibgen.

²⁷ Ban benera Paulus, Yahudi nang edya henga gourob ak, nadya yin bonaʾ nang eb alak yangganaʾ orok dara, wera Yahudi nang edya obseng bok, alda Roma nang yokaʾ eiyimsa anasa, blebemno.

²⁸ Nara benera aldib hek malya unaʾ ek unumok adya Yahudi nang edya obnobaʾ ulumak anyek ella donun aboka, sikja yuba sanaʾ gak nang ak bo bilimno.

²⁹ Wera yuba doboka yana lelewoka ulumoung enyek, alak gasa ek henga geregoka beibneseng gom, obneseng gom malya unaʾ era, alja hnon ununaʾ ara orok. Yahudi nim edya yana kilimong ara, sikja Imik Neyung yub anyek beklesil aboka yana kiboka miniwoka lelemong.

³⁰ Dara onoʾ nak Yahudi nang edya Paulus bek obnob aboka welemak aboka nekdo yeilinyak dara, nadya doboka neyung mok soko dubnya, anak doboka bo bululum aboka orugeisin. Dara, alak yana kiboka miniwoka lelemak nang ek ara, ugunja wenyalalumnya nera, or neyung mok soko dubnya bek bo bululum aboka orugeisin,” aboka yin bonaʾ dubnya bedya wenyaro webok.

³¹ Yin bonaʾ dubnya bedya wenyaboka momnya doboka elegoka orugusuk dara, yin bonaʾ nang era alja lemok sok unumek. Dara, neik inimnek enyek, sikda Paulus bek doboka bobeknya nera mouruwoka bo balamekaʾ ara Antipatris moka heik bo abal bilimek.

³² Wera ampum maboka gwelegek dara, abaksin pam ak abagoka yina bolomek nang enyek, wera ugunjok Kaisarea heikek abal binilum aboka boksik dara, dem yin bonaʾ nang era, sikda on pik sik ulumek heikek yek.

³³ Wera abaksin pam ak abagoka yina bolomek nang era, Kaisarea heik nong ok byik dara, yin bonaʾ dubnya bedya mok soko dubnya bek bo binilum aboka, weboka elegesuk momnya donaʾ era, Feliks bek elegek dara, onoʾ Paulus beneba onoʾ alak abonggemek.

³⁴ Wera mok soko damnya Feliks bera momnya donaʾ einilimok ara, eibgogowoka Paulus bek, ”Anda hekmokebnya do?” aboka heimok. Wera onoʾ Paulus bera Kilikia mok ebnya ella umok dara,

³⁵ ”Wera, or perob,” hyok. ”Anyek malya ulumla aboka yana kilinjak nang enyek, anyagan yeija dara, aldib malya ululam gom aboka heibuka ubnenggen,” hyok. Dara mok soko damnya bedya, ”Paulus bera or nadya ek an henga geregoka beiyilulum,” aboka orugosuk.