RASUL 20 - PERJANJIAN BARU NALCA YUBA

Paulus Bera Makedonia Abaʾ Ara Yunani Moka Byuk Yuba

¹ Wera Epesus heikek ara yok-yok malya yub edya yeiriwoka, iriri aboka lelemok ara seleb dengamok dara, Paulus bera Imik Neyung yuba doro diriga ban nang mamagoka, wera anyagan ugunda pe ulululum aboka wenebgogowosuk dara, perob aboka gibgogowoka wenewoka ubsuk dara, Paulus bera alda Makedonia sam lanawoka balamok.

² Paulus bera alda Makedonia moka nidyaʾ yibiniboka, wera anyagan ulumek nim ek pe ululum aboka wenyaboka wenero yabalesuk. Bok nen unubgogowokaʾ seleb dara, Paulus bera Yunani moka byuk.

³ Wera Yunani mok era, Paulus bera alda walaʾ winilya ulumok. Dara onoʾ Yunani mok eb ara, Siria moka bununaʾ aboka bobgegewoka ulumok enyek, yok nang edya Paulus bek, ”Yahudi nang edya anak obgenobaʾ aboka gegeb lobjakbok anasa, banggom mem,” wenhyek anasa, Paulus bera alda Makedonia pik uboka saawoka on pik yanamna senemok.

⁴ Dara wera, Paulus beblaboka neikaʾ yabalamek nang era, Pirus bedya me Sopater, Berea heik abnya bera an, Tesalonika heikek ab nanga penya ara, Aristarkus beb, Sekundus beb, Derbe heikek abnya Gayus beb, dara an. Onoʾ Timotius beb, Asia mok eb nang era Tikhikus beb, Trofimus beb, neikaʾ Paulus beblaboka dongero yabalamek.

⁵ Dara ban nang danara, sikda men Troas heikek biniboka nuk diri ulusik.

⁶ Wera Yahudi nang edya welenaʾ orok roti gwanenga den sum era, seleb meewoka dero dakdowek dara, nunda Pilipi heikek ulumoub ara loboka, mek ekla bunaʾ pik lanawoka bilimouba. Wera onoʾ li dombadya maboka gwelegok dara, nunda nidyaʾ men nang ulumek ak Troas heikek mamagouba. Wera Troas heikek yeiniboka ulumouba salek era, li sekbadya mamouba.

Paulus Bera Troas Heikek Sidyaʾ Kemero Dakdowok Yuba

⁷ Troas heikek ara, ban minggu en men sum enyek, hemyab eb bolowoka neikaʾ ak delemouba. Paulus bera ampum lanawoka binimna senemok anasa, anyagan ulumek nim emba yuba nauba lebdibigemok. Wera inimnek dukdukanek dangamok anaba Paulus bera anam yuba lelmorulomok.

⁸ Dara, nu yuba longowoka leldalamoub e nera, e denebaʾ imik moruwoka somek adya, nunda imik sam longomoub ak sam ara dilinaʾ uk ara nauba yeb ganagamek.

⁹ Ban sum enyek, goubenenya ben hnon alja si nera Eutikhus bera, heng kemen pik pomek ak bulumok. Paulus bera yuba nauba lebdibigemok dara, goubenenya bera kero bulumok ara, hogung dun-dun aboka, imik ab ara sokok sam malyinggyuk. Wera nim adya jab salamek enyek, seleb somogok ak eibek.

¹⁰ Bok Paulus beneba sokok sam yingginiboka goubenenya bera seleb somogomokaʾ ak eirib salawoka somomok. Dara onoʾ Paulus bedya yok nang ek, ”Ugunda lok ganya bonggom. Alda somoganggumla, or embengaʾ ulumla bar,” hyok.

¹¹ Seleb unumok dara, Paulus bera onsok imik sam welewoka bukumok. Dara, roti gwanenga nim ek bokosuk seleb dara, sikda nidyaʾ demek. Wera onoʾ inimnek pik Paulus bera yok nang eb, onoʾ yuba saldalamekaʾ seleb dara, gwelegel yabok dara, ban salek era lanawoka balamok.

¹² Wera anyagan yuba longowoka ulumek nim edya, goubenenya meremoknya bera, alja ek bo bilimek. Ban unumok adya sikda perob senewoka, sikja ganya hekesuk.

Paulus Bera Troas Heikik Abaʾ Ara Miletus Heikik Byuk Yuba

¹³ Wera Paulus bera Asos heikek ab dara, mek ekla bunaʾ pik banaʾ loboka, soko pik binimna senewoka orowek sunuwoka meemok. Dara, nunda mek ekla bunaʾ mamok ak byuba dara, Paulus be yanggalyaʾ anyek pika diboka ehwibdanob senewoka, nunda men Asos heikek byuba.

¹⁴ Wera nunda seleb Asos heikek ab neikaʾ ehwibdouba dara, Paulus bera mek ekla bunaʾ ak bul yinggyuk dara, nunda nidyaʾ lanawoka Metilene heikek byuba.

¹⁵ Dara, Metilene heikek ab uboka dara balamoub ara, Khios mok eb neikaʾ dibblubdarek sam byuba. Amja sum soʾ era lanawoka balamoub ara, Samos heikek byuba. Dara anyaganara, li hnonok maboka onoʾ balamoubnya nera, Miletus heikek lanal byuba.

¹⁶ Paulus bera Asia mok eb li salyaʾ maboka yeneb loblyek aboka, orowek pika bannya dara, Epesus heik pik bukgiga binggunumna senewoka gegemok. Paulus bedya dara, or perob dara, Yahudi nang perob sum Pentakosta yenewanggumlya bok, Yerusalem heikek men bisinya senen ulumok.

Paulus Bera Epesus Heik Ab Sidyaʾ Lero Dakdowok Yuba

¹⁷ Wera Paulus bera Miletus heikek ab uboka, Epesus heikek sam Imik Neyung yuba dam nang ek, nara Miletus heikek an ulumnaʾ anasa, el yananulum aboka yuba beibok.

¹⁸ Wera Epesus nanga yek dara, Paulus bedya sikenek lebokaʾ ara, ”Hem yabo nang o, nara men Asia anam yeilimsa sum enyek, ugun gangganek nadya hekaʾ huboka ulumsa ara, seleb ella ululum.

¹⁹ Nara ganya sokok nenebdangoka, heng mekaʾ yabalenen anababya, Yahudi nang ununaʾ adya yokaʾ-yokaʾ igina kwellilinyek bok, oka kweboka gweklenadyok, Wenelesilnya bedya wa nera welemsa.

²⁰ Nara ugunuk pebsulul senelamsa anyek, sene mandenaʾ loboka welemsa. Nadya nidyaʾ ugunuk wenewoka neklesisa ara, or nimi hnoum senenggomaʾ ak hnon, onoʾ ugunja ek anaba wenewoka leboka neklesisa ara ella ululum.

²¹ Nara Yahudi nang yokaʾ ak gom, or onoʾ yok soko nang ek anaba, nara sikja malya unulumak ak ab loboka ganya dangawoka Imik Neyung ak sam yeijikanya, Wenelesilnya Yesus bek dib senewanok aboka weneb elegoka ulusisa.

²² Anasa wenyek dara, Imik Neyung Geisinya adya nak onolonel anyek bleknyek aboka, Yerusalem heikek binimna. Binya dara, nak hekaʾ unuwanenel ara, naba elgom bok binimna.

²³ Bok Imik Neyung Geisinya adya, nara yabalamna heikek nidyaʾ ara, wera anak henga goubsin ek beibnenjak sum hnon, nauba gweklemnalam sum hnon, yenewanenggel wenyalanelaʾ ok, nara ella ulumna.

²⁴ Nara Imik Neyung adya nuk wana uboka aralesil perob lero yanggan yub enyek, laga lelemnesilim aboka elegenyok wa anyek, pe senenya loboka webdaknun senelamnaʾ adya, nadya nong ak dara, seininel danggulumna.

²⁵ Nara ugunuk sam seleb yeiniboka, onoʾ ugunuk hnon, Imik Neyung adya wenelemnesil yub era, ugunuk seleb nekesisa. Anasa wera wenyek dara, ugunublaboka hnon mekaʾ hogunga eibdanggunumabaʾ ara orowek ella ulumna.

^26-27 Anasa, nara sumen enera ugunuk sam gununaʾ loboka laga poboka lebnesinaʾ ara, Nara Imik Neyung adya alja orowek seinimokaʾ nidyaʾ anyek, ugunuk ak hyak sene mandewoka longgulumsaʾ anasa, ugun gangganek an nimi be hnon yuba dobnenggunumla dara, nera nadya huka bonggulumna adya, wenyhesin.

²⁸ Anasa wera ugun dam nang pe diri bo uldalamunukanya, onoʾ Imik Neyung Geisinya adya ugunuk diri bo ulusinok aboka elegesuk Imik Neyung yuba donaʾ nimi nidyaʾ ak pe diri bo ulululum. Imik Neyung adya, alja me somogok pik uboka, yuba dolomak nang era, Imik Neyung adya alja domba pam dibaʾ dangiyisuk nang anyek, ugunja bo uboka diri ulululum.

²⁹ Nak anyaganyeb ara bannya dara, yu nong bei gam anyek ugun gangganek yanamak. Dara, ugunja bo ulumun nang era, bei gam danadya sikja digin dibaʾ denaʾ danamak ara, ella ulumna.

³⁰ Hnonda ugun gangganek an ululum nang enedya eimik era, boro doloknaʾ yub enyek lero yibinisak. Ban unuwanamaknya nera, anadya diriga ban nang enyek seklama dariyiwoka sikenek sam gliboka bo bisinob aboka ubnamak.

³¹ Anasa wera ugunda keebmoubuka diri ulululum. Nara gibnaʾ winilya ulumsa ara, inimnek yubyek pik noruwoka heng mekaʾ nauba yabalenen bok, ugunja mok nang ek dek-deka sonaʾ loboka wenewoka nekeldibilloklosisa ara, beklelulum,” hyok.

³² ”Dara wenyok, nara ugunuk Imik Neyung bek hnon, alja wanaʾ uboka eleksinaʾ yub ek hnon, dib elek lobsin. Al ugunuk migibaʾ nenellilisilikanya, onoʾ alja mabo munaʾ gobdo dangalillisilnya bek elek lobsin.

³³ Ugunja nak rupiah gom, ongon akleng gom, hnon eleganenok senewoka ganya wenggulumsa.

³⁴ Nadya soruk enedya, wera na nong ak okna ubnenaʾ hnon, nadya hemyab ak okna ubnaʾ hnon welemsaʾ adya, dero ulumoubaʾ ara, ella ululum.

³⁵ Nara nidyaʾ unulamsa anyek ugunja dilililulum aboka, ugunuk sam nimi hmeng ulumak nang ek wa weboka aralelulum aboka amasisa. Anasa wera, Wenelesilnya Yesus bedya, nimi yok nang eleknaʾ anyek perob so, don danagom, wenyamok ara ban amba anasa, seiniwoka beklemnemab,” hyok.

³⁶ Paulus bedya wenyaboka seleb lebgogomok dara, sikda nidyaʾ koma lumugoka bukumek dara, Paulus bedya heng uboka molomok.

³⁷ Dara, Epesus nimi nidyaʾ ara, Paulus bek salab gweiliwoka giboka nauba engelemek.

³⁸ Paulus bedya, ”Epesus nim ugunda hnon saawoka eibnenggununulum,” amok adya, men nonogoka nauba so engelemekjok, binimok mek ekla bunaʾ ak sam bo bokol bilimek.