RASUL 14 - PERJANJIAN BARU NALCA YUBA

Ikonium Heik Ulurek Yuba

¹ Wera Paulus beb, Barnabas beb, Ikonium heikek anaba Antiokhia heikek ulumok sok neik diligaʾ domok. Paulus beb, Barnabas beb dara, Yahudi nim edya yuba don ek biniboka, hyak pe sunuwoka Imik Neyung yuba lerek adya, Yahudi nimi yokaʾ ab, Yahudi gom nim eb, Yesus ak dib senewoka doromek.

² Bok onoʾ Yahudi nimi darasam hnon nim era bokoka, Yesus yuba donaʾ lek senewoka ulumek nim era, Yahudi gom nim ek wenewoka sondaʾ anasa lelerak aboka wenewoka lelesik adya, wera sikbabya Yesus ak dib senewoka dolomek nim ek malya senelemek.

³ Dara, Paulus beb, Barnabas beb dara, Ikonium heikek ara liga nauba so mandewoka ubdarek. Wera ulurek ab dara, hyak asaʾ ganya boboka, Wenelesilnya bedya yuba nauba lelerek. Wera Wenelesilnya bedya anaba, nadya wanaʾ uboka eleksinaʾ yub ara, dib ulumla ella danokaʾ aboka, lok so beknaʾ ab, senenggom lok so ununaʾ ab, elegesuk.

⁴ Bok, heik enyegan nimi sik moumen dukaʾ lolowoka bokdangoka, hnonda Yahudi nang ek sam bokoka makal balamek dara, hnonda Imik Neyung yuba lenaʾ gak nang ek sam mamagel bilimek.

⁵ Wera danyek, Yahudi gom nim eb, Yahudi nimi yokaʾ nim eb, sikja dub nang eb, Paulus beb, Barnabas beb danyek, girik adya gweboka saboka obnemab aboka yuba sal gegelemek.

⁶ Wera sik penya ban unuwoka ngoroknaʾ delemekaʾ anyek eiyirek dara, Likaonia moka Listra heik sam hnon, Derbe heik sam hnon, doknol bilirek.

⁷ Dara mok heik enyegan biniboka, Imik Neyung perob lero yanggan yuba lero yabalerek.

Listra Derbe Heikek Sam Ubdek Yuba

⁸ Wera Listra heikek ara, nimi ben hnon anam beiyimekaʾ wek ara moruwoka, li hnonok sirik anaba yabanggulumoknya yana heimoknya hnon ulumok.

⁹ Dara alda bera, Paulus bedya Imik Neyung yuba lelemok dara, pe kero bulumok. Wera danyek, Paulus bedya alak ngekluboka, bera dib senemokaʾ eibookanya, Imik Neyung adya hwebnamso senemok dara,

¹⁰ yuba nauba yalawoka lemokja, ”Anda jong nonga seklom,” hyok. Dara, bera berra sekoka, sakdo dorogoka bini yeini ul yabok.

¹¹ Wera nimi nauba Paulus bedya unulumok anyek eibek dara, Likaonia yub adya lelemekja, ”Nunja giblemab im nang ara, nimi bokaʾ nenebdangoka nun gangganek sokok sam seleb yarak,” aboka lelemek.

¹² Anasa wera, Paulus yuba salamok anasa, Hermes aboka si simek. Alda Barnabas bek dara, Zeus aboka si simek.

¹³ Wera Zeus bek giblemek gaknya bera, gibnaʾ e nera heik berem weilik ubookanya, al ab, nimi nauba yeilimek nim eb, neikaʾ Paulus Barnabas ak sikja dara, im nang anyaʾ aboka pama oboka gibnobaʾ aboka ulumek anasa, yem pam eb, ngangak gwaragiyimek esaʾ eb, senenggom pik sereknaʾ ak sam bo yeilimok.

¹⁴ Wera yuba lenaʾ gak nang Barnabas beb, Paulus beb dara, nim adya sikenek im nang nenewoka pama oboka gibsinoba unulumek anyek kerek dara, sikja ongorek aklenga gweldekoka beiyiwoka gibsinoba ulumek nimi hnoum berra biniboka lerekja,

¹⁵ ”Wei, ugunda hekasa ban nenera unulum do? Nunda im nang gomaʾ. Ugumba ululum sok, nundaʾ nim anyaʾ. Nunda anyagan younum ara, ban unuwoka yokaʾ-yokaʾ giblelumaʾ anyek loboka, Imik Neyung bek, im ab, soko ab, senenggom mek gwan eb, lomok sam ulumla nidyaʾ ab, uyisuknya bek sam ganya angawoka yoululum aboka, perob lero yanggan yuba bo yeiniboka lel yosunum.

¹⁶ Youmaʾ dara, Imik Neyung adya mok soko nim era ganya doboka sikja unuwanob senelemeijinya nek unulunok aboka soruka lobol lolosuk.

¹⁷ Bok anababya, alda sikenek ara na ulumna aboka beknaʾ sobaʾ neklesuk. Alda mok li imik ab ara eleklesuukanya, onoʾ ugunuk gwanenga wa weboka nonga yongon salek eleklesuk adya, pe unulusuk. Alda ugunuk denaʾ elegoka, ugunja ganya sangellilisil,” arek.

¹⁸ Barnabas beb, Paulus beb, ban wenyaboka loblulum aboka yuba sekoka lelerek anababya, blekdeboka pam oboka sikenek dukaʾ lolowoka gibsinobaʾ senemek ara berra lobnenggumek.

¹⁹ Dara onoʾ danyek, Yahudi nang edya wene nang Pisidia moka Antiokhia heikek ab hnon, Ikonium heik ab hnon ara, Listra heik yeilimeekanya, wenewoka lelesik adya, nimi nauba ganya dangawoka Yahudi nang ek sam makal bilimek. Wera sikda heik enyegan nang era, Yahudi nang eblaboka neikaʾ hiboka, Paulus bek girik adya saboka oboka, eremek weilik sam bologol bilimek. Sikja dara, Paulus bera seleb somogamla senemek.

²⁰ Bok, yuba doro diriga ban nang era, Paulus omek ak akneb ganagoka diri seklemek dara, Paulus bera bukoka, on heikek sam wekel yeilimok. Wera ampum maboka gwelegok dara, heik era loboka, Barnabas beblaboka neikaʾ Derbe heikek birik.

Paulus Barnabas Ara Antiokhia Heik Saawoka Yarek Yuba

²¹ Derbe heik ara, Paulus beb, Barnabas beb dara, Imik Neyung adya perob lero yanggan yuba lelerek dara, nimi nauba Yesus ak dib senewoka domek. Ban nen seleb dara, sikda on pik Listra heikek yarek dara, onoʾ anyaganyeb uboka dara Ikonium heikek yarek, wera anyaganyeb dara, onoʾ Pisidia moka Antiokhia heikek birik.

²² Wera men balarek sum enyek, Imik Neyung yuba leb elekgiga bilirek heik dara, yanggan sam era on pik yanggarek dara, Imik Neyung yuba doro diriga ban nim ek, dib senenaʾ ak mel-mela salabmoboka ulunokaʾ aboka wenebgiga yalarek. ”Nim Imik Neyung bedya wenesin heikek weknemak ara, sokok an igin yakaʾ hnon sum kwellilimnesil bok,” aboka wenebgiga sik yalarek heik pik era yeilirek.

²³ Wera nim Imik Neyung yuba dib doboka, yuba sikba yok lebdangoka longolamna heik era, Imik Neyung yuba dam nanga doboka sekiyiwoka ubgiga yalarek. Dara, sikda gwanenga denaʾ loboka heng uboka, sekiyisirek nang ara sikja dib senemek Imik Neyung bek elegoka, ban nang enera anja wa welemnemak anasa, wenyaboka molowoka Imik Neyung yuba e dam nang sekillilisirek.

²⁴ Dara, Paulus beb, Barnabas beb dara, Pisidia mok eb ara, uboka Pamfilia moka lanal birik.

²⁵ Anyagan ara, Perga heikek Imik Neyung yuba seleb leb elekgogowarek dara, senenggom mek gwan berem Atalia heikek birik.

²⁶ Anyaganyeb dara, mek ekla bunaʾ ak bukoka, sikja Antiokhia heikek yarek. Antiokhia heikek ara, sikja wen webdakarek wa webduruk aboka Imik Neyung adya wanaʾ uboka eleksinaʾ lomok elegemek heikek an yeilirek.

²⁷ Wera Paulus beb, Barnabas beb dara, seleb Antiokhia heikek yarek dara, anyagan Imik Neyung yuba donaʾ nim eb neikaʾ ak mamagiyiwoka, Imik Neyung adya arawoka, sik pik uboka yok-yok heikek nidyaʾ perobaʾ unulumok anyek nekesirik. Dara onoʾ, Imik Neyung adya Yahudi gom nim eneba Imik Neyung ak dib senewoka dolomakaʾ ak hekaʾ huboka pika bakamokaʾ anyek nekesirik.

²⁸ Wera Barnabas Paulus ara, anyagan Imik Neyung yuba doro diriga ban nang eblaboka neikaʾ nauba ulwenelemek.